সূক্ত 62

62.1

১৩ নোধা গৌতমঃ। ইন্দ্রঃ।ত্রিষ্টুপ্।

প্র মন্মহে শবসানায় শূষমাঙ্গূষং গির্বণসে অঙ্গিরস্বৎ ।
সুবৃক্তিভিঃ স্তুবত ঋগ্মিয়ায়াঽর্চামার্কং নরে বিশ্রুতায় ॥১॥

62.2

প্র বো মহে মহি নমো ভরধ্বমাঙ্গূষ্যং শবসানায় সাম ।
যেনা নঃ পূর্বে পিতরঃ পদজ্ঞা অর্চন্তো অঙ্গিরসো গা অবিন্দন্ ॥২॥

62.3

ইন্দ্রস্যাঙ্গিরসাং চেষ্টৌ বিদৎ সরমা তনয়ায় ধাসিম্ ।
বৃহস্পতির্ভিনদদ্রিং বিদদ্ গাঃ সমুস্রিয়াভির্বাবশন্ত নরঃ ॥৩॥

62.4

স সুষ্টুভা স স্তুভা সপ্ত বিপ্রৈঃ স্বরেণাদ্রিং স্বর্যো ৩ নবগ্বৈঃ ।
সরণ্যুভিঃ ফলিগমিন্দ্র শক্র বলং রবেণ দরয়ো দশগ্বৈঃ ॥৪॥

62.5

গৃণানো অঙ্গিরোভির্দস্ম বি বরুষসা সূর্যেণ গোভিরন্ধঃ ।
বি ভূম্যা অপ্রথয় ইন্দ্র সানু দিবো রজ উপরমস্তভায়ঃ ॥৫॥

62.6

তদু প্রয়ক্ষতমমস্য কর্ম দস্মস্য চারুতমমস্তি দংসঃ ।
উপহ্বরে যদুপরা অপিন্বন্ মধ্বর্ণসো নদ্য ১ শ্চতস্রঃ ॥৬॥

62.7

দ্বিতা বি বব্রে সনজা সনীলে অয়াস্যঃ স্তবমানেভিরর্কৈঃ ।
ভগো ন মেনে পরমে ব্যোমন্নধারয়দ্ রোদসী সুদংসাঃ ॥৭॥

62.8

সনাদ্ দিবং পরি ভূমা বিরূপে পুনর্ভুবা যুবতী স্বেভিরেবৈঃ ।
কৃষ্ণেভিরক্তোষা রুশদ্ভির্বপুর্ভিরা চরতো অন্যান্যা ॥৮॥

62.9

সনেমি সখ্যং স্বপস্যমানঃ সূনুর্দাধার শবসা সুদংসাঃ ।
আমাসু চিদ্ দধিষে পক্বমন্তঃ পয়ঃ কৃষ্ণাসু রুশদ্ রোহিণীষু ॥৯॥

62.10

সনাৎ সনীলা অবনীরবাতা ব্রতা রক্ষন্তে অমৃতাঃ সহোভিঃ ।
পুরূ সহস্রা জনয়ো ন পত্নীর্দুবস্যন্তি স্বসারো অহ্রয়াণম্ ॥১০॥

62.11

সনায়ুবো নমসা নব্যো অর্কৈর্বসূয়বো মতয়ো দস্ম দদ্রুঃ ।
পতিং ন পত্নীরুশতীরুশন্তং স্পৃশন্তি ত্বা শবসাবন্ মনীষাঃ ॥১১॥

62.12

সনাদেব তব রায়ো গভস্তৌ ন ক্ষীয়ন্তে নোপ দস্যন্তি দস্ম ।
দ্যুমাঁ অসি ক্রতুমাঁ ইন্দ্র ধীরঃ শিক্ষা শচীবস্তব নঃ শচীভিঃ ॥১২॥

62.13

সনায়তে গোতম ইন্দ্র নব্যমতক্ষদ্ ব্রহ্ম হরিয়োজনায় ।
সুনীথায় নঃ শবসান নোধাঃ প্রাতর্মক্ষূ ধিয়াবসুর্জগম্যাৎ ॥১৩॥