Sukta 48

48.1

16 praskanvah kanvah, ushah, pragathah – vishama brihatyah, samah satobrihatyah

स॒ह वा॒मेन॑ न उषो॒ व्यु॑च्छा दुहितर्दिवः ।
स॒ह द्यु॒म्नेन॑ बृह॒ता वि॑भावरि रा॒या दे॑वि॒ दास्व॑ती ॥१॥

Saha vamena na usho vyuchchha duhitardivah
Saha dyumnena brihata vibhavari raya devi dasvati

48.2

अश्वा॑वती॒र्गोम॑तीर्विश्वसु॒विदो॒ भूरि॑ च्यवन्त॒ वस्त॑वे ।
उदी॑रय॒ प्रति॑ मा सू॒नृता॑ उष॒श् चोद॒ राधो॑ म॒घोना॑म् ॥२॥

Ashvavatirgomatirvishvasuvido bhuri chyavanta vastave
Udiraya prati ma sunrita ushash choda radho maghonam

48.3

उ॒वासो॒षा उ॒च्छाच्च॒ नु दे॒वी जी॒रा रथा॑नाम् ।
ये अ॑स्या आ॒चर॑णेषु दध्रि॒रे स॑मु॒द्रे न श्र॑व॒स्यव॑ः ॥३॥

Uvasosha uchchhachcha nu devi jira rathanam
Ye asya acharaneshu dadhrire samudre na shravasyavah

48.4

उषो॒ ये ते॒ प्र यामे॑षु यु॒ञ्जते॒ मनो॑ दा॒नाय॑ सू॒रय॑ः ।
अत्राह॒ तत्कण्व॑ एषां॒ कण्व॑तमो॒ नाम॑ गृणाति नृ॒णाम् ॥४॥

Usho ye te pra yameshu yunjate mano danaya surayah
Atraha tatkanva esham kanvatamo nama grinati nrinam

48.5

आ घा॒ योषे॑व सू॒नर्यु॒षा या॑ति प्रभुञ्ज॒ती ।
ज॒रय॑न्ती॒ वृज॑नं प॒द्वदी॑यत॒ उत्पा॑तयति प॒क्षिण॑ः ॥५॥

A gha yosheva sunaryusha yati prabhunjati
Jarayanti vrijanam padvadiyata utpatayati pakshinah

48.6

वि या सृ॒जति॒ सम॑नं॒ व्य१र्थिन॑ः प॒दं न वे॒त्योद॑ती ।
वयो॒ नकि॑ष्टे पप्ति॒वांस॑ आसते॒ व्यु॑ष्टौ वाजिनीवति ॥६॥

Vi ya srijati samanam vya1rthinah padam na vetyodati
Vayo nakishte paptivansa asate vyushtau vajinivati

48.7

ए॒षायु॑क्त परा॒वत॒ः सूर्य॑स्यो॒दय॑ना॒दधि॑ ।
श॒तं रथे॑भिः सु॒भगो॒षा इ॒यं वि या॑त्य॒भि मानु॑षान् ॥७॥

Eshayukta paravatah suryasyodayanadadhi
Shatam rathebhih subhagosha iyam vi yatyabhi manushan

48.8

विश्व॑मस्या नानाम॒ चक्ष॑से॒ जग॒ज् ज्योति॑ष्कृणोति सू॒नरी॑ ।
अप॒ द्वेषो॑ म॒घोनी॑ दुहि॒ता दि॒व उ॒षा उ॑च्छ॒दप॒ स्रिध॑ः ॥८॥

Vishvamasya nanama chakshase jagaj jyotishkrinoti sunari
Apa dvesho maghoni duhita diva usha uchchhadapa sridhah

48.9

उष॒ आ भा॑हि भा॒नुना॑ च॒न्द्रेण॑ दुहितर्दिवः ।
आ॒वह॑न्ती॒ भूर्य॒स्मभ्यं॒ सौभ॑गं व्यु॒च्छन्ती॒ दिवि॑ष्टिषु ॥९॥

Usha a bhahi bhanuna chandrena duhitardivah
Avahanti bhuryasmabhyam saubhagam vyuchchhanti divishtishu

48.10

विश्व॑स्य॒ हि प्राण॑नं॒ जीव॑नं॒ त्वे वि यदु॒च्छसि॑ सूनरि ।
सा नो॒ रथे॑न बृह॒ता वि॑भावरि श्रु॒धि चि॑त्रामघे॒ हव॑म् ॥१०॥

Vishvasya hi prananam jivanam tve vi yaduchchhasi sunari
Sa no rathena brihata vibhavari shrudhi chitramaghe havam

48.11

उषो॒ वाजं॒ हि वंस्व॒ यश्चि॒त्रो मानु॑षे॒ जने॑ ।
तेना व॑ह सु॒कृतो॑ अध्व॒राँ उप॒ ये त्वा॑ गृ॒णन्ति॒ वह्न॑यः ॥११॥

Usho vajam hi vansva yashchitro manushe jane
Tena vaha sukrito adhvaram upa ye tva grinanti vahnayah

48.12

विश्वा॑न् दे॒वाँ आ व॑ह॒ सोम॑पीतये॒ ऽन्तरि॑क्षादुष॒स्त्वम् ।
सास्मासु॑ धा॒ गोम॒दश्वा॑वदु॒क्थ्य१मुषो॒ वाजं॑ सु॒वीर्य॑म् ॥१२॥

Vishvan devam a vaha somapitaye ntarikshadushastvam
Sasmasu dha gomadashvavadukthya1musho vajam suviryam

48.13

यस्या॒ रुश॑न्तो अ॒र्चय॒ः प्रति॑ भ॒द्रा अदृ॑क्षत ।
सा नो॑ र॒यिं वि॒श्ववा॑रं सु॒पेश॑समु॒षा द॑दातु॒ सुग्म्य॑म् ॥१३॥

Yasya rushanto archayah prati bhadra adrikshata
Sa no rayim vishvavaram supeshasamusha dadatu sugmyam

48.14

ये चि॒द्धि त्वामृष॑य॒ः पूर्व॑ ऊ॒तये॑ जुहू॒रेऽव॑से महि ।
सा न॒ः स्तोमाँ॑ अ॒भि गृ॑णीहि॒ राध॒सोष॑ः शु॒क्रेण॑ शो॒चिषा॑ ॥१४॥

Ye chiddhi tvamrishayah purva utaye juhurevase mahi
Sa nah stomam abhi grinihi radhasoshah shukrena shochisha

48.15

उषो॒ यद॒द्य भा॒नुना॒ वि द्वारा॑वृ॒णवो॑ दि॒वः ।
प्र नो॑ यच्छतादवृ॒कं पृ॒थु च्छ॒र्दिः प्र दे॑वि॒ गोम॑ती॒रिष॑ः ॥१५॥

Usho yadadya bhanuna vi dvaravrinavo divah
Pra no yachchhatadavrikam prithu chchhardih pra devi gomatirishah

48.16

सं नो॑ रा॒या बृ॑ह॒ता वि॒श्वपे॑शसा मिमि॒क्ष्वा समिळा॑भि॒रा ।
सं द्यु॒म्नेन॑ विश्व॒तुरो॑षो महि॒ सं वाजै॑र्वाजिनीवति ॥१६॥

Sam no raya brihata vishvapeshasa mimikshva samilabhira
Sam dyumnena vishvaturosho mahi sam vajairvajinivati