Sukta 66

66.1

15 vasukarno vasukrah, vishvedevah, jagati, 15 trishtup

दे॒वान्हु॑वे बृ॒हच्छ्र॑वसः स्व॒स्तये॑ ज्योति॒ष्कृतो॑ अध्व॒रस्य॒ प्रचे॑तसः ।
ये वा॑वृ॒धुः प्र॑त॒रं वि॒श्ववे॑दस॒ इन्द्र॑ज्येष्ठासो अ॒मृता॑ ऋता॒वृध॑ः ॥१॥

Devanhuve brihachchhravasah svastaye jyotishkrito adhvarasya prachetasah
Ye vavridhuh prataram vishvavedasa indrajyeshthaso amrita ritavridhah

66.2

इन्द्र॑प्रसूता॒ वरु॑णप्रशिष्टा॒ ये सूर्य॑स्य॒ ज्योति॑षो भा॒गमा॑न॒शुः ।
म॒रुद्ग॑णे वृ॒जने॒ मन्म॑ धीमहि॒ माघो॑ने य॒ज्ञं ज॑नयन्त सू॒रय॑ः ॥२॥

Indraprasuta varunaprashishta ye suryasya jyotisho bhagamanashuh
Marudgane vrijane manma dhimahi maghone yagyam janayanta surayah

66.3

इन्द्रो॒ वसु॑भि॒ः परि॑ पातु नो॒ गय॑मादि॒त्यैर्नो॒ अदि॑ति॒ः शर्म॑ यच्छतु ।
रु॒द्रो रु॒द्रेभि॑र्दे॒वो मृ॑ळयाति न॒स्त्वष्टा॑ नो॒ ग्नाभि॑ः सुवि॒ताय॑ जिन्वतु ॥३॥

Indro vasubhih pari patu no gayamadityairno aditih sharma yachchhatu
Rudro rudrebhirdevo mrilayati nastvashta no gnabhih suvitaya jinvatu

66.4

अदि॑ति॒र्द्यावा॑पृथि॒वी ऋ॒तं म॒हदिन्द्रा॒विष्णू॑ म॒रुत॒ः स्व॑र्बृ॒हत् ।
दे॒वाँ आ॑दि॒त्याँ अव॑से हवामहे॒ वसू॑न्रु॒द्रान्त्स॑वि॒तारं॑ सु॒दंस॑सम् ॥४॥

Aditirdyavaprithivi ritam mahadindravishnu marutah svarbrihat
Devam adityam avase havamahe vasunrudrantsavitaram sudansasam

66.5

सर॑स्वान्धी॒भिर्वरु॑णो धृ॒तव्र॑तः पू॒षा विष्णु॑र्महि॒मा वा॒युर॒श्विना॑ ।
ब्र॒ह्म॒कृतो॑ अ॒मृता॑ वि॒श्ववे॑दस॒ः शर्म॑ नो यंसन्त्रि॒वरू॑थ॒मंह॑सः ॥५॥

Sarasvandhibhirvaruno dhritavratah pusha vishnurmahima vayurashvina
Brahmakrito amrita vishvavedasah sharma no yansantrivaruthamanhasah

66.6

वृषा॑ य॒ज्ञो वृष॑णः सन्तु य॒ज्ञिया॒ वृष॑णो दे॒वा वृष॑णो हवि॒ष्कृत॑ः ।
वृष॑णा॒ द्यावा॑पृथि॒वी ऋ॒ताव॑री॒ वृषा॑ प॒र्जन्यो॒ वृष॑णो वृष॒स्तुभ॑ः ॥६॥

Vrisha yagyo vrishanah santu yagyiya vrishano deva vrishano havishkritah
Vrishana dyavaprithivi ritavari vrisha parjanyo vrishano vrishastubhah

66.7

अ॒ग्नीषोमा॒ वृष॑णा॒ वाज॑सातये पुरुप्रश॒स्ता वृष॑णा॒ उप॑ ब्रुवे ।
यावी॑जि॒रे वृष॑णो देवय॒ज्यया॒ ता न॒ः शर्म॑ त्रि॒वरू॑थं॒ वि यं॑सतः ॥७॥

Agnishoma vrishana vajasataye puruprashasta vrishana upa bruve
Yavijire vrishano devayajyaya ta nah sharma trivarutham vi yansatah

66.8

धृ॒तव्र॑ताः क्ष॒त्रिया॑ यज्ञनि॒ष्कृतो॑ बृहद्दि॒वा अ॑ध्व॒राणा॑मभि॒श्रिय॑ः ।
अ॒ग्निहो॑तार ऋत॒सापो॑ अ॒द्रुहो॒ऽपो अ॑सृज॒न्ननु॑ वृत्र॒तूर्ये॑ ॥८॥

Dhritavratah kshatriya yagyanishkrito brihaddiva adhvaranamabhishriyah
Agnihotara ritasapo adruhopo asrijannanu vritraturye

66.9

द्यावा॑पृथि॒वी ज॑नयन्न॒भि व्र॒ताऽऽप॒ ओष॑धीर्व॒निना॑नि य॒ज्ञिया॑ ।
अ॒न्तरि॑क्षं॒ स्व१रा प॑प्रुरू॒तये॒ वशं॑ दे॒वास॑स्त॒न्वी॒३ नि मा॑मृजुः ॥९॥

Dyavaprithivi janayannabhi vratapa oshadhirvaninani yagyiya
Antariksham sva1ra paprurutaye vasham devasastanvi3 ni mamrijuh

66.10

ध॒र्तारो॑ दि॒व ऋ॒भव॑ः सु॒हस्ता॑ वातापर्ज॒न्या म॑हि॒षस्य॑ तन्य॒तोः ।
आप॒ ओष॑धी॒ः प्र ति॑रन्तु नो॒ गिरो॒ भगो॑ रा॒तिर्वा॒जिनो॑ यन्तु मे॒ हव॑म् ॥१०॥

Dhartaro diva ribhavah suhasta vataparjanya mahishasya tanyatoh
Apa oshadhih pra tirantu no giro bhago ratirvajino yantu me havam

66.11

स॒मु॒द्रः सिन्धू॒ रजो॑ अ॒न्तरि॑क्षम॒ज एक॑पात्तनयि॒त्नुर॑र्ण॒वः ।
अहि॑र्बु॒ध्न्य॑ः शृणव॒द्वचां॑सि मे॒ विश्वे॑ दे॒वास॑ उ॒त सू॒रयो॒ मम॑ ॥११॥

Samudrah sindhu rajo antarikshamaja ekapattanayitnurarnavah
Ahirbudhnyah shrinavadvachansi me vishve devasa uta surayo mama

66.12

स्याम॑ वो॒ मन॑वो दे॒ववी॑तये॒ प्राञ्चं॑ नो य॒ज्ञं प्र ण॑यत साधु॒या ।
आदि॑त्या॒ रुद्रा॒ वस॑व॒ः सुदा॑नव इ॒मा ब्रह्म॑ श॒स्यमा॑नानि जिन्वत ॥१२॥

Syama vo manavo devavitaye prancham no yagyam pra nayata sadhuya
Aditya rudra vasavah sudanava ima brahma shasyamanani jinvata

66.13

दैव्या॒ होता॑रा प्रथ॒मा पु॒रोहि॑त ऋ॒तस्य॒ पन्था॒मन्वे॑मि साधु॒या ।
क्षेत्र॑स्य॒ पतिं॒ प्रति॑वेशमीमहे॒ विश्वा॑न्दे॒वाँ अ॒मृताँ॒ अप्र॑युच्छतः ॥१३॥

Daivya hotara prathama purohita ritasya panthamanvemi sadhuya
Kshetrasya patim prativeshamimahe vishvandevam amritam aprayuchchhatah

66.14

वसि॑ष्ठासः पितृ॒वद्वाच॑मक्रत दे॒वाँ ईळा॑ना ऋषि॒वत्स्व॒स्तये॑ ।
प्री॒ता इ॑व ज्ञा॒तय॒ः काम॒मेत्या॒ऽस्मे दे॑वा॒सोऽव॑ धूनुता॒ वसु॑ ॥१४॥

Vasishthasah pitrivadvachamakrata devam ilana rishivatsvastaye
Prita iva gyatayah kamametyasme devasova dhunuta vasu

66.15

दे॒वान्वसि॑ष्ठो अ॒मृता॑न्ववन्दे॒ ये विश्वा॒ भुव॑ना॒भि प्र॑त॒स्थुः ।
ते नो॑ रासन्तामुरुगा॒यम॒द्य यू॒यं पा॑त स्व॒स्तिभि॒ः सदा॑ नः ॥१५॥

Devanvasishtho amritanvavande ye vishva bhuvanabhi pratasthuh
Te no rasantamurugayamadya yuyam pata svastibhih sada nah