সূক্ত 84

84.1

২০ গোতমো রাহূগণঃ। ইন্দ্রঃ। ১-৬ অনুষ্টপ্, ৭-৯ উষ্ণিক্, ১০-১২ পংক্তিঃ, ১৩-১৫গায়ত্রী, ১৬-১৮ ত্রিষ্টুপ্(প্রগা থঃ-) ১৯ বৃহতী, ২০ সতোবৃহতী।

অসাবি সোম ইন্দ্র তে শবিষ্ঠ ধৃষ্ণবা গহি ।
আ ত্বা পৃণক্ত্বিন্দ্রিয়ং রজঃ সূর্যো ন রশ্মিভিঃ ॥১॥

ইন্দ্রমিদ্ধরী বহতো ঽপ্রতিধৃষ্টশবসম্ ।
ঋষীণাং চ স্তুতীরুপ যজ্ঞং চ মানুষাণাম্ ॥২॥

আ তিষ্ঠ বৃত্রহন্ রথং যুক্তা তে ব্রহ্মণা হরী ।
অর্বাচীনং সু তে মনো গ্রাবা কৃণোতু বগ্নুনা ॥৩॥

ইমমিন্দ্র সুতং পিব জ্যেষ্ঠমমর্ত্যং মদম্ ।
শুক্রস্য ত্বাভ্যক্ষরন্ ধারা ঋতস্য সাদনে ॥৪॥

ইন্দ্রায় নূনমর্চতোক্থানি চ ব্রবীতন ।
সুতা অমত্সুরিন্দবো জ্যেষ্ঠং নমস্যতা সহঃ ॥৫॥

নকিষ্ট্বদ্ রথীতরো হরী যদিন্দ্র যচ্ছসে ।
নকিষ্ট্বানু মজ্মনা নকিঃ স্বশ্ব আনশে ॥৬॥

য এক ইদ্ বিদয়তে বসু মর্তায় দাশুষে ।
ঈশানো অপ্রতিষ্কুত ইন্দ্রো অঙ্গ ॥৭॥

কদা মর্তমরাধসং পদা ক্ষুম্পমিব স্ফুরৎ ।
কদা নঃ শুশ্রবদ্ গির ইন্দ্রো অঙ্গ ॥৮॥

যশ্চিদ্ধি ত্বা বহুভ্য আ সুতাবাঁ আবিবাসতি ।
উগ্রং তৎ পত্যতে শব ইন্দ্রো অঙ্গ ॥৯॥

স্বাদোরিত্থা বিষূবতো মধ্বঃ পিবন্তি গৌর্যঃ ।
যা ইন্দ্রেণ সয়াবরীর্বৃষ্ণা মদন্তি শোভসে বস্বীরনু স্বরাজ্যম্ ॥১০॥

তা অস্য পৃশনায়ুবঃ সোমং শ্রীণন্তি পৃশ্নয়ঃ ।
প্রিয়া ইন্দ্রস্য ধেনবো বজ্রং হিন্বন্তি সায়কং বস্বীরনু স্বরাজ্যম্ ॥১১॥

তা অস্য নমসা সহঃ সপর্যন্তি প্রচেতসঃ ।
ব্রতান্যস্য সশ্চিরে পুরূণি পূর্বচিত্তয়ে বস্বীরনু স্বরাজ্যম্ ॥১২॥

ইন্দ্রো দধীচো অস্থভির্বৃত্রাণ্যপ্রতিষ্কুতঃ । জঘান নবতীর্নব ॥১৩॥

ইচ্ছন্নশ্বস্য যচ্ছিরঃ পর্বতেষ্বপশ্রিতম্ । তদ্ বিদচ্ছর্যণাবতি ॥১৪॥

অত্রাহ গোরমন্বত নাম ত্বষ্টুরপীচ্যম্ । ইত্থা চন্দ্রমসো গৃহে ॥১৫॥

কো অদ্য যুঙ্ক্তে ধুরি গা ঋতস্য শিমীবতো ভামিনো দুর্হৃণায়ূন্ ।
আসন্নিষূন্ হৃত্স্বসো ময়োভূন্ য এষাং ভৃত্যামৃণধৎ স জীবাৎ ॥১৬॥

ক ঈষতে তুজ্যতে কো বিভায় কো মংসতে সন্তমিন্দ্রং কো অন্তি ।
কস্তোকায় ক ইভায়োত রায়ে ঽধি ব্রবৎ তন্বে ৩ কো জনায় ॥১৭॥

কো অগ্নিমীট্টে হবিষা ঘৃতেন স্রুচা যজাতা ঋতুভির্ধ্রুবেভিঃ ।
কস্মৈ দেবা আ বহানাশু হোম কো মংসতে বীতিহোত্রঃ সুদেবঃ ॥১৮॥

ত্বমঙ্গ প্র শংসিষো দেবঃ শবিষ্ঠ মর্ত্যম্ ।
ন ত্বদন্যো মঘবন্নস্তি মর্ডিতেন্দ্র ব্রবীমি তে বচঃ ॥১৯॥

মা তে রাধাংসি মা ত ঊতয়ো বসো ঽস্মান্ কদা চনা দভন্ ।
বিশ্বা চ ন উপমিমীহি মানুষ বসূনি চর্ষণিভ্য আ ॥২০॥