অধ্যায় 3

3.1

যুধিষ্ঠির উবাচ
কিং ত্বং নকুল কুর্বাণস্তত্র তাত চরিষ্যসি
সুকুমারশ্চ শূরশ্চ দর্শনীয়ঃ সুখোচিতঃ

নকুল উবাচ
অশ্ববন্ধো ভবিষ্যামি বিরাটনৃপতেরহম্
গ্রন্থিকো নাম নাম্নাহং কর্মৈতত্সুপ্রিয়ং মম

কুশলোঽস্ম্যশ্বশিক্ষায়াং তথৈবাশ্বচিকিত্সিতে
প্রিয়াশ্চ সততং মেঽশ্বাঃ কুরুরাজ যথা তব

যে মামামন্ত্রয়িষ্যন্তি বিরাটনগরে জনাঃ
তেভ্য এবং প্রবক্ষ্যামি বিহরিষ্যাম্যহং যথা

যুধিষ্ঠির উবাচ
সহদেব কথং তস্য সমীপে বিহরিষ্যসি
কিং বা ত্বং তাত কুর্বাণঃ প্রচ্ছন্নো বিচরিষ্যসি

সহদেব উবাচ
গোসংখ্যাতা ভবিষ্যামি বিরাটস্য মহীপতেঃ
প্রতিষেদ্ধা চ দোগ্ধা চ সংখ্যানে কুশলো গবাম্

তন্তিপাল ইতি খ্যাতো নাম্না বিদিতমস্তু তে
নিপুণং চ চরিষ্যামি ব্যেতু তে মানসো জ্বরঃ

অহং হি ভবতা গোষু সততং প্রকৃতঃ পুরা
তত্র মে কৌশলং কর্ম অববুদ্ধং বিশাং পতে

লক্ষণং চরিতং চাপি গবাং যচ্চাপি মঙ্গলম্
তত্সর্বং মে সুবিদিতমন্যচ্চাপি মহীপতে

বৃষভানপি জানামি রাজন্পূজিতলক্ষণান্
যেষাং মূত্রমুপাঘ্রায় অপি বন্ধ্যা প্রসূয়তে

সোঽহমেবং চরিষ্যামি প্রীতিরত্র হি মে সদা
ন চ মাং বেত্স্যতি পরস্তত্তে রোচতু পার্থিব

যুধিষ্ঠির উবাচ
ইয়ং তু নঃ প্রিয়া ভার্যা প্রাণেভ্যোঽপি গরীয়সী
মাতেব পরিপাল্যা চ পূজ্যা জ্যেষ্ঠেব চ স্বসা

কেন স্ম কর্মণা কৃষ্ণা দ্রৌপদী বিচরিষ্যতি
ন হি কিংচিদ্বিজানাতি কর্ম কর্তুং যথা স্ত্রিয়ঃ

সুকুমারী চ বালা চ রাজপুত্রী যশস্বিনী
পতিব্রতা মহাভাগা কথং নু বিচরিষ্যতি

মাল্যগন্ধানলংকারান্বস্ত্রাণি বিবিধানি চ
এতান্যেবাভিজানাতি যতো জাতা হি ভামিনী

দ্রৌপদ্যুবাচ
সৈরন্ধ্র্যোঽরক্ষিতা লোকে ভুজিষ্যাঃ সন্তি ভারত
নৈবমন্যাঃ স্ত্রিয়ো যান্তি ইতি লোকস্য নিশ্চয়ঃ

সাহং ব্রুবাণা সৈরন্ধ্রী কুশলা কেশকর্মণি
আত্মগুপ্তা চরিষ্যামি যন্মাং ত্বমনুপৃচ্ছসি

সুদেষ্ণাং প্রত্যুপস্থাস্যে রাজভার্যাং যশস্বিনীম্
সা রক্ষিষ্যতি মাং প্রাপ্তাং মা তে ভূদ্দুঃখমীদৃশম্

যুধিষ্ঠির উবাচ
কল্যাণং ভাষসে কৃষ্ণে কুলে জাতা যথা বদেৎ
ন পাপমভিজানাসি সাধু সাধ্বীব্রতে স্থিতা