সূক্ত 85

85.1

১২ গোতমো রাহূগণঃ। মরুতঃ। জগতী, ৫, ১২ ত্রিষ্টুপ্।

প্র যে শুম্ভন্তে জনয়ো ন সপ্তয়ো যামন্ রুদ্রস্য সূনবঃ সুদংসসঃ ।
রোদসী হি মরুতশ্চক্রিরে বৃধে মদন্তি বীরা বিদথেষু ঘৃষ্বয়ঃ ॥১॥

ত উক্ষিতাসো মহিমানমাশত দিবি রুদ্রাসো অধি চক্রিরে সদঃ ।
অর্চন্তো অর্কং জনয়ন্ত ইন্দ্রিয়মধি শ্রিয়ো দধিরে পৃশ্নিমাতরঃ ॥২॥

গোমাতরো যচ্ছুভয়ন্তে অঞ্জিভিস্তনূষু শুভ্রা দধিরে বিরুক্মতঃ ।
বাধন্তে বিশ্বমভিমাতিনমপ বর্ত্মান্যেষামনু রীয়তে ঘৃতম্ ॥৩॥

বি যে ভ্রাজন্তে সুমখাস ঋষ্টিভিঃ প্রচ্যাবয়ন্তো অচ্যুতা চিদোজসা ।
মনোজুবো যন্মরুতো রথেষ্বা বৃষব্রাতাসঃ পৃষতীরয়ুগ্ধ্বম্ ॥৪॥

প্র যদ্ রথেষু পৃষতীরয়ুগ্ধ্বং বাজে অদ্রিং মরুতো রংহয়ন্তঃ ।
উতারুষস্য বি ষ্যন্তি ধারাশ্চর্মেবোদভির্ব্যুন্দন্তি ভূম ॥৫॥

আ বো বহন্তু সপ্তয়ো রঘুষ্যদো রঘুপত্বানঃ প্র জিগাত বাহুভিঃ ।
সীদতা বর্হিরুরু বঃ সদস্কৃতং মাদয়ধ্বং মরুতো মধ্বো অন্ধসঃ ॥৬॥

তেঽবর্ধন্ত স্বতবসো মহিত্বনা নাকং তস্থুরুরু চক্রিরে সদঃ ।
বিষ্ণুর্যদ্ধাবদ্বৃষণং মদচ্যুতং বয়ো ন সীদন্নধি বর্হিষি প্রিয়ে ॥৭॥

শূরা ইবেদ্যু যুয়ুধয়ো ন জগ্ময়ঃ শ্রবস্যবো ন পৃতনাসু যেতিরে ।
ভয়ন্তে বিশ্বা ভুবনা মরুদ্ভ্যো রাজান ইব ত্বেষসংদৃশো নরঃ ॥৮॥

ত্বষ্টা যদ্ বজ্রং সুকৃতং হিরণ্যয়ং সহস্রভৃষ্টিং স্বপা অবর্তয়ৎ ।
ধত্ত ইন্দ্রো নর্যপাংসি কর্তবে ঽহন্ বৃত্রং নিরপামৌব্জদর্ণবম্ ॥৯॥

ঊর্ধ্বং নুনুদ্রেঽবতং ত ওজসা দাদৃহাণং চিদ্ বিভিদুর্বি পর্বতম্ ।
ধমন্তো বাণং মরুতঃ সুদানবো মদে সোমস্য রণ্যানি চক্রিরে ॥১০॥

জিহ্মং নুনুদ্রেঽবতং তয়া দিশাসিঞ্চন্নুত্সং গোতমায় তৃষ্ণজে ।
আ গচ্ছন্তীমবসা চিত্রভানবঃ কামং বিপ্রস্য তর্পয়ন্ত ধামভিঃ ॥১১॥

যা বঃ শর্ম শশমানায় সন্তি ত্রিধাতূনি দাশুষে যচ্ছতাধি ।
অস্মভ্যং তানি মরুতো বি যন্ত রয়িং নো ধত্ত বৃষণঃ সুবীরম্ ॥১২॥