সূক্ত 190

190.1

৮ অগস্ত্যো মৈত্রাবরুণিঃ । বৃহস্পতিঃ। ত্রিষ্টুপ্।

অনর্বাণং বৃষভং মন্দ্রজিহ্বং বৃহস্পতিং বর্ধয়া নব্যমর্কৈঃ ।
গাথান্যঃ সুরুচো যস্য দেবা আশৃণ্বন্তি নবমানস্য মর্তাঃ ॥১॥

তমৃত্বিয়া উপ বাচঃ সচন্তে সর্গো ন যো দেবয়তামসর্জি ।
বৃহস্পতিঃ স হ্যঞ্জো বরাংসি বিভ্বাভবৎ সমৃতে মাতরিশ্বা ॥২॥

উপস্তুতিং নমস উদ্যতিং চ শ্লোকং যংসৎ সবিতেব প্র বাহূ ।
অস্য ক্রত্বাহন্যো৩ যো অস্তি মৃগো ন ভীমো অরক্ষসস্তুবিষ্মান্ ॥৩॥

অস্য শ্লোকো দিবীয়তে পৃথিব্যামত্যো ন যংসদ্ যক্ষভৃদ্ বিচেতাঃ ।
মৃগাণাং ন হেতয়ো যন্তি চেমা বৃহস্পতেরহিমায়াঁ অভি দ্যূন্ ॥৪॥

যে ত্বা দেবোস্রিকং মন্যমানাঃ পাপা ভদ্রমুপজীবন্তি পজ্রাঃ ।
ন দূঢ্যে৩ অনু দদাসি বামং বৃহস্পতে চয়স ইৎ পিয়ারুম্ ॥৫॥

সুপ্রৈতুঃ সূয়বসো ন পন্থা দুর্নিয়ন্তুঃ পরিপ্রীতো ন মিত্রঃ ।
অনর্বাণো অভি যে চক্ষতে নোঽপীবৃতা অপোর্ণুবন্তো অস্থুঃ ॥৬॥

সং যং স্তুভোঽবনয়ো ন যন্তি সমুদ্রং ন স্রবতো রোধচক্রাঃ ।
স বিদ্বাঁ উভয়ং চষ্টে অন্তর্বৃহস্পতিস্তর আপশ্চ গৃধ্রঃ ॥৭॥

এবা মহস্তুবিজাতস্তুবিষ্মান্ বৃহস্পতির্বৃষভো ধায়ি দেবঃ ।
স নঃ স্তুতো বীরবদ্ ধাতু গোমদ্ বিদ্যামেষং বৃজনং জীরদানুম্ ॥৮॥