Sukta 101

101.1

11 kutsa angirasah, indrah (1 garbhasravi nyupanishad), jagati, 8-11 trishtup

प्र म॒न्दिने॑ पितु॒मद॑र्चता॒ वचो॒ यः कृ॒ष्णग॑र्भा नि॒रह॑न्नृ॒जिश्व॑ना ।
अ॒व॒स्यवो॒ वृष॑णं॒ वज्र॑दक्षिणं म॒रुत्व॑न्तं स॒ख्याय॑ हवामहे ॥१॥

Pra mandine pitumadarchata vacho yah krishnagarbha nirahannrijishvana
Avasyavo vrishanam vajradakshinam marutvantam sakhyaya havamahe

101.2

यो व्यं॑सं जाहृषा॒णेन॑ म॒न्युना॒ यः शम्ब॑रं॒ यो अह॒न् पिप्रु॑मव्र॒तम् ।
इन्द्रो॒ यः शुष्ण॑म॒शुषं॒ न्यावृ॑णङ् म॒रुत्व॑न्तं स॒ख्याय॑ हवामहे ॥२॥

Yo vyansam jahrishanena manyuna yah shambaram yo ahan piprumavratam
Indro yah shushnamashusham nyavrinang marutvantam sakhyaya havamahe

101.3

यस्य॒ द्यावा॑पृथि॒वी पौंस्यं॑ म॒हद् यस्य॑ व्र॒ते वरु॑णो॒ यस्य॒ सूर्य॑ः ।
यस्येन्द्र॑स्य॒ सिन्ध॑व॒ः सश्च॑ति व्र॒तं म॒रुत्व॑न्तं स॒ख्याय॑ हवामहे ॥३॥

Yasya dyavaprithivi paunsyam mahad yasya vrate varuno yasya suryah
Yasyendrasya sindhavah sashchati vratam marutvantam sakhyaya havamahe

101.4

यो अश्वा॑नां॒ यो गवां॒ गोप॑तिर्व॒शी य आ॑रि॒तः कर्म॑णिकर्मणि स्थि॒रः ।
वी॒ळोश्चि॒दिन्द्रो॒ यो असु॑न्वतो व॒धो म॒रुत्व॑न्तं स॒ख्याय॑ हवामहे ॥४॥

Yo ashvanam yo gavam gopatirvashi ya aritah karmanikarmani sthirah
Viloshchidindro yo asunvato vadho marutvantam sakhyaya havamahe

101.5

यो विश्व॑स्य॒ जग॑तः प्राण॒तस्पति॒र्यो ब्र॒ह्मणे॑ प्रथ॒मो गा अवि॑न्दत् ।
इन्द्रो॒ यो दस्यूँ॒रध॑राँ अ॒वाति॑रन् म॒रुत्व॑न्तं स॒ख्याय॑ हवामहे ॥५॥

Yo vishvasya jagatah pranataspatiryo brahmane prathamo ga avindat
Indro yo dasyunradharam avatiran marutvantam sakhyaya havamahe

101.6

यः शूरे॑भि॒र्हव्यो॒ यश्च॑ भी॒रुभि॒र्यो धाव॑द्भिर्हू॒यते॒ यश्च॑ जि॒ग्युभि॑ः ।
इन्द्रं॒ यं विश्वा॒ भुव॑ना॒भि सं॑द॒धुर्म॒रुत्व॑न्तं स॒ख्याय॑ हवामहे ॥६॥

Yah shurebhirhavyo yashcha bhirubhiryo dhavadbhirhuyate yashcha jigyubhih
Indram yam vishva bhuvanabhi sandadhurmarutvantam sakhyaya havamahe

101.7

रु॒द्राणा॑मेति प्र॒दिशा॑ विचक्ष॒णो रु॒द्रेभि॒र्योषा॑ तनुते पृ॒थु ज्रय॑ः ।
इन्द्रं॑ मनी॒षा अ॒भ्य॑र्चति श्रु॒तं म॒रुत्व॑न्तं स॒ख्याय॑ हवामहे ॥७॥

Rudranameti pradisha vichakshano rudrebhiryosha tanute prithu jrayah
Indram manisha abhyarchati shrutam marutvantam sakhyaya havamahe

101.8

यद्वा॑ मरुत्वः पर॒मे स॒धस्थे॒ यद् वा॑व॒मे वृ॒जने॑ मा॒दया॑से ।
अत॒ आ या॑ह्यध्व॒रं नो॒ अच्छा॑ त्वा॒या ह॒विश्च॑कृमा सत्यराधः ॥८॥

Yadva marutvah parame sadhasthe yad vavame vrijane madayase
Ata a yahyadhvaram no achchha tvaya havishchakrima satyaradhah

101.9

त्वा॒येन्द्र॒ सोमं॑ सुषुमा सुदक्ष त्वा॒या ह॒विश्च॑कृमा ब्रह्मवाहः ।
अधा॑ नियुत्व॒ः सग॑णो म॒रुद्भि॑र॒स्मिन् य॒ज्ञे ब॒र्हिषि॑ मादयस्व ॥९॥

Tvayendra somam sushuma sudaksha tvaya havishchakrima brahmavahah
Adha niyutvah sagano marudbhirasmin yagye barhishi madayasva

101.10

मा॒दय॑स्व॒ हरि॑भि॒र्ये त॑ इन्द्र॒ वि ष्य॑स्व॒ शिप्रे॒ वि सृ॑जस्व॒ धेने॑ ।
आ त्वा॑ सुशिप्र॒ हर॑यो वहन्तू॒शन् ह॒व्यानि॒ प्रति॑ नो जुषस्व ॥१०॥

Madayasva haribhirye ta indra vi shyasva shipre vi srijasva dhene
A tva sushipra harayo vahantushan havyani prati no jushasva

101.11

म॒रुत्स्तो॑त्रस्य वृ॒जन॑स्य गो॒पा व॒यमिन्द्रे॑ण सनुयाम॒ वाज॑म् ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥११॥

Marutstotrasya vrijanasya gopa vayamindrena sanuyama vajam
Tanno mitro varuno mamahantamaditih sindhuh prithivi uta dyauh