সূক্ত 71

71.1

১০ পরাশরঃ শাক্ত্যঃ। অগ্নিঃ। ত্রিষ্টুপ্।

উপ প্র জিন্বন্নুশতীরুশন্তং পতিং ন নিত্যং জনয়ঃ সনীলাঃ ।
স্বসারঃ শ্যাবীমরুষীমজুষ্রঞ্ চিত্রমুচ্ছন্তীমুষসং ন গাবঃ ॥১॥

71.2

বীলু চিদ্ দৃহ্লা পিতরো ন উক্থৈরদ্রিং রুজন্নঙ্গিরসো রবেণ ।
চক্রুর্দিবো বৃহতো গাতুমস্মে অহঃ স্বর্বিবিদুঃ কেতুমুস্রাঃ ॥২॥

71.3

দধন্নৃতং ধনয়ন্নস্য ধীতিমাদিদর্যো দিধিষ্বো ৩ বিভৃত্রাঃ ।
অতৃষ্যন্তীরপসো যন্ত্যচ্ছা দেবাঞ্জন্ম প্রয়সা বর্ধয়ন্তীঃ ॥৩॥

71.4

মথীদ্ যদীং বিভৃতো মাতরিশ্বা গৃহেগৃহে শ্যেতো জেন্যো ভূৎ ।
আদীং রাজ্ঞে ন সহীয়সে সচা সন্না দূত্যং ১ ভৃগবাণো বিবায় ॥৪॥

71.5

মহে যৎ পিত্র ঈং রসং দিবে করব ত্সরৎ পৃশন্যশ্চিকিত্বান্ ।
সৃজদস্তা ধৃষতা দিদ্যুমস্মৈ স্বায়াং দেবো দুহিতরি ত্বিষিং ধাৎ ॥৫॥

71.6

স্ব আ যস্তুভ্যং দম আ বিভাতি নমো বা দাশাদুশতো অনু দ্যূন্ ।
বর্ধো অগ্নে বয়ো অস্য দ্বিবর্হা যাসদ্ রায়া সরথং যং জুনাসি ॥৬॥

71.7

অগ্নিং বিশ্বা অভি পৃক্ষঃ সচন্তে সমুদ্রং ন স্রবতঃ সপ্ত যহ্বীঃ ।
ন জামিভির্বি চিকিতে বয়ো নো বিদা দেবেষু প্রমতিং চিকিত্বান্ ॥৭॥

71.8

আ যদিষে নৃপতিং তেজ আনট্ ছুচি রেতো নিষিক্তং দ্যৌরভীকে ।
অগ্নিঃ শর্ধমনবদ্যং যুবানং স্বাধ্যং জনয়ৎ সূদয়চ্চ ॥৮॥

71.9

মনো ন যোঽধ্বনঃ সদ্য এত্যেকঃ সত্রা সূরো বস্ব ঈশে ।
রাজানা মিত্রাবরুণা সুপাণী গোষু প্রিয়মমৃতং রক্ষমাণা ॥৯॥

71.10

মা নো অগ্নে সখ্যা পিত্র্যাণি প্র মর্ষিষ্ঠা অভি বিদুষ্কবিঃ সন্ ।
নভো ন রূপং জরিমা মিনাতি পুরা তস্যা অভিশস্তেরধীহি ॥১০॥