Sukta 108

108.1

11 panayosurah, sarama devata, 2, 4, 6, 8, 10-11 sarama devashuni rishika, panayo devata, trishtup

किमि॒च्छन्ती॑ स॒रमा॒ प्रेदमा॑नड्दू॒रे ह्यध्वा॒ जगु॑रिः परा॒चैः ।
कास्मेहि॑ति॒ः का परि॑तक्म्यासीत्क॒थं र॒साया॑ अतर॒ः पयां॑सि ॥१॥

Kimichchhanti sarama predamanaddure hyadhva jagurih parachaih
Kasmehitih ka paritakmyasitkatham rasaya atarah payansi

इन्द्र॑स्य दू॒तीरि॑षि॒ता च॑रामि म॒ह इ॒च्छन्ती॑ पणयो नि॒धीन्व॑ः ।
अ॒ति॒ष्कदो॑ भि॒यसा॒ तन्न॑ आव॒त्तथा॑ र॒साया॑ अतरं॒ पयां॑सि ॥२॥

Indrasya dutirishita charami maha ichchhanti panayo nidhinvah
Atishkado bhiyasa tanna avattatha rasaya ataram payansi

की॒दृङ्ङिन्द्र॑ः सरमे॒ का दृ॑शी॒का यस्ये॒दं दू॒तीरस॑रः परा॒कात् ।
आ च॒ गच्छा॑न्मि॒त्रमे॑ना दधा॒माऽथा॒ गवां॒ गोप॑तिर्नो भवाति ॥३॥

Kidrinngindrah sarame ka drishika yasyedam dutirasarah parakat
A cha gachchhanmitramena dadhamatha gavam gopatirno bhavati

नाहं तं वे॑द॒ दभ्यं॒ दभ॒त्स यस्ये॒दं दू॒तीरस॑रं परा॒कात् ।
न तं गू॑हन्ति स्र॒वतो॑ गभी॒रा ह॒ता इन्द्रे॑ण पणयः शयध्वे ॥४॥

Naham tam veda dabhyam dabhatsa yasyedam dutirasaram parakat
Na tam guhanti sravato gabhira hata indrena panayah shayadhve

इ॒मा गाव॑ः सरमे॒ या ऐच्छ॒ः परि॑ दि॒वो अन्ता॑न्त्सुभगे॒ पत॑न्ती ।
कस्त॑ एना॒ अव॑ सृजा॒दयु॑ध्व्यु॒तास्माक॒मायु॑धा सन्ति ति॒ग्मा ॥५॥

Ima gavah sarame ya aichchhah pari divo antantsubhage patanti
Kasta ena ava srijadayudhvyutasmakamayudha santi tigma

अ॒से॒न्या व॑ः पणयो॒ वचां॑स्यनिष॒व्यास्त॒न्व॑ः सन्तु पा॒पीः ।
अधृ॑ष्टो व॒ एत॒वा अ॑स्तु॒ पन्था॒ बृह॒स्पति॑र्व उभ॒या न मृ॑ळात् ॥६॥

Asenya vah panayo vachansyanishavyastanvah santu papih
Adhrishto va etava astu pantha brihaspatirva ubhaya na mrilat

अ॒यं नि॒धिः स॑रमे॒ अद्रि॑बुध्नो॒ गोभि॒रश्वे॑भि॒र्वसु॑भि॒र्न्यृ॑ष्टः ।
रक्ष॑न्ति॒ तं प॒णयो॒ ये सु॑गो॒पा रेकु॑ प॒दमल॑क॒मा ज॑गन्थ ॥७॥

Ayam nidhih sarame adribudhno gobhirashvebhirvasubhirnyrishtah
Rakshanti tam panayo ye sugopa reku padamalakama jagantha

एह ग॑म॒न्नृष॑य॒ः सोम॑शिता अ॒यास्यो॒ अङ्गि॑रसो॒ नव॑ग्वाः ।
त ए॒तमू॒र्वं वि भ॑जन्त॒ गोना॒मथै॒तद्वच॑ः प॒णयो॒ वम॒न्नित् ॥८॥

Eha gamannrishayah somashita ayasyo angiraso navagvah
Ta etamurvam vi bhajanta gonamathaitadvachah panayo vamannit

ए॒वा च॒ त्वं स॑रम आज॒गन्थ॒ प्रबा॑धिता॒ सह॑सा॒ दैव्ये॑न ।
स्वसा॑रं त्वा कृणवै॒ मा पुन॑र्गा॒ अप॑ ते॒ गवां॑ सुभगे भजाम ॥९॥

Eva cha tvam sarama ajagantha prabadhita sahasa daivyena
Svasaram tva krinavai ma punarga apa te gavam subhage bhajama

नाहं वे॑द भ्रातृ॒त्वं नो स्व॑सृ॒त्वमिन्द्रो॑ विदु॒रङ्गि॑रसश्च घो॒राः ।
गोका॑मा मे अच्छदय॒न्यदाय॒मपात॑ इत पणयो॒ वरी॑यः ॥१०॥

Naham veda bhratritvam no svasritvamindro vidurangirasashcha ghorah
Gokama me achchhadayanyadayamapata ita panayo variyah

दू॒रमि॑त पणयो॒ वरी॑य॒ उद्गावो॑ यन्तु मिन॒तीॠ॒तेन॑ ।
बृह॒स्पति॒र्या अवि॑न्द॒न्निगू॑ळ्हा॒ः सोमो॒ ग्रावा॑ण॒ ऋष॑यश्च॒ विप्रा॑ः ॥११॥

Duramita panayo variya udgavo yantu minatiritena
Brihaspatirya avindannigulhah somo gravana rishayashcha viprah