সূক্ত 142

142.1

৮ শার্গাংঃ ১-২ জরিতা, ৩-৪ দ্রোণঃ, ৫-৬ সারিসৃক্বঃ, ৭-৮ স্তম্বমিত্রঃ। অগ্নিঃ। ত্রিষ্টুপ্ , ১-২ জগতী, ৭-৮ অনুষ্টুপ্।

অয়মগ্নে জরিতা ত্বে অভূদপি সহসঃ সূনো নহ্য১ন্যদস্ত্যাপ্যম্ ।
ভদ্রং হি শর্ম ত্রিবরূথমস্তি ত আরে হিংসানামপ দিদ্যুমা কৃধি ॥১॥

প্রবত্তে অগ্নে জনিমা পিতূয়তঃ সাচীব বিশ্বা ভুবনা ন্যৃঞ্জসে ।
প্র সপ্তয়ঃ প্র সনিষন্ত নো ধিয়ঃ পুরশ্চরন্তি পশুপা ইব ত্মনা ॥২॥

উত বা উ পরি বৃণক্ষি বপ্সদ্বহোরগ্ন উলপস্য স্বধাবঃ ।
উত খিল্যা উর্বরাণাং ভবন্তি মা তে হেতিং তবিষীং চুক্রুধাম ॥৩॥

যদুদ্বতো নিবতো যাসি বপ্সত্পৃথগেষি প্রগর্ধিনীব সেনা ।
যদা তে বাতো অনুবাতি শোচির্বপ্তেব শ্মশ্রু বপসি প্র ভূম ॥৪॥

প্রত্যস্য শ্রেণয়ো দদৃশ্র একং নিয়ানং বহবো রথাসঃ ।
বাহূ যদগ্নে অনুমর্মৃজানো ন্যঙ্ঙুত্তানামন্বেষি ভূমিম্ ॥৫॥

উত্তে শুষ্মা জিহতামুত্তে অর্চিরুত্তে অগ্নে শশমানস্য বাজাঃ ।
উচ্ছ্বঞ্চস্ব নি নম বর্ধমান আ ত্বাদ্য বিশ্বে বসবঃ সদন্তু ॥৬॥

অপামিদং ন্যয়নং সমুদ্রস্য নিবেশনম্ । অন্যং কৃণুষ্বেতঃ পন্থাং তেন যাহি বশাঁ অনু ॥৭॥

আয়নে তে পরায়ণে দূর্বা রোহন্তু পুষ্পিণীঃ । হ্রদাশ্চ পুণ্ডরীকাণি সমুদ্রস্য গৃহা ইমে ॥৮॥