Sukta 84

84.1

20 gotamo rahuganah, indrah, 1-6 anushtap, 7-9 ushnik, 10-12 panktih, 13-15gayatri, 16-18 trishtup(praga thah-) 19 brihati, 20 satobrihati

असा॑वि॒ सोम॑ इन्द्र ते॒ शवि॑ष्ठ धृष्ण॒वा ग॑हि ।
आ त्वा॑ पृणक्त्विन्द्रि॒यं रज॒ः सूर्यो॒ न र॒श्मिभि॑ः ॥१॥

Asavi soma indra te shavishtha dhrishnava gahi
A tva prinaktvindriyam rajah suryo na rashmibhih

84.2

इन्द्र॒मिद्धरी॑ वह॒तो ऽप्र॑तिधृष्टशवसम् ।
ऋषी॑णां च स्तु॒तीरुप॑ य॒ज्ञं च॒ मानु॑षाणाम् ॥२॥

Indramiddhari vahato pratidhrishtashavasam
Rishinam cha stutirupa yagyam cha manushanam

84.3

आ ति॑ष्ठ वृत्रह॒न् रथं॑ यु॒क्ता ते॒ ब्रह्म॑णा॒ हरी॑ ।
अ॒र्वा॒चीनं॒ सु ते॒ मनो॒ ग्रावा॑ कृणोतु व॒ग्नुना॑ ॥३॥

A tishtha vritrahan ratham yukta te brahmana hari
Arvachinam su te mano grava krinotu vagnuna

84.4

इ॒ममि॑न्द्र सु॒तं पि॑ब॒ ज्येष्ठ॒मम॑र्त्यं॒ मद॑म् ।
शु॒क्रस्य॑ त्वा॒भ्य॑क्षर॒न् धारा॑ ऋ॒तस्य॒ साद॑ने ॥४॥

Imamindra sutam piba jyeshthamamartyam madam
Shukrasya tvabhyaksharan dhara ritasya sadane

84.5

इन्द्रा॑य नू॒नम॑र्चतो॒क्थानि॑ च ब्रवीतन ।
सु॒ता अ॑मत्सु॒रिन्द॑वो॒ ज्येष्ठं॑ नमस्यता॒ सह॑ः ॥५॥

Indraya nunamarchatokthani cha bravitana
Suta amatsurindavo jyeshtham namasyata sahah

84.6

नकि॒ष्ट्वद् र॒थीत॑रो॒ हरी॒ यदि॑न्द्र॒ यच्छ॑से ।
नकि॒ष्ट्वानु॑ म॒ज्मना॒ नकि॒ः स्वश्व॑ आनशे ॥६॥

Nakishtvad rathitaro hari yadindra yachchhase
Nakishtvanu majmana nakih svashva anashe

84.7

य एक॒ इद् वि॒दय॑ते॒ वसु॒ मर्ता॑य दा॒शुषे॑ ।
ईशा॑नो॒ अप्र॑तिष्कुत॒ इन्द्रो॑ अ॒ङ्ग ॥७॥

Ya eka id vidayate vasu martaya dashushe
Ishano apratishkuta indro anga

84.8

क॒दा मर्त॑मरा॒धसं॑ प॒दा क्षुम्प॑मिव स्फुरत् ।
क॒दा न॑ः शुश्रव॒द् गिर॒ इन्द्रो॑ अ॒ङ्ग ॥८॥

Kada martamaradhasam pada kshumpamiva sphurat
Kada nah shushravad gira indro anga

84.9

यश्चि॒द्धि त्वा॑ ब॒हुभ्य॒ आ सु॒तावाँ॑ आ॒विवा॑सति ।
उ॒ग्रं तत् प॑त्यते॒ शव॒ इन्द्रो॑ अ॒ङ्ग ॥९॥

Yashchiddhi tva bahubhya a sutavam avivasati
Ugram tat patyate shava indro anga

84.10

स्वा॒दोरि॒त्था वि॑षू॒वतो॒ मध्व॑ः पिबन्ति गौ॒र्य॑ः ।
या इन्द्रे॑ण स॒याव॑री॒र्वृष्णा॒ मद॑न्ति शो॒भसे॒ वस्वी॒रनु॑ स्व॒राज्य॑म् ॥१०॥

Svadorittha vishuvato madhvah pibanti gauryah
Ya indrena sayavarirvrishna madanti shobhase vasviranu svarajyam

84.11

ता अ॑स्य पृशना॒युव॒ः सोमं॑ श्रीणन्ति॒ पृश्न॑यः ।
प्रि॒या इन्द्र॑स्य धे॒नवो॒ वज्रं॑ हिन्वन्ति॒ साय॑कं॒ वस्वी॒रनु॑ स्व॒राज्य॑म् ॥११॥

Ta asya prishanayuvah somam shrinanti prishnayah
Priya indrasya dhenavo vajram hinvanti sayakam vasviranu svarajyam

84.12

ता अ॑स्य॒ नम॑सा॒ सह॑ः सप॒र्यन्ति॒ प्रचे॑तसः ।
व्र॒तान्य॑स्य सश्चिरे पु॒रूणि॑ पू॒र्वचि॑त्तये॒ वस्वी॒रनु॑ स्व॒राज्य॑म् ॥१२॥

Ta asya namasa sahah saparyanti prachetasah
Vratanyasya sashchire puruni purvachittaye vasviranu svarajyam

84.13

इन्द्रो॑ दधी॒चो अ॒स्थभि॑र्वृ॒त्राण्यप्र॑तिष्कुतः । ज॒घान॑ नव॒तीर्नव॑ ॥१३॥

Indro dadhicho asthabhirvritranyapratishkutah, jaghana navatirnava

84.14

इ॒च्छन्नश्व॑स्य॒ यच्छिर॒ः पर्व॑ते॒ष्वप॑श्रितम् । तद् वि॑दच्छर्य॒णाव॑ति ॥१४॥

Ichchhannashvasya yachchhirah parvateshvapashritam, tad vidachchharyanavati

84.15

अत्राह॒ गोर॑मन्वत॒ नाम॒ त्वष्टु॑रपी॒च्य॑म् । इ॒त्था च॒न्द्रम॑सो गृ॒हे ॥१५॥

Atraha goramanvata nama tvashturapichyam, ittha chandramaso grihe

84.16

को अ॒द्य यु॑ङ्क्ते धु॒रि गा ऋ॒तस्य॒ शिमी॑वतो भा॒मिनो॑ दुर्हृणा॒यून् ।
आ॒सन्नि॑षून् हृ॒त्स्वसो॑ मयो॒भून् य ए॑षां भृ॒त्यामृ॒णध॒त् स जी॑वात् ॥१६॥

Ko adya yunkte dhuri ga ritasya shimivato bhamino durhrinayun
Asannishun hritsvaso mayobhun ya esham bhrityamrinadhat sa jivat

84.17

क ई॑षते तु॒ज्यते॒ को बि॑भाय॒ को मं॑सते॒ सन्त॒मिन्द्रं॒ को अन्ति॑ ।
कस्तो॒काय॒ क इभा॑यो॒त रा॒ये ऽधि॑ ब्रवत् त॒न्वे॒ ३ को जना॑य ॥१७॥

Ka ishate tujyate ko bibhaya ko mansate santamindram ko anti
Kastokaya ka ibhayota raye dhi bravat tanve 3 ko janaya

84.18

को अ॒ग्निमी॑ट्टे ह॒विषा॑ घृ॒तेन॑ स्रु॒चा य॑जाता ऋ॒तुभि॑र्ध्रु॒वेभि॑ः ।
कस्मै॑ दे॒वा आ व॑हाना॒शु होम॒ को मं॑सते वी॒तिहो॑त्रः सुदे॒वः ॥१८॥

Ko agnimitte havisha ghritena srucha yajata ritubhirdhruvebhih
Kasmai deva a vahanashu homa ko mansate vitihotrah sudevah

84.19

त्वम॒ङ्ग प्र शं॑सिषो दे॒वः श॑विष्ठ॒ मर्त्य॑म् ।
न त्वद॒न्यो म॑घवन्नस्ति मर्डि॒तेन्द्र॒ ब्रवी॑मि ते॒ वच॑ः ॥१९॥

Tvamanga pra shansisho devah shavishtha martyam
Na tvadanyo maghavannasti marditendra bravimi te vachah

84.20

मा ते॒ राधां॑सि॒ मा त॑ ऊ॒तयो॑ वसो॒ ऽस्मान् कदा॑ च॒ना द॑भन् ।
विश्वा॑ च न उपमिमी॒हि मा॑नुष॒ वसू॑नि चर्ष॒णिभ्य॒ आ ॥२०॥

Ma te radhansi ma ta utayo vaso sman kada chana dabhan
Vishva cha na upamimihi manusha vasuni charshanibhya a