Sukta 63

63.1

17 gayah platah, vishve devah, 15-16 pathya svastih, jagati, 15 trishtubva; 16-17 trishtup

प॒रा॒वतो॒ ये दिधि॑षन्त॒ आप्यं॒ मनु॑प्रीतासो॒ जनि॑मा वि॒वस्व॑तः ।
य॒याते॒र्ये न॑हु॒ष्य॑स्य ब॒र्हिषि॑ दे॒वा आस॑ते॒ ते अधि॑ ब्रुवन्तु नः ॥१॥

Paravato ye didhishanta apyam manupritaso janima vivasvatah
Yayaterye nahushyasya barhishi deva asate te adhi bruvantu nah

63.2

विश्वा॒ हि वो॑ नम॒स्या॑नि॒ वन्द्या॒ नामा॑नि देवा उ॒त य॒ज्ञिया॑नि वः ।
ये स्थ जा॒ता अदि॑तेर॒द्भ्यस्परि॒ ये पृ॑थि॒व्यास्ते म॑ इ॒ह श्रु॑ता॒ हव॑म् ॥२॥

Vishva hi vo namasyani vandya namani deva uta yagyiyani vah
Ye stha jata aditeradbhyaspari ye prithivyaste ma iha shruta havam

63.3

येभ्यो॑ मा॒ता मधु॑म॒त्पिन्व॑ते॒ पय॑ः पी॒यूषं॒ द्यौरदि॑ति॒रद्रि॑बर्हाः ।
उ॒क्थशु॑ष्मान्वृषभ॒रान्त्स्वप्न॑स॒स्ताँ आ॑दि॒त्याँ अनु॑ मदा स्व॒स्तये॑ ॥३॥

Yebhyo mata madhumatpinvate payah piyusham dyauraditiradribarhah
Ukthashushmanvrishabharantsvapnasastam adityam anu mada svastaye

63.4

नृ॒चक्ष॑सो॒ अनि॑मिषन्तो अ॒र्हणा॑ बृ॒हद्दे॒वासो॑ अमृत॒त्वमा॑नशुः ।
ज्यो॒तीर॑था॒ अहि॑माया॒ अना॑गसो दि॒वो व॒र्ष्माणं॑ वसते स्व॒स्तये॑ ॥४॥

Nrichakshaso animishanto arhana brihaddevaso amritatvamanashuh
Jyotiratha ahimaya anagaso divo varshmanam vasate svastaye

63.5

स॒म्राजो॒ ये सु॒वृधो॑ य॒ज्ञमा॑य॒युरप॑रिह्वृता दधि॒रे दि॒वि क्षय॑म् ।
ताँ आ वि॑वास॒ नम॑सा सुवृ॒क्तिभि॑र्म॒हो आ॑दि॒त्याँ अदि॑तिं स्व॒स्तये॑ ॥५॥

Samrajo ye suvridho yagyamayayuraparihvrita dadhire divi kshayam
Tam a vivasa namasa suvriktibhirmaho adityam aditim svastaye

63.6

को व॒ः स्तोमं॑ राधति॒ यं जुजो॑षथ॒ विश्वे॑ देवासो मनुषो॒ यति॒ ष्ठन॑ ।
को वो॑ऽध्व॒रं तु॑विजाता॒ अरं॑ कर॒द्यो न॒ः पर्ष॒दत्यंह॑ः स्व॒स्तये॑ ॥६॥

Ko vah stomam radhati yam jujoshatha vishve devaso manusho yati shthana
Ko vodhvaram tuvijata aram karadyo nah parshadatyanhah svastaye

63.7

येभ्यो॒ होत्रां॑ प्रथ॒मामा॑ये॒जे मनु॒ः समि॑द्धाग्नि॒र्मन॑सा स॒प्त होतृ॑भिः ।
त आ॑दित्या॒ अभ॑यं॒ शर्म॑ यच्छत सु॒गा न॑ः कर्त सु॒पथा॑ स्व॒स्तये॑ ॥७॥

Yebhyo hotram prathamamayeje manuh samiddhagnirmanasa sapta hotribhih
Ta aditya abhayam sharma yachchhata suga nah karta supatha svastaye

63.8

य ईशि॑रे॒ भुव॑नस्य॒ प्रचे॑तसो॒ विश्व॑स्य स्था॒तुर्जग॑तश्च॒ मन्त॑वः ।
ते न॑ः कृ॒तादकृ॑ता॒देन॑स॒स्पर्य॒द्या दे॑वासः पिपृता स्व॒स्तये॑ ॥८॥

Ya ishire bhuvanasya prachetaso vishvasya sthaturjagatashcha mantavah
Te nah kritadakritadenasasparyadya devasah piprita svastaye

63.9

भरे॒ष्विन्द्रं॑ सु॒हवं॑ हवामहेंऽहो॒मुचं॑ सु॒कृतं॒ दैव्यं॒ जन॑म् ।
अ॒ग्निं मि॒त्रं वरु॑णं सा॒तये॒ भगं॒ द्यावा॑पृथि॒वी म॒रुत॑ः स्व॒स्तये॑ ॥९॥

Bhareshvindram suhavam havamahenhomucham sukritam daivyam janam
Agnim mitram varunam sataye bhagam dyavaprithivi marutah svastaye

63.10

सु॒त्रामा॑णं पृथि॒वीं द्याम॑ने॒हसं॑ सु॒शर्मा॑ण॒मदि॑तिं सु॒प्रणी॑तिम् ।
दैवीं॒ नावं॑ स्वरि॒त्रामना॑गस॒मस्र॑वन्ती॒मा रु॑हेमा स्व॒स्तये॑ ॥१०॥

Sutramanam prithivim dyamanehasam susharmanamaditim supranitim
Daivim navam svaritramanagasamasravantima ruhema svastaye

63.11

विश्वे॑ यजत्रा॒ अधि॑ वोचतो॒तये॒ त्राय॑ध्वं नो दु॒रेवा॑या अभि॒ह्रुत॑ः ।
स॒त्यया॑ वो दे॒वहू॑त्या हुवेम शृण्व॒तो दे॑वा॒ अव॑से स्व॒स्तये॑ ॥११॥

Vishve yajatra adhi vochatotaye trayadhvam no durevaya abhihrutah
Satyaya vo devahutya huvema shrinvato deva avase svastaye

63.12

अपामी॑वा॒मप॒ विश्वा॒मना॑हुति॒मपारा॑तिं दुर्वि॒दत्रा॑मघाय॒तः ।
आ॒रे दे॑वा॒ द्वेषो॑ अ॒स्मद्यु॑योतनो॒रु ण॒ः शर्म॑ यच्छता स्व॒स्तये॑ ॥१२॥

Apamivamapa vishvamanahutimaparatim durvidatramaghayatah
Are deva dvesho asmadyuyotanoru nah sharma yachchhata svastaye

63.13

अरि॑ष्ट॒ः स मर्तो॒ विश्व॑ एधते॒ प्र प्र॒जाभि॑र्जायते॒ धर्म॑ण॒स्परि॑ ।
यमा॑दित्यासो॒ नय॑था सुनी॒तिभि॒रति॒ विश्वा॑नि दुरि॒ता स्व॒स्तये॑ ॥१३॥

Arishtah sa marto vishva edhate pra prajabhirjayate dharmanaspari
Yamadityaso nayatha sunitibhirati vishvani durita svastaye

63.14

यं दे॑वा॒सोऽव॑थ॒ वाज॑सातौ॒ यं शूर॑साता मरुतो हि॒ते धने॑ ।
प्रा॒त॒र्यावा॑णं॒ रथ॑मिन्द्र सान॒सिमरि॑ष्यन्त॒मा रु॑हेमा स्व॒स्तये॑ ॥१४॥

Yam devasovatha vajasatau yam shurasata maruto hite dhane
Prataryavanam rathamindra sanasimarishyantama ruhema svastaye

63.15

स्व॒स्ति न॑ः प॒थ्या॑सु॒ धन्व॑सु स्व॒स्त्य१प्सु वृ॒जने॒ स्व॑र्वति ।
स्व॒स्ति न॑ः पुत्रकृ॒थेषु॒ योनि॑षु स्व॒स्ति रा॒ये म॑रुतो दधातन ॥१५॥

Svasti nah pathyasu dhanvasu svastya1psu vrijane svarvati
Svasti nah putrakritheshu yonishu svasti raye maruto dadhatana

63.16

स्व॒स्तिरिद्धि प्रप॑थे॒ श्रेष्ठा॒ रेक्ण॑स्वत्य॒भि या वा॒ममेति॑ ।
सा नो॑ अ॒मा सो अर॑णे॒ नि पा॑तु स्वावे॒शा भ॑वतु दे॒वगो॑पा ॥१६॥

Svastiriddhi prapathe shreshtha reknasvatyabhi ya vamameti
Sa no ama so arane ni patu svavesha bhavatu devagopa

63.17

ए॒वा प्ल॒तेः सू॒नुर॑वीवृधद्वो॒ विश्व॑ आदित्या अदिते मनी॒षी ।
ई॒शा॒नासो॒ नरो॒ अम॑र्त्ये॒नाऽस्ता॑वि॒ जनो॑ दि॒व्यो गये॑न ॥१७॥

Eva plateh sunuravivridhadvo vishva aditya adite manishi
Ishanaso naro amartyenastavi jano divyo gayena