সূক্ত 48

48.1

১৬ প্রস্কণ্বঃ কাণ্বঃ। উষাঃ। প্রগাথঃ – বিষমা বৃহত্যঃ, সমাঃ সতোবৃহত্যঃ।

সহ বামেন ন উষো ব্যুচ্ছা দুহিতর্দিবঃ ।
সহ দ্যুম্নেন বৃহতা বিভাবরি রায়া দেবি দাস্বতী ॥১॥

অশ্বাবতীর্গোমতীর্বিশ্বসুবিদো ভূরি চ্যবন্ত বস্তবে ।
উদীরয় প্রতি মা সূনৃতা উষশ্ চোদ রাধো মঘোনাম্ ॥২॥

উবাসোষা উচ্ছাচ্চ নু দেবী জীরা রথানাম্ ।
যে অস্যা আচরণেষু দধ্রিরে সমুদ্রে ন শ্রবস্যবঃ ॥৩॥

উষো যে তে প্র যামেষু যুঞ্জতে মনো দানায় সূরয়ঃ ।
অত্রাহ তত্কণ্ব এষাং কণ্বতমো নাম গৃণাতি নৃণাম্ ॥৪॥

আ ঘা যোষেব সূনর্যুষা যাতি প্রভুঞ্জতী ।
জরয়ন্তী বৃজনং পদ্বদীয়ত উত্পাতয়তি পক্ষিণঃ ॥৫॥

বি যা সৃজতি সমনং ব্য১র্থিনঃ পদং ন বেত্যোদতী ।
বয়ো নকিষ্টে পপ্তিবাংস আসতে ব্যুষ্টৌ বাজিনীবতি ॥৬॥

এষায়ুক্ত পরাবতঃ সূর্যস্যোদয়নাদধি ।
শতং রথেভিঃ সুভগোষা ইয়ং বি যাত্যভি মানুষান্ ॥৭॥

বিশ্বমস্যা নানাম চক্ষসে জগজ্ জ্যোতিষ্কৃণোতি সূনরী ।
অপ দ্বেষো মঘোনী দুহিতা দিব উষা উচ্ছদপ স্রিধঃ ॥৮॥

উষ আ ভাহি ভানুনা চন্দ্রেণ দুহিতর্দিবঃ ।
আবহন্তী ভূর্যস্মভ্যং সৌভগং ব্যুচ্ছন্তী দিবিষ্টিষু ॥৯॥

বিশ্বস্য হি প্রাণনং জীবনং ত্বে বি যদুচ্ছসি সূনরি ।
সা নো রথেন বৃহতা বিভাবরি শ্রুধি চিত্রামঘে হবম্ ॥১০॥

উষো বাজং হি বংস্ব যশ্চিত্রো মানুষে জনে ।
তেনা বহ সুকৃতো অধ্বরাঁ উপ যে ত্বা গৃণন্তি বহ্নয়ঃ ॥১১॥

বিশ্বান্ দেবাঁ আ বহ সোমপীতয়ে ঽন্তরিক্ষাদুষস্ত্বম্ ।
সাস্মাসু ধা গোমদশ্বাবদুক্থ্য১মুষো বাজং সুবীর্যম্ ॥১২॥

যস্যা রুশন্তো অর্চয়ঃ প্রতি ভদ্রা অদৃক্ষত ।
সা নো রয়িং বিশ্ববারং সুপেশসমুষা দদাতু সুগ্ম্যম্ ॥১৩॥

যে চিদ্ধি ত্বামৃষয়ঃ পূর্ব ঊতয়ে জুহূরেঽবসে মহি ।
সা নঃ স্তোমাঁ অভি গৃণীহি রাধসোষঃ শুক্রেণ শোচিষা ॥১৪॥

উষো যদদ্য ভানুনা বি দ্বারাবৃণবো দিবঃ ।
প্র নো যচ্ছতাদবৃকং পৃথু চ্ছর্দিঃ প্র দেবি গোমতীরিষঃ ॥১৫॥

সং নো রায়া বৃহতা বিশ্বপেশসা মিমিক্ষ্বা সমিলাভিরা ।
সং দ্যুম্নেন বিশ্বতুরোষো মহি সং বাজৈর্বাজিনীবতি ॥১৬॥