Sukta 56

56.1

7 brihaduktho vamadevyah, vishvedevah, trishtup, 4-6 jagati

इ॒दं त॒ एकं॑ प॒र ऊ॑ त॒ एकं॑ तृ॒तीये॑न॒ ज्योति॑षा॒ सं वि॑शस्व ।
सं॒वेश॑ने त॒न्व१श्चारु॑रेधि प्रि॒यो दे॒वानां॑ पर॒मे ज॒नित्रे॑ ॥१॥

Idam ta ekam para u ta ekam tritiyena jyotisha sam vishasva
Sanveshane tanva1shcharuredhi priyo devanam parame janitre

त॒नूष्टे॑ वाजिन्त॒न्वं१ नय॑न्ती वा॒मम॒स्मभ्यं॒ धातु॒ शर्म॒ तुभ्य॑म् ।
अह्रु॑तो म॒हो ध॒रुणा॑य दे॒वान्दि॒वी॑व॒ ज्योति॒ः स्वमा मि॑मीयाः ॥२॥

Tanushte vajintanvan1 nayanti vamamasmabhyam dhatu sharma tubhyam
Ahruto maho dharunaya devandiviva jyotih svama mimiyah

वा॒ज्य॑सि॒ वाजि॑नेना सुवे॒नीः सु॑वि॒तः स्तोमं॑ सुवि॒तो दिवं॑ गाः ।
सु॒वि॒तो धर्म॑ प्रथ॒मानु॑ स॒त्या सु॑वि॒तो दे॒वान्त्सु॑वि॒तोऽनु॒ पत्म॑ ॥३॥

Vajyasi vajinena suvenih suvitah stomam suvito divam gah
Suvito dharma prathamanu satya suvito devantsuvitonu patma

म॒हि॒म्न ए॑षां पि॒तर॑श्च॒नेशि॑रे दे॒वा दे॒वेष्व॑दधु॒रपि॒ क्रतु॑म् ।
सम॑विव्यचुरु॒त यान्यत्वि॑षु॒रैषां॑ त॒नूषु॒ नि वि॑विशु॒ः पुन॑ः ॥४॥

Mahimna esham pitarashchaneshire deva deveshvadadhurapi kratum
Samavivyachuruta yanyatvishuraisham tanushu ni vivishuh punah

सहो॑भि॒र्विश्वं॒ परि॑ चक्रमू॒ रज॒ः पूर्वा॒ धामा॒न्यमि॑ता॒ मिमा॑नाः ।
त॒नूषु॒ विश्वा॒ भुव॑ना॒ नि ये॑मिरे॒ प्रासा॑रयन्त पुरु॒ध प्र॒जा अनु॑ ॥५॥

Sahobhirvishvam pari chakramu rajah purva dhamanyamita mimanah
Tanushu vishva bhuvana ni yemire prasarayanta purudha praja anu

द्विधा॑ सू॒नवोऽसु॑रं स्व॒र्विद॒मास्था॑पयन्त तृ॒तीये॑न॒ कर्म॑णा ।
स्वां प्र॒जां पि॒तर॒ः पित्र्यं॒ सह॒ आव॑रेष्वदधु॒स्तन्तु॒मात॑तम् ॥६॥

Dvidha sunavosuram svarvidamasthapayanta tritiyena karmana
Svam prajam pitarah pitryam saha avareshvadadhustantumatatam

ना॒वा न क्षोद॑ः प्र॒दिश॑ः पृथि॒व्याः स्व॒स्तिभि॒रति॑ दु॒र्गाणि॒ विश्वा॑ ।
स्वां प्र॒जां बृ॒हदु॑क्थो महि॒त्वाऽऽव॑रेष्वदधा॒दा परे॑षु ॥७॥

Nava na kshodah pradishah prithivyah svastibhirati durgani vishva
Svam prajam brihaduktho mahitvavareshvadadhada pareshu