Sukta 71

71.1

10 parasharah shaktyah, agnih, trishtup

उप॒ प्र जि॑न्वन्नुश॒तीरु॒शन्तं॒ पतिं॒ न नित्यं॒ जन॑य॒ः सनी॑ळाः ।
स्वसा॑र॒ः श्यावी॒मरु॑षीमजुष्रञ् चि॒त्रमु॒च्छन्ती॑मु॒षसं॒ न गाव॑ः ॥१॥

Upa pra jinvannushatirushantam patim na nityam janayah sanilah
Svasarah shyavimarushimajushrany chitramuchchhantimushasam na gavah

71.2

वी॒ळु चि॑द् दृ॒ह्ला पि॒तरो॑ न उ॒क्थैरद्रिं॑ रुज॒न्नङ्गि॑रसो॒ रवे॑ण ।
च॒क्रुर्दि॒वो बृ॑ह॒तो गा॒तुम॒स्मे अह॒ः स्व॑र्विविदुः के॒तुमु॒स्राः ॥२॥

Vilu chid drihla pitaro na ukthairadrim rujannangiraso ravena
Chakrurdivo brihato gatumasme ahah svarvividuh ketumusrah

71.3

दध॑न्नृ॒तं ध॒नय॑न्नस्य धी॒तिमादिद॒र्यो दि॑धि॒ष्वो॒ ३ विभृ॑त्राः ।
अतृ॑ष्यन्तीर॒पसो॑ य॒न्त्यच्छा॑ दे॒वाञ्जन्म॒ प्रय॑सा व॒र्धय॑न्तीः ॥३॥

Dadhannritam dhanayannasya dhitimadidaryo didhishvo 3 vibhritrah
Atrishyantirapaso yantyachchha devanjanma prayasa vardhayantih

71.4

मथी॒द् यदीं॒ विभृ॑तो मात॒रिश्वा॑ गृ॒हेगृ॑हे श्ये॒तो जेन्यो॒ भूत् ।
आदीं॒ राज्ञे॒ न सही॑यसे॒ सचा॒ सन्ना दू॒त्यं १ भृग॑वाणो विवाय ॥४॥

Mathid yadim vibhrito matarishva grihegrihe shyeto jenyo bhut
Adim ragye na sahiyase sacha sanna dutyam 1 bhrigavano vivaya

71.5

म॒हे यत् पि॒त्र ईं॒ रसं॑ दि॒वे करव॑ त्सरत् पृश॒न्य॑श्चिकि॒त्वान् ।
सृ॒जदस्ता॑ धृष॒ता दि॒द्युम॑स्मै॒ स्वायां॑ दे॒वो दु॑हि॒तरि॒ त्विषिं॑ धात् ॥५॥

Mahe yat pitra im rasam dive karava tsarat prishanyashchikitvan
Srijadasta dhrishata didyumasmai svayam devo duhitari tvishim dhat

71.6

स्व आ यस्तुभ्यं॒ दम॒ आ वि॒भाति॒ नमो॑ वा॒ दाशा॑दुश॒तो अनु॒ द्यून् ।
वर्धो॑ अग्ने॒ वयो॑ अस्य द्वि॒बर्हा॒ यास॑द् रा॒या स॒रथं॒ यं जु॒नासि॑ ॥६॥

Sva a yastubhyam dama a vibhati namo va dashadushato anu dyun
Vardho agne vayo asya dvibarha yasad raya saratham yam junasi

71.7

अ॒ग्निं विश्वा॑ अ॒भि पृक्ष॑ः सचन्ते समु॒द्रं न स्र॒वत॑ः स॒प्त य॒ह्वीः ।
न जा॒मिभि॒र्वि चि॑किते॒ वयो॑ नो वि॒दा दे॒वेषु॒ प्रम॑तिं चिकि॒त्वान् ॥७॥

Agnim vishva abhi prikshah sachante samudram na sravatah sapta yahvih
Na jamibhirvi chikite vayo no vida deveshu pramatim chikitvan

71.8

आ यदि॒षे नृ॒पतिं॒ तेज॒ आन॒ट् छुचि॒ रेतो॒ निषि॑क्तं॒ द्यौर॒भीके॑ ।
अ॒ग्निः शर्ध॑मनव॒द्यं युवा॑नं स्वा॒ध्यं॑ जनयत् सू॒दय॑च्च ॥८॥

A yadishe nripatim teja anat chhuchi reto nishiktam dyaurabhike
Agnih shardhamanavadyam yuvanam svadhyam janayat sudayachcha

71.9

मनो॒ न योऽध्व॑नः स॒द्य एत्येक॑ः स॒त्रा सूरो॒ वस्व॑ ईशे ।
राजा॑ना मि॒त्रावरु॑णा सुपा॒णी गोषु॑ प्रि॒यम॒मृतं॒ रक्ष॑माणा ॥९॥

Mano na yodhvanah sadya etyekah satra suro vasva ishe
Rajana mitravaruna supani goshu priyamamritam rakshamana

71.10

मा नो॑ अग्ने स॒ख्या पित्र्या॑णि॒ प्र म॑र्षिष्ठा अ॒भि वि॒दुष्क॒विः सन् ।
नभो॒ न रू॒पं ज॑रि॒मा मि॑नाति पु॒रा तस्या॑ अ॒भिश॑स्ते॒रधी॑हि ॥१०॥

Ma no agne sakhya pitryani pra marshishtha abhi vidushkavih san
Nabho na rupam jarima minati pura tasya abhishasteradhihi