সূক্ত 108

108.1

১১ পণয়োঽসুরাঃ। সরমা দেবতা। ২,৪,৬,৮,১০-১১ সরমা দেবশুনী ঋষিকা। পণয়ো দেবতা। ত্রিষ্টুপ্।

কিমিচ্ছন্তী সরমা প্রেদমানড্দূরে হ্যধ্বা জগুরিঃ পরাচৈঃ ।
কাস্মেহিতিঃ কা পরিতক্ম্যাসীত্কথং রসায়া অতরঃ পয়াংসি ॥১॥

ইন্দ্রস্য দূতীরিষিতা চরামি মহ ইচ্ছন্তী পণয়ো নিধীন্বঃ ।
অতিষ্কদো ভিয়সা তন্ন আবত্তথা রসায়া অতরং পয়াংসি ॥২॥

কীদৃঙ্ঙিন্দ্রঃ সরমে কা দৃশীকা যস্যেদং দূতীরসরঃ পরাকাৎ ।
আ চ গচ্ছান্মিত্রমেনা দধামাঽথা গবাং গোপতির্নো ভবাতি ॥৩॥

নাহং তং বেদ দভ্যং দভত্স যস্যেদং দূতীরসরং পরাকাৎ ।
ন তং গূহন্তি স্রবতো গভীরা হতা ইন্দ্রেণ পণয়ঃ শয়ধ্বে ॥৪॥

ইমা গাবঃ সরমে যা ঐচ্ছঃ পরি দিবো অন্তান্ত্সুভগে পতন্তী ।
কস্ত এনা অব সৃজাদয়ুধ্ব্যুতাস্মাকমায়ুধা সন্তি তিগ্মা ॥৫॥

অসেন্যা বঃ পণয়ো বচাংস্যনিষব্যাস্তন্বঃ সন্তু পাপীঃ ।
অধৃষ্টো ব এতবা অস্তু পন্থা বৃহস্পতির্ব উভয়া ন মৃলাৎ ॥৬॥

অয়ং নিধিঃ সরমে অদ্রিবুধ্নো গোভিরশ্বেভির্বসুভির্ন্যৃষ্টঃ ।
রক্ষন্তি তং পণয়ো যে সুগোপা রেকু পদমলকমা জগন্থ ॥৭॥

এহ গমন্নৃষয়ঃ সোমশিতা অয়াস্যো অঙ্গিরসো নবগ্বাঃ ।
ত এতমূর্বং বি ভজন্ত গোনামথৈতদ্বচঃ পণয়ো বমন্নিৎ ॥৮॥

এবা চ ত্বং সরম আজগন্থ প্রবাধিতা সহসা দৈব্যেন ।
স্বসারং ত্বা কৃণবৈ মা পুনর্গা অপ তে গবাং সুভগে ভজাম ॥৯॥

নাহং বেদ ভ্রাতৃত্বং নো স্বসৃত্বমিন্দ্রো বিদুরঙ্গিরসশ্চ ঘোরাঃ ।
গোকামা মে অচ্ছদয়ন্যদায়মপাত ইত পণয়ো বরীয়ঃ ॥১০॥

দূরমিত পণয়ো বরীয় উদ্গাবো যন্তু মিনতীৠতেন ।
বৃহস্পতির্যা অবিন্দন্নিগূল্হাঃ সোমো গ্রাবাণ ঋষয়শ্চ বিপ্রাঃ ॥১১॥