সূক্ত 11

11.1

৯ আঙ্গির্হবির্ধানঃ। অগ্নিঃ। জগতী, ৭-৯ ত্রিষ্টুপ্।

বৃষা বৃষ্ণে দুদুহে দোহসা দিবঃ পয়াংসি যহ্বো অদিতেরদাভ্যঃ ।
বিশ্বং স বেদ বরুণো যথা ধিয়া স যজ্ঞিয়ো যজতু যজ্ঞিয়াঁ ঋতূন্ ॥১॥

11.2

রপদ্গন্ধর্বীরপ্যা চ যোষণা নদস্য নাদে পরি পাতু মে মনঃ ।
ইষ্টস্য মধ্যে অদিতির্নি ধাতু নো ভ্রাতা নো জ্যেষ্ঠঃ প্রথমো বি বোচতি ॥২॥

11.3

সো চিন্নু ভদ্রা ক্ষুমতী যশস্বত্যুষা উবাস মনবে স্বর্বতী ।
যদীমুশন্তমুশতামনু ক্রতুমগ্নিং হোতারং বিদথায় জীজনন্ ॥৩॥

11.4

অধ ত্যং দ্রপ্সং বিভ্বং বিচক্ষণং বিরাভরদিষিতঃ শ্যেনো অধ্বরে ।
যদী বিশো বৃণতে দস্মমার্যা অগ্নিং হোতারমধ ধীরজায়ত ॥৪॥

11.5

সদাসি রণ্বো যবসেব পুষ্যতে হোত্রাভিরগ্নে মনুষঃ স্বধ্বরঃ ।
বিপ্রস্য বা যচ্ছশমান উক্থ্যং১ বাজং সসবাঁ উপয়াসি ভূরিভিঃ ॥৫॥

11.6

উদীরয় পিতরা জার আ ভগমিয়ক্ষতি হর্যতো হৃত্ত ইষ্যতি ।
বিবক্তি বহ্নিঃ স্বপস্যতে মখস্তবিষ্যতে অসুরো বেপতে মতী ॥৬॥

11.7

যস্তে অগ্নে সুমতিং মর্তো অক্ষত্সহসঃ সূনো অতি স প্র শৃণ্বে ।
ইষং দধানো বহমানো অশ্বৈরা স দ্যুমাঁ অমবান্ভূষতি দ্যূন্ ॥৭॥

11.8

যদগ্ন এষা সমিতির্ভবাতি দেবী দেবেষু যজতা যজত্র ।
রত্না চ যদ্বিভজাসি স্বধাবো ভাগং নো অত্র বসুমন্তং বীতাৎ ॥৮॥

11.9

শ্রুধী নো অগ্নে সদনে সধস্থে যুক্ষ্বা রথমমৃতস্য দ্রবিত্নুম্ ।
আ নো বহ রোদসী দেবপুত্রে মাকির্দেবানামপ ভূরিহ স্যাঃ ॥৯॥