Sukta 11

11.1

9 angirhavirdhanah, agnih, jagati, 7-9 trishtup

वृषा॒ वृष्णे॑ दुदुहे॒ दोह॑सा दि॒वः पयां॑सि य॒ह्वो अदि॑ते॒रदा॑भ्यः ।
विश्वं॒ स वे॑द॒ वरु॑णो॒ यथा॑ धि॒या स य॒ज्ञियो॑ यजतु य॒ज्ञियाँ॑ ऋ॒तून् ॥१॥

Vrisha vrishne duduhe dohasa divah payansi yahvo aditeradabhyah
Vishvam sa veda varuno yatha dhiya sa yagyiyo yajatu yagyiyam ritun

11.2

रप॑द्गन्ध॒र्वीरप्या॑ च॒ योष॑णा न॒दस्य॑ ना॒दे परि॑ पातु मे॒ मन॑ः ।
इ॒ष्टस्य॒ मध्ये॒ अदि॑ति॒र्नि धा॑तु नो॒ भ्राता॑ नो ज्ये॒ष्ठः प्र॑थ॒मो वि वो॑चति ॥२॥

Rapadgandharvirapya cha yoshana nadasya nade pari patu me manah
Ishtasya madhye aditirni dhatu no bhrata no jyeshthah prathamo vi vochati

11.3

सो चि॒न्नु भ॒द्रा क्षु॒मती॒ यश॑स्वत्यु॒षा उ॑वास॒ मन॑वे॒ स्व॑र्वती ।
यदी॑मु॒शन्त॑मुश॒तामनु॒ क्रतु॑म॒ग्निं होता॑रं वि॒दथा॑य॒ जीज॑नन् ॥३॥

So chinnu bhadra kshumati yashasvatyusha uvasa manave svarvati
Yadimushantamushatamanu kratumagnim hotaram vidathaya jijanan

11.4

अध॒ त्यं द्र॒प्सं वि॒भ्वं॑ विचक्ष॒णं विराभ॑रदिषि॒तः श्ये॒नो अ॑ध्व॒रे ।
यदी॒ विशो॑ वृ॒णते॑ द॒स्ममार्या॑ अ॒ग्निं होता॑र॒मध॒ धीर॑जायत ॥४॥

Adha tyam drapsam vibhvam vichakshanam virabharadishitah shyeno adhvare
Yadi visho vrinate dasmamarya agnim hotaramadha dhirajayata

11.5

सदा॑सि र॒ण्वो यव॑सेव॒ पुष्य॑ते॒ होत्रा॑भिरग्ने॒ मनु॑षः स्वध्व॒रः ।
विप्र॑स्य वा॒ यच्छ॑शमा॒न उ॒क्थ्यं१ वाजं॑ सस॒वाँ उ॑प॒यासि॒ भूरि॑भिः ॥५॥

Sadasi ranvo yavaseva pushyate hotrabhiragne manushah svadhvarah
Viprasya va yachchhashamana ukthyan1 vajam sasavam upayasi bhuribhih

11.6

उदी॑रय पि॒तरा॑ जा॒र आ भग॒मिय॑क्षति हर्य॒तो हृ॒त्त इ॑ष्यति ।
विव॑क्ति॒ वह्नि॑ः स्वप॒स्यते॑ म॒खस्त॑वि॒ष्यते॒ असु॑रो॒ वेप॑ते म॒ती ॥६॥

Udiraya pitara jara a bhagamiyakshati haryato hritta ishyati
Vivakti vahnih svapasyate makhastavishyate asuro vepate mati

11.7

यस्ते॑ अग्ने सुम॒तिं मर्तो॒ अक्ष॒त्सह॑सः सूनो॒ अति॒ स प्र शृ॑ण्वे ।
इषं॒ दधा॑नो॒ वह॑मानो॒ अश्वै॒रा स द्यु॒माँ अम॑वान्भूषति॒ द्यून् ॥७॥

Yaste agne sumatim marto akshatsahasah suno ati sa pra shrinve
Isham dadhano vahamano ashvaira sa dyumam amavanbhushati dyun

11.8

यद॑ग्न ए॒षा समि॑ति॒र्भवा॑ति दे॒वी दे॒वेषु॑ यज॒ता य॑जत्र ।
रत्ना॑ च॒ यद्वि॒भजा॑सि स्वधावो भा॒गं नो॒ अत्र॒ वसु॑मन्तं वीतात् ॥८॥

Yadagna esha samitirbhavati devi deveshu yajata yajatra
Ratna cha yadvibhajasi svadhavo bhagam no atra vasumantam vitat

11.9

श्रु॒धी नो॑ अग्ने॒ सद॑ने स॒धस्थे॑ यु॒क्ष्वा रथ॑म॒मृत॑स्य द्रवि॒त्नुम् ।
आ नो॑ वह॒ रोद॑सी दे॒वपु॑त्रे॒ माकि॑र्दे॒वाना॒मप॑ भूरि॒ह स्या॑ः ॥९॥

Shrudhi no agne sadane sadhasthe yukshva rathamamritasya dravitnum
A no vaha rodasi devaputre makirdevanamapa bhuriha syah