সূক্ত 191

191.1

৯ মধুচ্ছন্দা বৈশ্বামিত্রঃ । অগ্নিঃ। গায়ত্রী। ১৬ অগ্স্ত্যো মৈত্রাবরুণিঃ । (বিষঘ্নোপনিষদ্)। অনুষ্টুপ্, ১০-১২ মহা পংক্তিঃ, ১৩ মহবৃহতী।

কঙ্কতো ন কঙ্কতো ঽথো সতীনকঙ্কতঃ ।
দ্বাবিতি প্লুষী ইতি ন্য১দৃষ্টা অলিপ্সত ॥১॥

অদৃষ্টান্ হন্ত্যায়ত্যথো হন্তি পরায়তী ।
অথো অবঘ্নতী হন্ত্যথো পিনষ্টি পিংষতী ॥২॥

শরাসঃ কুশরাসো দর্ভাসঃ সৈর্যা উত ।
মৌঞ্জা অদৃষ্টা বৈরিণাঃ সর্বে সাকং ন্যলিপ্সত ॥৩॥

নি গাবো গোষ্ঠে অসদন্ নি মৃগাসো অবিক্ষত ।
নি কেতবো জনানাং ন্য১দৃষ্টা অলিপ্সত ॥৪॥

এত উ ত্যে প্রত্যদৃশ্রন্ প্রদোষং তস্করা ইব ।
অদৃষ্টা বিশ্বদৃষ্টাঃ প্রতিবুদ্ধা অভূতন ॥৫॥

দ্যৌর্বঃ পিতা পৃথিবী মাতা সোমো ভ্রাতাদিতিঃ স্বসা ।
অদৃষ্টা বিশ্বদৃষ্টাস্তিষ্ঠতেলয়তা সু কম্ ॥৬॥

যে অংস্যা যে অঙ্গ্যাঃ সূচীকা যে প্রকঙ্কতাঃ ।
অদৃষ্টাঃ কিং চনেহ বঃ সর্বে সাকং নি জস্যত ॥৭॥

উৎ পুরস্তাৎ সূর্য এতি বিশ্বদৃষ্টো অদৃষ্টহা ।
অদৃষ্টান্ ত্সর্বাঞ্জম্ভয়ন্ ত্সর্বাশ্চ যাতুধান্যঃ ॥৮॥

উদপপ্তদসৌ সূর্যঃ পুরু বিশ্বানি জূর্বন্ ।
আদিত্যঃ পর্বতেভ্যো বিশ্বদৃষ্টো অদৃষ্টহা ॥৯॥

সূর্যে বিষমা সজামি দৃতিং সুরাবতো গৃহে ।
সো চিন্নু ন মরাতি নো বয়ং মরামাঽঽরে অস্য যোজনং হরিষ্ঠা মধু ত্বা মধুলা চকার ॥১০॥

ইয়ত্তিকা শকুন্তিকা সকা জঘাস তে বিষম্ ।
সো চিন্নু ন মরাতি নো বয়ং মরামাঽঽরে অস্য যোজনং হরিষ্ঠা মধু ত্বা মধুলা চকার ॥১১॥

ত্রিঃ সপ্ত বিষ্পুলিঙ্গকা বিষস্য পুষ্যমক্ষন্ ।
তাশ্চিন্নু ন মরন্তি নো বয়ং মরামাঽঽরে অস্য যোজনং হরিষ্ঠা মধু ত্বা মধুলা চকার ॥১২॥

নবানাং নবতীনাং বিষস্য রোপুষীণাম্ ।
সর্বাসামগ্রভং নামাঽঽরে অস্য যোজনং হরিষ্ঠা মধু ত্বা মধুলা চকার ॥১৩॥

ত্রিঃ সপ্ত ময়ূর্যঃ সপ্ত স্বসারো অগ্রুবঃ ।
তাস্তে বিষং বি জভ্রির উদকং কুম্ভিনীরিব ॥১৪॥

ইয়ত্তকঃ কুষুম্ভকস্তকং ভিনদ্ম্যশ্মনা ।
ততো বিষং প্র বাবৃতে পরাচীরনু সংবতঃ ॥১৫॥

কুষুম্ভকস্তদব্রবীদ্ গিরেঃ প্রবর্তমানকঃ ।
বৃশ্চিকস্যারসং বিষমরসং বৃশ্চিক তে বিষম্ ॥১৬॥

ইতি প্রথমং মণ্ডলং সমাপ্তম্॥