Sukta 10

10.1

12 madhuchchhanda vaishvamitrah, indrah, anushtup

गाय॑न्ति त्वा गाय॒त्रिणोऽर्च॑न्त्य॒र्कम॒र्किण॑ः।
ब्र॒ह्माण॑स्त्वा शतक्रत॒ उद् वं॒शमि॑व येमिरे ॥१॥

Gayanti tva gayatrinorchantyarkamarkinah
Brahmanastva shatakrata ud vanshamiva yemire

यत् सानो॒ः सानु॒मारु॑ह॒द् भूर्यस्प॑ष्ट॒ कर्त्व॑म्।
तदिन्द्रो॒ अर्थं॑ चेतति यू॒थेन॑ वृ॒ष्णिरे॑जति ॥२॥

Yat sanoh sanumaruhad bhuryaspashta kartvam
Tadindro artham chetati yuthena vrishnirejati

यु॒क्ष्वा हि के॒शिना॒ हरी॒ वृष॑णा कक्ष्य॒प्रा।
अथा॑ न इन्द्र सोमपा गि॒रामुप॑श्रुतिं चर ॥३॥

Yukshva hi keshina hari vrishana kakshyapra
Atha na indra somapa giramupashrutim chara

एहि॒ स्तोमाँ॑ अ॒भि स्व॑रा॒ ऽभि गृ॑णी॒ह्या रु॑व।
ब्रह्म॑ च नो वसो॒ सचेन्द्र॑ य॒ज्ञं च॑ वर्धय ॥४॥

Ehi stomam abhi svara bhi grinihya ruva
Brahma cha no vaso sachendra yagyam cha vardhaya

उ॒क्थमिन्द्रा॑य॒ शंस्यं॒ वर्ध॑नं पुरुनि॒ष्षिधे॑।
श॒क्रो यथा॑ सु॒तेषु॑ णो रा॒रण॑त् स॒ख्येषु॑ च ॥५॥

Ukthamindraya shansyam vardhanam purunishshidhe
Shakro yatha suteshu no raranat sakhyeshu cha

तमित् स॑खि॒त्व ई॑महे॒ तं रा॒ये तं सु॒वीर्ये॑।
स श॒क्र उ॒त न॑ः शक॒दिन्द्रो॒ वसु॒ दय॑मानः ॥६॥

Tamit sakhitva imahe tam raye tam suvirye
Sa shakra uta nah shakadindro vasu dayamanah

सु॒वि॒वृतं॑ सुनि॒रज॒मिन्द्र॒ त्वादा॑त॒मिद्यश॑ः।
गवा॒मप॑ व्र॒जं वृ॑धि कृणु॒ष्व राधो॑ अद्रिवः ॥७॥

Suvivritam sunirajamindra tvadatamidyashah
Gavamapa vrajam vridhi krinushva radho adrivah

न॒हि त्वा॒ रोद॑सी उ॒भे ऋ॑घा॒यमा॑ण॒मिन्व॑तः।
जेष॒ः स्व॑र्वतीर॒पः सं गा अ॒स्मभ्यं॑ धूनुहि ॥८॥

Nahi tva rodasi ubhe righayamanaminvatah
Jeshah svarvatirapah sam ga asmabhyam dhunuhi

आश्रु॑त्कर्ण श्रु॒धी हवं॒ नू चि॑द्दधिष्व मे॒ गिर॑ः।
इन्द्र॒ स्तोम॑मि॒मं मम॑ कृ॒ष्वा यु॒जश्चि॒दन्त॑रम् ॥९॥

Ashrutkarna shrudhi havam nu chiddadhishva me girah
Indra stomamimam mama krishva yujashchidantaram

वि॒द्मा हि त्वा॒ वृष॑न्तमं॒ वाजे॑षु हवन॒श्रुत॑म्।
वृष॑न्तमस्य हूमह ऊ॒तिं स॑हस्र॒सात॑माम् ॥१०॥

Vidma hi tva vrishantamam vajeshu havanashrutam
Vrishantamasya humaha utim sahasrasatamam

आ तू न॑ इन्द्र कौशिक मन्दसा॒नः सु॒तं पि॑ब।
नव्य॒मायु॒ः प्र सू ति॑र कृ॒धी स॑हस्र॒सामृषि॑म् ॥११॥

A tu na indra kaushika mandasanah sutam piba
Navyamayuh pra su tira kridhi sahasrasamrishim

परि॑ त्वा गिर्वणो॒ गिर॑ इ॒मा भ॑वन्तु वि॒श्वत॑ः ।
वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः ॥१२॥

Pari tva girvano gira ima bhavantu vishvatah
Vriddhayumanu vriddhayo jushta bhavantu jushtayah