সূক্ত 141

141.1

৬ অগ্নিস্তাপসঃ। বিশ্বেদেবাঃ। অনুষ্টুপ্।

অগ্নে অচ্ছা বদেহ নঃ প্রত্যঙ্নঃ সুমনা ভব । প্র নো যচ্ছ বিশস্পতে ধনদা অসি নস্ত্বম্ ॥১॥

141.2

প্র নো যচ্ছত্বর্যমা প্র ভগঃ প্র বৃহস্পতিঃ । প্র দেবাঃ প্রোত সূনৃতা রায়ো দেবী দদাতু নঃ ॥২॥

141.3

সোমং রাজানমবসেঽগ্নিং গীর্ভির্হবামহে । আদিত্যান্বিষ্ণুং সূর্যং ব্রহ্মাণং চ বৃহস্পতিম্ ॥৩॥

141.4

ইন্দ্রবায়ূ বৃহস্পতিং সুহবেহ হবামহে । যথা নঃ সর্ব ইজ্জনঃ সংগত্যাং সুমনা অসৎ ॥৪॥

141.5

অর্যমণং বৃহস্পতিমিন্দ্রং দানায় চোদয় । বাতং বিষ্ণুং সরস্বতীং সবিতারং চ বাজিনম্ ॥৫॥

141.6

ত্বং নো অগ্নে অগ্নিভির্ব্রহ্ম যজ্ঞং চ বর্ধয় । ত্বং নো দেবতাতয়ে রায়ো দানায় চোদয় ॥৬॥