Sukta 49

49.1

4 praskanvah kanvah, ushah, anushtup

उषो॑ भ॒द्रेभि॒रा ग॑हि दि॒वश्चि॑द् रोच॒नादधि॑ ।
वह॑न्त्वरु॒णप्स॑व॒ उप॑ त्वा सो॒मिनो॑ गृ॒हम् ॥१॥

Usho bhadrebhira gahi divashchid rochanadadhi
Vahantvarunapsava upa tva somino griham

सु॒पेश॑सं सु॒खं रथं॒ यम॒ध्यस्था॑ उष॒स्त्वम् ।
तेना॑ सु॒श्रव॑सं॒ जनं॒ प्रावा॒द्य दु॑हितर्दिवः ॥२॥

Supeshasam sukham ratham yamadhyastha ushastvam
Tena sushravasam janam pravadya duhitardivah

वय॑श्चित् ते पत॒त्रिणो॑ द्वि॒पच्चतु॑ष्पदर्जुनि ।
उष॒ः प्रार॑न्नृ॒तूँरनु॑ दि॒वो अन्ते॑भ्य॒स्परि॑ ॥३॥

Vayashchit te patatrino dvipachchatushpadarjuni
Ushah prarannritunranu divo antebhyaspari

व्यु॒च्छन्ती॒ हि र॒श्मिभि॒र्विश्व॑मा॒भासि॑ रोच॒नम् ।
तां त्वामु॑षर्वसू॒यवो॑ गी॒र्भिः कण्वा॑ अहूषत ॥४॥

Vyuchchhanti hi rashmibhirvishvamabhasi rochanam
Tam tvamusharvasuyavo girbhih kanva ahushata