সূক্ত 101

101.1

১১ কুত্স আঙ্গিরসঃ। ইন্দ্রঃ (১ গর্ভস্রাবি ণ্যুপনিষদ্)। জগতী, ৮-১১ ত্রিষ্টুপ্।

প্র মন্দিনে পিতুমদর্চতা বচো যঃ কৃষ্ণগর্ভা নিরহন্নৃজিশ্বনা ।
অবস্যবো বৃষণং বজ্রদক্ষিণং মরুত্বন্তং সখ্যায় হবামহে ॥১॥

যো ব্যংসং জাহৃষাণেন মন্যুনা যঃ শম্বরং যো অহন্ পিপ্রুমব্রতম্ ।
ইন্দ্রো যঃ শুষ্ণমশুষং ন্যাবৃণঙ্ মরুত্বন্তং সখ্যায় হবামহে ॥২॥

যস্য দ্যাবাপৃথিবী পৌংস্যং মহদ্ যস্য ব্রতে বরুণো যস্য সূর্যঃ ।
যস্যেন্দ্রস্য সিন্ধবঃ সশ্চতি ব্রতং মরুত্বন্তং সখ্যায় হবামহে ॥৩॥

যো অশ্বানাং যো গবাং গোপতির্বশী য আরিতঃ কর্মণিকর্মণি স্থিরঃ ।
বীলোশ্চিদিন্দ্রো যো অসুন্বতো বধো মরুত্বন্তং সখ্যায় হবামহে ॥৪॥

যো বিশ্বস্য জগতঃ প্রাণতস্পতির্যো ব্রহ্মণে প্রথমো গা অবিন্দৎ ।
ইন্দ্রো যো দস্যূঁরধরাঁ অবাতিরন্ মরুত্বন্তং সখ্যায় হবামহে ॥৫॥

যঃ শূরেভির্হব্যো যশ্চ ভীরুভির্যো ধাবদ্ভির্হূয়তে যশ্চ জিগ্যুভিঃ ।
ইন্দ্রং যং বিশ্বা ভুবনাভি সংদধুর্মরুত্বন্তং সখ্যায় হবামহে ॥৬॥

রুদ্রাণামেতি প্রদিশা বিচক্ষণো রুদ্রেভির্যোষা তনুতে পৃথু জ্রয়ঃ ।
ইন্দ্রং মনীষা অভ্যর্চতি শ্রুতং মরুত্বন্তং সখ্যায় হবামহে ॥৭॥

যদ্বা মরুত্বঃ পরমে সধস্থে যদ্ বাবমে বৃজনে মাদয়াসে ।
অত আ যাহ্যধ্বরং নো অচ্ছা ত্বায়া হবিশ্চকৃমা সত্যরাধঃ ॥৮॥

ত্বায়েন্দ্র সোমং সুষুমা সুদক্ষ ত্বায়া হবিশ্চকৃমা ব্রহ্মবাহঃ ।
অধা নিয়ুত্বঃ সগণো মরুদ্ভিরস্মিন্ যজ্ঞে বর্হিষি মাদয়স্ব ॥৯॥

মাদয়স্ব হরিভির্যে ত ইন্দ্র বি ষ্যস্ব শিপ্রে বি সৃজস্ব ধেনে ।
আ ত্বা সুশিপ্র হরয়ো বহন্তূশন্ হব্যানি প্রতি নো জুষস্ব ॥১০॥

মরুত্স্তোত্রস্য বৃজনস্য গোপা বয়মিন্দ্রেণ সনুয়াম বাজম্ ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥১১॥