UtshovChapter 3
3.1
युधिष्ठिर उवाच
किं त्वं नकुल कुर्वाणस्तत्र तात चरिष्यसि
सुकुमारश्च शूरश्च दर्शनीयः सुखोचितः
Yudhishthira uvacha
Kim tvam nakula kurvanastatra tata charishyasi
Sukumarashcha shurashcha darshaniyah sukhochitah
3.2
नकुल उवाच
अश्वबन्धो भविष्यामि विराटनृपतेरहम्
ग्रन्थिको नाम नाम्नाहं कर्मैतत्सुप्रियं मम
Nakula uvacha
Ashvabandho bhavishyami viratanripateraham
Granthiko nama namnaham karmaitatsupriyam mama
3.3
कुशलोऽस्म्यश्वशिक्षायां तथैवाश्वचिकित्सिते
प्रियाश्च सततं मेऽश्वाः कुरुराज यथा तव
Kushalosmyashvashikshayam tathaivashvachikitsite
Priyashcha satatam meshvah kururaja yatha tava
3.4
ये मामामन्त्रयिष्यन्ति विराटनगरे जनाः
तेभ्य एवं प्रवक्ष्यामि विहरिष्याम्यहं यथा
Ye mamamantrayishyanti viratanagare janah
Tebhya evam pravakshyami viharishyamyaham yatha
3.5
युधिष्ठिर उवाच
सहदेव कथं तस्य समीपे विहरिष्यसि
किं वा त्वं तात कुर्वाणः प्रच्छन्नो विचरिष्यसि
Yudhishthira uvacha
Sahadeva katham tasya samipe viharishyasi
Kim va tvam tata kurvanah prachchhanno vicharishyasi
3.6
सहदेव उवाच
गोसंख्याता भविष्यामि विराटस्य महीपतेः
प्रतिषेद्धा च दोग्धा च संख्याने कुशलो गवाम्
Sahadeva uvacha
Gosankhyata bhavishyami viratasya mahipateh
Pratisheddha cha dogdha cha sankhyane kushalo gavam
3.7
तन्तिपाल इति ख्यातो नाम्ना विदितमस्तु ते
निपुणं च चरिष्यामि व्येतु ते मानसो ज्वरः
Tantipala iti khyato namna viditamastu te
Nipunam cha charishyami vyetu te manaso jvarah
3.8
अहं हि भवता गोषु सततं प्रकृतः पुरा
तत्र मे कौशलं कर्म अवबुद्धं विशां पते
Aham hi bhavata goshu satatam prakritah pura
Tatra me kaushalam karma avabuddham visham pate
3.9
लक्षणं चरितं चापि गवां यच्चापि मङ्गलम्
तत्सर्वं मे सुविदितमन्यच्चापि महीपते
Lakshanam charitam chapi gavam yachchapi mangalam
Tatsarvam me suviditamanyachchapi mahipate
3.10
वृषभानपि जानामि राजन्पूजितलक्षणान्
येषां मूत्रमुपाघ्राय अपि वन्ध्या प्रसूयते
Vrishabhanapi janami rajanpujitalakshanan
Yesham mutramupaghraya api vandhya prasuyate
3.11
सोऽहमेवं चरिष्यामि प्रीतिरत्र हि मे सदा
न च मां वेत्स्यति परस्तत्ते रोचतु पार्थिव
Sohamevam charishyami pritiratra hi me sada
Na cha mam vetsyati parastatte rochatu parthiva
3.12
युधिष्ठिर उवाच
इयं तु नः प्रिया भार्या प्राणेभ्योऽपि गरीयसी
मातेव परिपाल्या च पूज्या ज्येष्ठेव च स्वसा
Yudhishthira uvacha
Iyam tu nah priya bharya pranebhyopi gariyasi
Mateva paripalya cha pujya jyeshtheva cha svasa
3.13
केन स्म कर्मणा कृष्णा द्रौपदी विचरिष्यति
न हि किंचिद्विजानाति कर्म कर्तुं यथा स्त्रियः
Kena sma karmana krishna draupadi vicharishyati
Na hi kinchidvijanati karma kartum yatha striyah
3.14
सुकुमारी च बाला च राजपुत्री यशस्विनी
पतिव्रता महाभागा कथं नु विचरिष्यति
Sukumari cha bala cha rajaputri yashasvini
Pativrata mahabhaga katham nu vicharishyati
3.15
माल्यगन्धानलंकारान्वस्त्राणि विविधानि च
एतान्येवाभिजानाति यतो जाता हि भामिनी
Malyagandhanalankaranvastrani vividhani cha
Etanyevabhijanati yato jata hi bhamini
3.16
द्रौपद्युवाच
सैरन्ध्र्योऽरक्षिता लोके भुजिष्याः सन्ति भारत
नैवमन्याः स्त्रियो यान्ति इति लोकस्य निश्चयः
Draupadyuvacha
Sairandhryorakshita loke bhujishyah santi bharata
Naivamanyah striyo yanti iti lokasya nishchayah
3.17
साहं ब्रुवाणा सैरन्ध्री कुशला केशकर्मणि
आत्मगुप्ता चरिष्यामि यन्मां त्वमनुपृच्छसि
Saham bruvana sairandhri kushala keshakarmani
Atmagupta charishyami yanmam tvamanuprichchhasi
3.18
सुदेष्णां प्रत्युपस्थास्ये राजभार्यां यशस्विनीम्
सा रक्षिष्यति मां प्राप्तां मा ते भूद्दुःखमीदृशम्
Sudeshnam pratyupasthasye rajabharyam yashasvinim
Sa rakshishyati mam praptam ma te bhudduhkhamidrisham
3.19
युधिष्ठिर उवाच
कल्याणं भाषसे कृष्णे कुले जाता यथा वदेत्
न पापमभिजानासि साधु साध्वीव्रते स्थिता
Yudhishthira uvacha
Kalyanam bhashase krishne kule jata yatha vadet
Na papamabhijanasi sadhu sadhvivrate sthita