সূক্ত 56

56.1

৭ বৃহদুক্থো বামদেব্যঃ। বিশ্বেদেবাঃ। ত্রিষ্টুপ্। ৪-৬ জগতী।

ইদং ত একং পর ঊ ত একং তৃতীয়েন জ্যোতিষা সং বিশস্ব ।
সংবেশনে তন্ব১শ্চারুরেধি প্রিয়ো দেবানাং পরমে জনিত্রে ॥১॥

56.2

তনূষ্টে বাজিন্তন্বং১ নয়ন্তী বামমস্মভ্যং ধাতু শর্ম তুভ্যম্ ।
অহ্রুতো মহো ধরুণায় দেবান্দিবীব জ্যোতিঃ স্বমা মিমীয়াঃ ॥২॥

56.3

বাজ্যসি বাজিনেনা সুবেনীঃ সুবিতঃ স্তোমং সুবিতো দিবং গাঃ ।
সুবিতো ধর্ম প্রথমানু সত্যা সুবিতো দেবান্ত্সুবিতোঽনু পত্ম ॥৩॥

56.4

মহিম্ন এষাং পিতরশ্চনেশিরে দেবা দেবেষ্বদধুরপি ক্রতুম্ ।
সমবিব্যচুরুত যান্যত্বিষুরৈষাং তনূষু নি বিবিশুঃ পুনঃ ॥৪॥

56.5

সহোভির্বিশ্বং পরি চক্রমূ রজঃ পূর্বা ধামান্যমিতা মিমানাঃ ।
তনূষু বিশ্বা ভুবনা নি যেমিরে প্রাসারয়ন্ত পুরুধ প্রজা অনু ॥৫॥

56.6

দ্বিধা সূনবোঽসুরং স্বর্বিদমাস্থাপয়ন্ত তৃতীয়েন কর্মণা ।
স্বাং প্রজাং পিতরঃ পিত্র্যং সহ আবরেষ্বদধুস্তন্তুমাততম্ ॥৬॥

56.7

নাবা ন ক্ষোদঃ প্রদিশঃ পৃথিব্যাঃ স্বস্তিভিরতি দুর্গাণি বিশ্বা ।
স্বাং প্রজাং বৃহদুক্থো মহিত্বাঽঽবরেষ্বদধাদা পরেষু ॥৭॥