সূক্ত 105

105.1

১১ কৌত্সো দুর্মিত্রঃ সুমিত্রো বা। ইন্দ্রঃ। উষ্ণিক্, ১ গায়ত্রী বা ২,৭ পিপীলিকমধ্যা, ১১ ত্রিষ্টুপ্ ।

কদা বসো স্তোত্রং হর্যত আব শ্মশা রুধদ্বাঃ । দীর্ঘং সুতং বাতাপ্যায় ॥১॥

105.2

হরী যস্য সুয়ুজা বিব্রতা বেরর্বন্তানু শেপা । উভা রজী ন কেশিনা পতির্দন্ ॥২॥

105.3

অপ যোরিন্দ্রঃ পাপজ আ মর্তো ন শশ্রমাণো বিভীবান্ । শুভে যদ্যুয়ুজে তবিষীবান্ ॥৩॥

105.4

সচায়োরিন্দ্রশ্চর্কৃষ আঁ উপানসঃ সপর্যন্ । নদয়োর্বিব্রতয়োঃ শূর ইন্দ্রঃ ॥৪॥

105.5

অধি যস্তস্থৌ কেশবন্তা ব্যচস্বন্তা ন পুষ্ট্যৈ । বনোতি শিপ্রাভ্যাং শিপ্রিণীবান্ ॥৫॥

105.6

প্রাস্তৌদৃষ্বৌজা ঋষ্বেভিস্ততক্ষ শূরঃ শবসা । ঋভুর্ন ক্রতুভির্মাতরিশ্বা ॥৬॥

105.7

বজ্রং যশ্চক্রে সুহনায় দস্যবে হিরীমশো হিরীমান্ । অরুতহনুরদ্ভুতং ন রজঃ ॥৭॥

105.8

অব নো বৃজিনা শিশীহ্যৃচা বনেমানৃচঃ । নাব্রহ্মা যজ্ঞ ঋধগ্জোষতি ত্বে ॥৮॥

105.9

ঊর্ধ্বা যত্তে ত্রেতিনী ভূদ্যজ্ঞস্য ধূর্ষু সদ্মন্ । সজূর্নাবং স্বয়শসং সচায়োঃ ॥৯॥

105.10

শ্রিয়ে তে পৃশ্নিরুপসেচনী ভূচ্ছ্রিয়ে দর্বিররেপাঃ । যয়া স্বে পাত্রে সিঞ্চস উৎ ॥১০॥

105.11

শতং বা যদসুর্য প্রতি ত্বা সুমিত্র ইত্থাস্তৌদ্দুর্মিত্র ইত্থাস্তৌৎ ।
আবো যদ্দস্যুহত্যে কুত্সপুত্রং প্রাবো যদ্দস্যুহত্যে কুত্সবত্সম্ ॥১১॥