Sukta 68

68.1

12 ayasya angirasah, brihaspatih, trishtup

उ॒द॒प्रुतो॒ न वयो॒ रक्ष॑माणा॒ वाव॑दतो अ॒भ्रिय॑स्येव॒ घोषा॑ः ।
गि॒रि॒भ्रजो॒ नोर्मयो॒ मद॑न्तो॒ बृह॒स्पति॑म॒भ्य१र्का अ॑नावन् ॥१॥

Udapruto na vayo rakshamana vavadato abhriyasyeva ghoshah
Giribhrajo normayo madanto brihaspatimabhya1rka anavan

सं गोभि॑राङ्गिर॒सो नक्ष॑माणो॒ भग॑ इ॒वेद॑र्य॒मणं॑ निनाय ।
जने॑ मि॒त्रो न दम्प॑ती अनक्ति॒ बृह॑स्पते वा॒जया॒शूँरि॑वा॒जौ ॥२॥

Sam gobhirangiraso nakshamano bhaga ivedaryamanam ninaya
Jane mitro na dampati anakti brihaspate vajayashunrivajau

सा॒ध्व॒र्या अ॑ति॒थिनी॑रिषि॒राः स्पा॒र्हाः सु॒वर्णा॑ अनव॒द्यरू॑पाः ।
बृह॒स्पति॒ः पर्व॑तेभ्यो वि॒तूर्या॒ निर्गा ऊ॑पे॒ यव॑मिव स्थि॒विभ्य॑ः ॥३॥

Sadhvarya atithinirishirah sparhah suvarna anavadyarupah
Brihaspatih parvatebhyo viturya nirga upe yavamiva sthivibhyah

आ॒प्रु॒षा॒यन्मधु॑न ऋ॒तस्य॒ योनि॑मवक्षि॒पन्न॒र्क उ॒ल्कामि॑व॒ द्योः ।
बृह॒स्पति॑रु॒द्धर॒न्नश्म॑नो॒ गा भूम्या॑ उ॒द्नेव॒ वि त्वचं॑ बिभेद ॥४॥

Aprushayanmadhuna ritasya yonimavakshipannarka ulkamiva dyoh
Brihaspatiruddharannashmano ga bhumya udneva vi tvacham bibheda

अप॒ ज्योति॑षा॒ तमो॑ अ॒न्तरि॑क्षादु॒द्नः शीपा॑लमिव॒ वात॑ आजत् ।
बृह॒स्पति॑रनु॒मृश्या॑ व॒लस्या॒ऽभ्रमि॑व॒ वात॒ आ च॑क्र॒ आ गाः ॥५॥

Apa jyotisha tamo antarikshadudnah shipalamiva vata ajat
Brihaspatiranumrishya valasyabhramiva vata a chakra a gah

य॒दा व॒लस्य॒ पीय॑तो॒ जसुं॒ भेद्बृह॒स्पति॑रग्नि॒तपो॑भिर॒र्कैः ।
द॒द्भिर्न जि॒ह्वा परि॑विष्ट॒माद॑दा॒विर्नि॒धीँर॑कृणोदु॒स्रिया॑णाम् ॥६॥

Yada valasya piyato jasum bhedbrihaspatiragnitapobhirarkaih
Dadbhirna jihva parivishtamadadavirnidhinrakrinodusriyanam

बृह॒स्पति॒रम॑त॒ हि त्यदा॑सां॒ नाम॑ स्व॒रीणां॒ सद॑ने॒ गुहा॒ यत् ।
आ॒ण्डेव॑ भि॒त्त्वा श॑कु॒नस्य॒ गर्भ॒मुदु॒स्रिया॒ः पर्व॑तस्य॒ त्मना॑जत् ॥७॥

Brihaspatiramata hi tyadasam nama svarinam sadane guha yat
Andeva bhittva shakunasya garbhamudusriyah parvatasya tmanajat

अश्नापि॑नद्धं॒ मधु॒ पर्य॑पश्य॒न्मत्स्यं॒ न दी॒न उ॒दनि॑ क्षि॒यन्त॑म् ।
निष्टज्ज॑भार चम॒सं न वृ॒क्षाद्बृह॒स्पति॑र्विर॒वेणा॑ वि॒कृत्य॑ ॥८॥

Ashnapinaddham madhu paryapashyanmatsyam na dina udani kshiyantam
Nishtajjabhara chamasam na vrikshadbrihaspatirviravena vikritya

सोषाम॑विन्द॒त्स स्व१ः सो अ॒ग्निं सो अ॒र्केण॒ वि ब॑बाधे॒ तमां॑सि ।
बृह॒स्पति॒र्गोव॑पुषो व॒लस्य॒ निर्म॒ज्जानं॒ न पर्व॑णो जभार ॥९॥

Soshamavindatsa sva1h so agnim so arkena vi babadhe tamansi
Brihaspatirgovapusho valasya nirmajjanam na parvano jabhara

हि॒मेव॑ प॒र्णा मु॑षि॒ता वना॑नि॒ बृह॒स्पति॑नाकृपयद्व॒लो गाः ।
अ॒ना॒नु॒कृ॒त्यम॑पु॒नश्च॑कार॒ यात्सूर्या॒मासा॑ मि॒थ उ॒च्चरा॑तः ॥१०॥

Himeva parna mushita vanani brihaspatinakripayadvalo gah
Ananukrityamapunashchakara yatsuryamasa mitha uchcharatah

अ॒भि श्या॒वं न कृश॑नेभि॒रश्वं॒ नक्ष॑त्रेभिः पि॒तरो॒ द्याम॑पिंशन् ।
रात्र्यां॒ तमो॒ अद॑धु॒र्ज्योति॒रह॒न्बृह॒स्पति॑र्भि॒नदद्रिं॑ वि॒दद्गाः ॥११॥

Abhi shyavam na krishanebhirashvam nakshatrebhih pitaro dyamapinshan
Ratryam tamo adadhurjyotirahanbrihaspatirbhinadadrim vidadgah

इ॒दम॑कर्म॒ नमो॑ अभ्रि॒याय॒ यः पू॒र्वीरन्वा॒नोन॑वीति ।
बृह॒स्पति॒ः स हि गोभि॒ः सो अश्वै॒ः स वी॒रेभि॒ः स नृभि॑र्नो॒ वयो॑ धात् ॥१२॥

Idamakarma namo abhriyaya yah purviranvanonaviti
Brihaspatih sa hi gobhih so ashvaih sa virebhih sa nribhirno vayo dhat