সূক্ত 22

22.1

১৫ ঐন্দ্রো বিমদঃ প্রাজাপত্যো বা, বাসুক্রো বসুকৃদ্বা। ইন্দ্রঃ। পুরস্তাদ্বৃহতী ৫,৭,৯ অনুষ্টুপ্, ১৫ ত্রিষ্টুপ্ ।

কুহ শ্রুত ইন্দ্রঃ কস্মিন্নদ্য জনে মিত্রো ন শ্রূয়তে । ঋষীণাং বা যঃ ক্ষয়ে গুহা বা চর্কৃষে গিরা ॥১॥

ইহ শ্রুত ইন্দ্রো অস্মে অদ্য স্তবে বজ্র্যৃচীষমঃ । মিত্রো ন যো জনেষ্বা যশশ্চক্রে অসাম্যা ॥২॥

মহো যস্পতিঃ শবসো অসাম্যা মহো নৃম্ণস্য তূতুজিঃ । ভর্তা বজ্রস্য ধৃষ্ণোঃ পিতা পুত্রমিব প্রিয়ম্ ॥৩॥

যুজানো অশ্বা বাতস্য ধুনী দেবো দেবস্য বজ্রিবঃ । স্যন্তা পথা বিরুক্মতা সৃজানঃ স্তোষ্যধ্বনঃ ॥৪॥

ত্বং ত্যা চিদ্বাতস্যাশ্বাগা ঋজ্রা ত্মনা বহধ্যৈ । যয়োর্দেবো ন মর্ত্যো যন্তা নকির্বিদায্যঃ ॥৫॥

অধ গ্মন্তোশনা পৃচ্ছতে বাং কদর্থা ন আ গৃহম্ । আ জগ্মথুঃ পরাকাদ্দিবশ্চ গ্মশ্চ মর্ত্যম্ ॥৬॥

আ ন ইন্দ্র পৃক্ষসেঽস্মাকং ব্রহ্মোদ্যতম্ । তত্ত্বা যাচামহেঽবঃ শুষ্ণং যদ্ধন্নমানুষম্ ॥৭॥

অকর্মা দস্যুরভি নো অমন্তুরন্যব্রতো অমানুষঃ । ত্বং তস্যামিত্রহন্বধর্দাসস্য দম্ভয় ॥৮॥

ত্বং ন ইন্দ্র শূর শূরৈরুত ত্বোতাসো বর্হণা । পুরুত্রা তে বি পূর্তয়ো নবন্ত ক্ষোণয়ো যথা ॥৯॥

ত্বং তান্বৃত্রহত্যে চোদয়ো নৄন্কার্পাণে শূর বজ্রিবঃ । গুহা যদী কবীনাং বিশাং নক্ষত্রশবসাম্ ॥১০॥

মক্ষূ তা ত ইন্দ্র দানাপ্নস আক্ষাণে শূর বজ্রিবঃ । যদ্ধ শুষ্ণস্য দম্ভয়ো জাতং বিশ্বং সয়াবভিঃ ॥১১॥

মাকুধ্র্যগিন্দ্র শূর বস্বীরস্মে ভূবন্নভিষ্টয়ঃ । বয়ংবয়ং ত আসাং সুম্নে স্যাম বজ্রিবঃ ॥১২॥

অস্মে তা ত ইন্দ্র সন্তু সত্যাঽহিংসন্তীরুপস্পৃশঃ । বিদ্যাম যাসাং ভুজো ধেনূনাং ন বজ্রিবঃ ॥১৩॥

অহস্তা যদপদী বর্ধত ক্ষাঃ শচীভির্বেদ্যানাম্ । শুষ্ণং পরি প্রদক্ষিণিদ্বিশ্বায়বে নি শিশ্নথঃ ॥১৪॥

পিবাপিবেদিন্দ্র শূর সোমং মা রিষণ্যো বসবান বসুঃ সন্ ।
উত ত্রায়স্ব গৃণতো মঘোনো মহশ্চ রায়ো রেবতস্কৃধী নঃ ॥১৫॥