Sukta 67

67.1

12 ayasya angirasah, brihaspatih, trishtup

इ॒मां धियं॑ स॒प्तशी॑र्ष्णीं पि॒ता न॑ ऋ॒तप्र॑जातां बृह॒तीम॑विन्दत् ।
तु॒रीयं॑ स्विज्जनयद्वि॒श्वज॑न्यो॒ऽयास्य॑ उ॒क्थमिन्द्रा॑य॒ शंस॑न् ॥१॥

Imam dhiyam saptashirshnim pita na ritaprajatam brihatimavindat
Turiyam svijjanayadvishvajanyoyasya ukthamindraya shansan

67.2

ऋ॒तं शंस॑न्त ऋ॒जु दीध्या॑ना दि॒वस्पु॒त्रासो॒ असु॑रस्य वी॒राः ।
विप्रं॑ प॒दमङ्गि॑रसो॒ दधा॑ना य॒ज्ञस्य॒ धाम॑ प्रथ॒मं म॑नन्त ॥२॥

Ritam shansanta riju didhyana divasputraso asurasya virah
Vipram padamangiraso dadhana yagyasya dhama prathamam mananta

67.3

हं॒सैरि॑व॒ सखि॑भि॒र्वाव॑दद्भिरश्म॒न्मया॑नि॒ नह॑ना॒ व्यस्य॑न् ।
बृह॒स्पति॑रभि॒कनि॑क्रद॒द्गा उ॒त प्रास्तौ॒दुच्च॑ वि॒द्वाँ अ॑गायत् ॥३॥

Hansairiva sakhibhirvavadadbhirashmanmayani nahana vyasyan
Brihaspatirabhikanikradadga uta prastauduchcha vidvam agayat

67.4

अ॒वो द्वाभ्यां॑ प॒र एक॑या॒ गा गुहा॒ तिष्ठ॑न्ती॒रनृ॑तस्य॒ सेतौ॑ ।
बृह॒स्पति॒स्तम॑सि॒ ज्योति॑रि॒च्छन्नुदु॒स्रा आक॒र्वि हि ति॒स्र आव॑ः ॥४॥

Avo dvabhyam para ekaya ga guha tishthantiranritasya setau
Brihaspatistamasi jyotirichchhannudusra akarvi hi tisra avah

67.5

वि॒भिद्या॒ पुरं॑ श॒यथे॒मपा॑चीं॒ निस्त्रीणि॑ सा॒कमु॑द॒धेर॑कृन्तत् ।
बृह॒स्पति॑रु॒षसं॒ सूर्यं॒ गाम॒र्कं वि॑वेद स्त॒नय॑न्निव॒ द्यौः ॥५॥

Vibhidya puram shayathemapachim nistrini sakamudadherakrintat
Brihaspatirushasam suryam gamarkam viveda stanayanniva dyauh

67.6

इन्द्रो॑ व॒लं र॑क्षि॒तारं॒ दुघा॑नां क॒रेणे॑व॒ वि च॑कर्ता॒ रवे॑ण ।
स्वेदा॑ञ्जिभिरा॒शिर॑मि॒च्छमा॒नोऽरो॑दयत्प॒णिमा गा अ॑मुष्णात् ॥६॥

Indro valam rakshitaram dughanam kareneva vi chakarta ravena
Svedanjibhirashiramichchhamanorodayatpanima ga amushnat

67.7

स ईं॑ स॒त्येभि॒ः सखि॑भिः शु॒चद्भि॒र्गोधा॑यसं॒ वि ध॑न॒सैर॑दर्दः ।
ब्रह्म॑ण॒स्पति॒र्वृष॑भिर्व॒राहै॑र्घ॒र्मस्वे॑देभि॒र्द्रवि॑णं॒ व्या॑नट् ॥७॥

Sa im satyebhih sakhibhih shuchadbhirgodhayasam vi dhanasairadardah
Brahmanaspatirvrishabhirvarahairgharmasvedebhirdravinam vyanat

67.8

ते स॒त्येन॒ मन॑सा॒ गोप॑तिं॒ गा इ॑या॒नास॑ इषणयन्त धी॒भिः ।
बृह॒स्पति॑र्मि॒थोअ॑वद्यपेभि॒रुदु॒स्रिया॑ असृजत स्व॒युग्भि॑ः ॥८॥

Te satyena manasa gopatim ga iyanasa ishanayanta dhibhih
Brihaspatirmithoavadyapebhirudusriya asrijata svayugbhih

67.9

तं व॒र्धय॑न्तो म॒तिभि॑ः शि॒वाभि॑ः सिं॒हमि॑व॒ नान॑दतं स॒धस्थे॑ ।
बृह॒स्पतिं॒ वृष॑णं॒ शूर॑सातौ॒ भरे॑भरे॒ अनु॑ मदेम जि॒ष्णुम् ॥९॥

Tam vardhayanto matibhih shivabhih sinhamiva nanadatam sadhasthe
Brihaspatim vrishanam shurasatau bharebhare anu madema jishnum

67.10

य॒दा वाज॒मस॑नद्वि॒श्वरू॑प॒मा द्यामरु॑क्ष॒दुत्त॑राणि॒ सद्म॑ ।
बृह॒स्पतिं॒ वृष॑णं व॒र्धय॑न्तो॒ नाना॒ सन्तो॒ बिभ्र॑तो॒ ज्योति॑रा॒सा ॥१०॥

Yada vajamasanadvishvarupama dyamarukshaduttarani sadma
Brihaspatim vrishanam vardhayanto nana santo bibhrato jyotirasa

67.11

स॒त्यामा॒शिषं॑ कृणुता वयो॒धै की॒रिं चि॒द्ध्यव॑थ॒ स्वेभि॒रेवै॑ः ।
प॒श्चा मृधो॒ अप॑ भवन्तु॒ विश्वा॒स्तद्रो॑दसी शृणुतं विश्वमि॒न्वे ॥११॥

Satyamashisham krinuta vayodhai kirim chiddhyavatha svebhirevaih
Pashcha mridho apa bhavantu vishvastadrodasi shrinutam vishvaminve

67.12

इन्द्रो॑ म॒ह्ना म॑ह॒तो अ॑र्ण॒वस्य॒ वि मू॒र्धान॑मभिनदर्बु॒दस्य॑ ।
अह॒न्नहि॒मरि॑णात्स॒प्त सिन्धू॑न्दे॒वैर्द्या॑वापृथिवी॒ प्राव॑तं नः ॥१२॥

Indro mahna mahato arnavasya vi murdhanamabhinadarbudasya
Ahannahimarinatsapta sindhundevairdyavaprithivi pravatam nah