Sukta 62

62.1

13 nodha gautamah, indrah, trishtup

प्र म॑न्महे शवसा॒नाय॑ शू॒षमा॑ङ्गू॒षं गिर्व॑णसे अङ्गिर॒स्वत् ।
सु॒वृ॒क्तिभि॑ः स्तुव॒त ऋ॑ग्मि॒यायाऽर्चा॑मा॒र्कं नरे॒ विश्रु॑ताय ॥१॥

Pra manmahe shavasanaya shushamangusham girvanase angirasvat
Suvriktibhih stuvata rigmiyayarchamarkam nare vishrutaya

62.2

प्र वो॑ म॒हे महि॒ नमो॑ भरध्वमाङ्गू॒ष्यं॑ शवसा॒नाय॒ साम॑ ।
येना॑ न॒ः पूर्वे॑ पि॒तर॑ः पद॒ज्ञा अर्च॑न्तो॒ अङ्गि॑रसो॒ गा अवि॑न्दन् ॥२॥

Pra vo mahe mahi namo bharadhvamangushyam shavasanaya sama
Yena nah purve pitarah padagya archanto angiraso ga avindan

62.3

इन्द्र॒स्याङ्गि॑रसां चे॒ष्टौ वि॒दत् स॒रमा॒ तन॑याय धा॒सिम् ।
बृह॒स्पति॑र्भि॒नदद्रिं॑ वि॒दद् गाः समु॒स्रिया॑भिर्वावशन्त॒ नर॑ः ॥३॥

Indrasyangirasam cheshtau vidat sarama tanayaya dhasim
Brihaspatirbhinadadrim vidad gah samusriyabhirvavashanta narah

62.4

स सु॒ष्टुभा॒ स स्तु॒भा स॒प्त विप्रै॑ः स्व॒रेणाद्रिं॑ स्व॒र्यो॒ ३ नव॑ग्वैः ।
स॒र॒ण्युभि॑ः फलि॒गमि॑न्द्र शक्र व॒लं रवे॑ण दरयो॒ दश॑ग्वैः ॥४॥

Sa sushtubha sa stubha sapta vipraih svarenadrim svaryo 3 navagvaih
Saranyubhih phaligamindra shakra valam ravena darayo dashagvaih

62.5

गृ॒णा॒नो अङ्गि॑रोभिर्दस्म॒ वि व॑रु॒षसा॒ सूर्ये॑ण॒ गोभि॒रन्ध॑ः ।
वि भूम्या॑ अप्रथय इन्द्र॒ सानु॑ दि॒वो रज॒ उप॑रमस्तभायः ॥५॥

Grinano angirobhirdasma vi varushasa suryena gobhirandhah
Vi bhumya aprathaya indra sanu divo raja uparamastabhayah

62.6

तदु॒ प्रय॑क्षतममस्य॒ कर्म॑ द॒स्मस्य॒ चारु॑तममस्ति॒ दंस॑ः ।
उ॒प॒ह्व॒रे यदुप॑रा॒ अपि॑न्व॒न् मध्व॑र्णसो न॒द्य १ श्चत॑स्रः ॥६॥

Tadu prayakshatamamasya karma dasmasya charutamamasti dansah
Upahvare yadupara apinvan madhvarnaso nadya 1 shchatasrah

62.7

द्वि॒ता वि व॑व्रे स॒नजा॒ सनी॑ळे अ॒यास्य॒ः स्तव॑मानेभिर॒र्कैः ।
भगो॒ न मेने॑ पर॒मे व्यो॑म॒न्नधा॑रय॒द् रोद॑सी सु॒दंसा॑ः ॥७॥

Dvita vi vavre sanaja sanile ayasyah stavamanebhirarkaih
Bhago na mene parame vyomannadharayad rodasi sudansah

62.8

स॒नाद् दिवं॒ परि॒ भूमा॒ विरू॑पे पुन॒र्भुवा॑ युव॒ती स्वेभि॒रेवै॑ः ।
कृ॒ष्णेभि॑र॒क्तोषा रुश॑द्भि॒र्वपु॑र्भि॒रा च॑रतो अ॒न्यान्या॑ ॥८॥

Sanad divam pari bhuma virupe punarbhuva yuvati svebhirevaih
Krishnebhiraktosha rushadbhirvapurbhira charato anyanya

62.9

सने॑मि स॒ख्यं स्व॑प॒स्यमा॑नः सू॒नुर्दा॑धार॒ शव॑सा सु॒दंसा॑ः ।
आ॒मासु॑ चिद् दधिषे प॒क्वम॒न्तः पय॑ः कृ॒ष्णासु॒ रुश॒द् रोहि॑णीषु ॥९॥

Sanemi sakhyam svapasyamanah sunurdadhara shavasa sudansah
Amasu chid dadhishe pakvamantah payah krishnasu rushad rohinishu

62.10

स॒नात् सनी॑ळा अ॒वनी॑रवा॒ता व्र॒ता र॑क्षन्ते अ॒मृता॒ः सहो॑भिः ।
पु॒रू स॒हस्रा॒ जन॑यो॒ न पत्नी॑र्दुव॒स्यन्ति॒ स्वसा॑रो॒ अह्र॑याणम् ॥१०॥

Sanat sanila avaniravata vrata rakshante amritah sahobhih
Puru sahasra janayo na patnirduvasyanti svasaro ahrayanam

62.11

स॒ना॒युवो॒ नम॑सा॒ नव्यो॑ अ॒र्कैर्व॑सू॒यवो॑ म॒तयो॑ दस्म दद्रुः ।
पतिं॒ न पत्नी॑रुश॒तीरु॒शन्तं॑ स्पृ॒शन्ति॑ त्वा शवसावन् मनी॒षाः ॥११॥

Sanayuvo namasa navyo arkairvasuyavo matayo dasma dadruh
Patim na patnirushatirushantam sprishanti tva shavasavan manishah

62.12

स॒नादे॒व तव॒ रायो॒ गभ॑स्तौ॒ न क्षीय॑न्ते॒ नोप॑ दस्यन्ति दस्म ।
द्यु॒माँ अ॑सि॒ क्रतु॑माँ इन्द्र॒ धीर॒ः शिक्षा॑ शचीव॒स्तव॑ न॒ः शची॑भिः ॥१२॥

Sanadeva tava rayo gabhastau na kshiyante nopa dasyanti dasma
Dyumam asi kratumam indra dhirah shiksha shachivastava nah shachibhih

62.13

स॒ना॒य॒ते गोत॑म इन्द्र॒ नव्य॒मत॑क्ष॒द् ब्रह्म॑ हरि॒योज॑नाय ।
सु॒नी॒थाय॑ नः शवसान नो॒धाः प्रा॒तर्म॒क्षू धि॒याव॑सुर्जगम्यात् ॥१३॥

Sanayate gotama indra navyamatakshad brahma hariyojanaya
Sunithaya nah shavasana nodhah pratarmakshu dhiyavasurjagamyat