Sukta 191

191.1

9 madhuchchhanda vaishvamitrah, agnih, gayatri, 16 agstyo maitravarunih, (vishaghnopanishad), anushtup, 10-12 maha panktih, 13 mahabrihati

कङ्क॑तो॒ न कङ्क॒तो ऽथो॑ सती॒नक॑ङ्कतः ।
द्वाविति॒ प्लुषी॒ इति॒ न्य१दृष्टा॑ अलिप्सत ॥१॥

Kankato na kankato tho satinakankatah
Dvaviti plushi iti nya1drishta alipsata

191.2

अ॒दृष्टा॑न् हन्त्याय॒त्यथो॑ हन्ति पराय॒ती ।
अथो॑ अवघ्न॒ती ह॒न्त्यथो॑ पिनष्टि पिंष॒ती ॥२॥

Adrishtan hantyayatyatho hanti parayati
Atho avaghnati hantyatho pinashti pinshati

191.3

श॒रास॒ः कुश॑रासो द॒र्भास॑ः सै॒र्या उ॒त ।
मौ॒ञ्जा अ॒दृष्टा॑ वैरि॒णाः सर्वे॑ सा॒कं न्य॑लिप्सत ॥३॥

Sharasah kusharaso darbhasah sairya uta
Maunja adrishta vairinah sarve sakam nyalipsata

191.4

नि गावो॑ गो॒ष्ठे अ॑सद॒न् नि मृ॒गासो॑ अविक्षत ।
नि के॒तवो॒ जना॑नां॒ न्य१दृष्टा॑ अलिप्सत ॥४॥

Ni gavo goshthe asadan ni mrigaso avikshata
Ni ketavo jananam nya1drishta alipsata

191.5

ए॒त उ॒ त्ये प्रत्य॑दृश्रन् प्रदो॒षं तस्क॑रा इव ।
अदृ॑ष्टा॒ विश्व॑दृष्टा॒ः प्रति॑बुद्धा अभूतन ॥५॥

Eta u tye pratyadrishran pradosham taskara iva
Adrishta vishvadrishtah pratibuddha abhutana

191.6

द्यौर्व॑ः पि॒ता पृ॑थि॒वी मा॒ता सोमो॒ भ्रातादि॑ति॒ः स्वसा॑ ।
अदृ॑ष्टा॒ विश्व॑दृष्टा॒स्तिष्ठ॑ते॒लय॑ता॒ सु क॑म् ॥६॥

Dyaurvah pita prithivi mata somo bhrataditih svasa
Adrishta vishvadrishtastishthatelayata su kam

191.7

ये अंस्या॒ ये अङ्ग्या॑ः सू॒चीका॒ ये प्र॑कङ्क॒ताः ।
अदृ॑ष्टा॒ः किं च॒नेह व॒ः सर्वे॑ सा॒कं नि ज॑स्यत ॥७॥

Ye ansya ye angyah suchika ye prakankatah
Adrishtah kim chaneha vah sarve sakam ni jasyata

191.8

उत् पु॒रस्ता॒त् सूर्य॑ एति वि॒श्वदृ॑ष्टो अदृष्ट॒हा ।
अ॒दृष्टा॒न् त्सर्वा॑ञ्ज॒म्भय॒न् त्सर्वा॑श्च यातुधा॒न्य॑ः ॥८॥

Ut purastat surya eti vishvadrishto adrishtaha
Adrishtan tsarvanjambhayan tsarvashcha yatudhanyah

191.9

उद॑पप्तद॒सौ सूर्य॑ः पु॒रु विश्वा॑नि॒ जूर्व॑न् ।
आ॒दि॒त्यः पर्व॑तेभ्यो वि॒श्वदृ॑ष्टो अदृष्ट॒हा ॥९॥

Udapaptadasau suryah puru vishvani jurvan
Adityah parvatebhyo vishvadrishto adrishtaha

191.10

सूर्ये॑ वि॒षमा स॑जामि॒ दृतिं॒ सुरा॑वतो गृ॒हे ।
सो चि॒न्नु न म॑राति॒ नो व॒यं म॑रामा॒ऽऽरे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥१०॥

Surye vishama sajami dritim suravato grihe
So chinnu na marati no vayam maramare asya yojanam harishtha madhu tva madhula chakara

191.11

इ॒य॒त्ति॒का श॑कुन्ति॒का स॒का ज॑घास ते वि॒षम् ।
सो चि॒न्नु न म॑राति॒ नो व॒यं म॑रामा॒ऽऽरे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥११॥

Iyattika shakuntika saka jaghasa te visham
So chinnu na marati no vayam maramare asya yojanam harishtha madhu tva madhula chakara

191.12

त्रिः स॒प्त वि॑ष्पुलिङ्ग॒का वि॒षस्य॒ पुष्य॑मक्षन् ।
ताश्चि॒न्नु न म॑रन्ति॒ नो व॒यं म॑रामा॒ऽऽरे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥१२॥

Trih sapta vishpulingaka vishasya pushyamakshan
Tashchinnu na maranti no vayam maramare asya yojanam harishtha madhu tva madhula chakara

191.13

न॒वा॒नां न॑वती॒नां वि॒षस्य॒ रोपु॑षीणाम् ।
सर्वा॑सामग्रभं॒ नामा॒ऽऽरे अ॑स्य॒ योज॑नं हरि॒ष्ठा मधु॑ त्वा मधु॒ला च॑कार ॥१३॥

Navanam navatinam vishasya ropushinam
Sarvasamagrabham namare asya yojanam harishtha madhu tva madhula chakara

191.14

त्रिः स॒प्त म॑यू॒र्य॑ः स॒प्त स्वसा॑रो अ॒ग्रुव॑ः ।
तास्ते॑ वि॒षं वि ज॑भ्रिर उद॒कं कु॒म्भिनी॑रिव ॥१४॥

Trih sapta mayuryah sapta svasaro agruvah
Taste visham vi jabhrira udakam kumbhiniriva

191.15

इ॒य॒त्त॒कः कु॑षुम्भ॒कस्त॒कं भि॑न॒द्म्यश्म॑ना ।
ततो॑ वि॒षं प्र वा॑वृते॒ परा॑ची॒रनु॑ सं॒वत॑ः ॥१५॥

Iyattakah kushumbhakastakam bhinadmyashmana
Tato visham pra vavrite parachiranu sanvatah

191.16

कु॒षु॒म्भ॒कस्तद॑ब्रवीद् गि॒रेः प्र॑वर्तमान॒कः ।
वृश्चि॑कस्यार॒सं वि॒षम॑र॒सं वृ॑श्चिक ते वि॒षम् ॥१६॥

Kushumbhakastadabravid gireh pravartamanakah
Vrishchikasyarasam vishamarasam vrishchika te visham

191.17

इति प्रथमं मण्डलं समाप्तम्॥

Iti prathamam mandalam samaptam