সূক্ত 22

22.1

২১ মেধাতিথিঃ কাণ্বঃ। ১-৪ অশ্বিনৌ, ৫-৮ সবিতা, ৯-১০ অগ্নিঃ, ১১ দেব্যঃ, ১২ ইন্দ্রাণী বরুণান্যগ্নায্যঃ, ১৩-১৪ দ্যাবাপৃথিব্যৌ, ১৫ পৃথিবী, ১৬ বিষ্ণুর্দেবা বা, ১৭-২১ বিষ্ণুঃ। গায়ত্রী।

প্রাতর্যুজা বি বোধয়াশ্বিনাবেহ গচ্ছতাম্ । অস্য সোমস্য পীতয়ে ॥১॥

22.2

যা সুরথা রথীতমোভা দেবা দিবিস্পৃশা । অশ্বিনা তা হবামহে ॥২॥

22.3

যা বাং কশা মধুমত্যশ্বিনা সূনৃতাবতী । তয়া যজ্ঞং মিমিক্ষতম্ ॥৩॥

22.4

নহি বামস্তি দূরকে যত্রা রথেন গচ্ছথঃ । অশ্বিনা সোমিনো গৃহম্ ॥৪॥

22.5

হিরণ্যপাণিমূতয়ে সবিতারমুপ হ্বয়ে । স চেত্তা দেবতা পদম্ ॥৫॥

22.6

অপাং নপাতমবসে সবিতারমুপ স্তুহি । তস্য ব্রতান্যুশ্মসি ॥৬॥

22.7

বিভক্তারং হবামহে বসোশ্চিত্রস্য রাধসঃ । সবিতারং নৃচক্ষসম্ ॥৭॥

22.8

সখায় আ নি ষীদত সবিতা স্তোম্যো নু নঃ । দাতা রাধাংসি শুম্ভতি ॥৮॥

22.9

অগ্নে পত্নীরিহা বহ দেবানামুশতীরুপ । ত্বষ্টারং সোমপীতয়ে ॥৯॥

22.10

আ গ্না অগ্ন ইহাবসে হোত্রাং যবিষ্ঠ ভারতীম্ । বরূত্রীং ধিষণাং বহ ॥১০॥

22.11

অভি নো দেবীরবসা মহঃ শর্মণা নৃপত্নীঃ । অচ্ছিন্নপত্রাঃ সচন্তাম্ ॥১১॥

22.12

ইহেন্দ্রাণীমুপ হ্বয়ে বরুণানীং স্বস্তয়ে । অগ্নায়ীং সোমপীতয়ে ॥১২॥

22.13

মহী দ্যৌঃ পৃথিবী চ ন ইমং যজ্ঞং মিমিক্ষতাম্ । পিপৃতাং নো ভরীমভিঃ ॥১৩॥

22.14

তয়োরিদ্ ঘৃতবৎ পয়ো বিপ্রা রিহন্তি ধীতিভিঃ । গন্ধর্বস্য ধ্রুবে পদে ॥১৪॥

22.15

স্যোনা পৃথিবি ভবানৃক্ষরা নিবেশনী । যচ্ছা নঃ শর্ম সপ্রথঃ ॥১৫॥

22.16

অতো দেবা অবন্তু নো যতো বিষ্ণুর্বিচক্রমে । পৃথিব্যাঃ সপ্ত ধামভিঃ ॥১৬॥

22.17

ইদং বিষ্ণুর্বি চক্রমে ত্রেধা নি দধে পদম্ । সমূহ্লমস্য পাংসুরে ॥১৭॥

22.18

ত্রীণি পদা বি চক্রমে বিষ্ণুর্গোপা অদাভ্যঃ । অতো ধর্মাণি ধারয়ন্ ॥১৮॥

22.19

বিষ্ণোঃ কর্মাণি পশ্যত যতো ব্রতানি পস্পশে । ইন্দ্রস্য যুজ্যঃ সখা ॥১৯॥

22.20

তদ্ বিষ্ণোঃ পরমং পদং সদা পশ্যন্তি সূরয়ঃ । দিবীব চক্ষুরাততম্ ॥২০॥

22.21

তদ্ বিপ্রাসো বিপন্যবো জাগৃবাংসঃ সমিন্ধতে । বিষ্ণোর্যৎ পরমং পদম্ ॥২১॥