সূক্ত 10

10.1

১২ মধুচ্ছন্দা বৈশ্বামিত্রঃ। ইন্দ্রঃ। অনুষ্টুপ্।

গায়ন্তি ত্বা গায়ত্রিণোঽর্চন্ত্যর্কমর্কিণঃ।
ব্রহ্মাণস্ত্বা শতক্রত উদ্ বংশমিব যেমিরে ॥১॥

10.2

যৎ সানোঃ সানুমারুহদ্ ভূর্যস্পষ্ট কর্ত্বম্।
তদিন্দ্রো অর্থং চেততি যূথেন বৃষ্ণিরেজতি ॥২॥

10.3

যুক্ষ্বা হি কেশিনা হরী বৃষণা কক্ষ্যপ্রা।
অথা ন ইন্দ্র সোমপা গিরামুপশ্রুতিং চর ॥৩॥

10.4

এহি স্তোমাঁ অভি স্বরা ঽভি গৃণীহ্যা রুব।
ব্রহ্ম চ নো বসো সচেন্দ্র যজ্ঞং চ বর্ধয় ॥৪॥

10.5

উক্থমিন্দ্রায় শংস্যং বর্ধনং পুরুনিষ্ষিধে।
শক্রো যথা সুতেষু ণো রারণৎ সখ্যেষু চ ॥৫॥

10.6

তমিৎ সখিত্ব ঈমহে তং রায়ে তং সুবীর্যে।
স শক্র উত নঃ শকদিন্দ্রো বসু দয়মানঃ ॥৬॥

10.7

সুবিবৃতং সুনিরজমিন্দ্র ত্বাদাতমিদ্যশঃ।
গবামপ ব্রজং বৃধি কৃণুষ্ব রাধো অদ্রিবঃ ॥৭॥

10.8

নহি ত্বা রোদসী উভে ঋঘায়মাণমিন্বতঃ।
জেষঃ স্বর্বতীরপঃ সং গা অস্মভ্যং ধূনুহি ॥৮॥

10.9

আশ্রুত্কর্ণ শ্রুধী হবং নূ চিদ্দধিষ্ব মে গিরঃ।
ইন্দ্র স্তোমমিমং মম কৃষ্বা যুজশ্চিদন্তরম্ ॥৯॥

10.10

বিদ্মা হি ত্বা বৃষন্তমং বাজেষু হবনশ্রুতম্।
বৃষন্তমস্য হূমহ ঊতিং সহস্রসাতমাম্ ॥১০॥

10.11

আ তূ ন ইন্দ্র কৌশিক মন্দসানঃ সুতং পিব।
নব্যমায়ুঃ প্র সূ তির কৃধী সহস্রসামৃষিম্ ॥১১॥

10.12

পরি ত্বা গির্বণো গির ইমা ভবন্তু বিশ্বতঃ ।
বৃদ্ধায়ুমনু বৃদ্ধয়ো জুষ্টা ভবন্তু জুষ্টয়ঃ ॥১২॥