Utshovঅধ্যায় 2
2.1
ভীম উবাচ
পৌরোগবো ব্রুবাণোঽহং বল্লবো নাম নামতঃ
উপস্থাস্যামি রাজানং বিরাটমিতি মে মতিঃ
2.2
সূপানস্য করিষ্যামি কুশলোঽস্মি মহানসে
কৃতপূর্বাণি যৈরস্য ব্যঞ্জনানি সুশিক্ষিতৈঃ
তানপ্যভিভবিষ্যামি প্রীতিং সংজনয়ন্নহম্
2.3
আহরিষ্যামি দারূণাং নিচয়ান্মহতোঽপি চ
তত্প্রেক্ষ্য বিপুলং কর্ম রাজা প্রীতো ভবিষ্যতি
2.4
দ্বিপা বা বলিনো রাজন্বৃষভা বা মহাবলাঃ
বিনিগ্রাহ্যা যদি ময়া নিগ্রহীষ্যামি তানপি
2.5
যে চ কেচিন্নিয়োত্স্যন্তি সমাজেষু নিয়োধকাঃ
তানহং নিহনিষ্যামি প্রীতিং তস্য বিবর্ধয়ন্
2.6
ন ত্বেতান্যুধ্যমানান্বৈ হনিষ্যামি কথংচন
তথৈতান্পাতয়িষ্যামি যথা যাস্যন্তি ন ক্ষয়ম্
2.7
আরালিকো গোবিকর্তা সূপকর্তা নিয়োধকঃ
আসং যুধিষ্ঠিরস্যাহমিতি বক্ষ্যামি পৃচ্ছতঃ
2.8
আত্মানমাত্মনা রক্ষংশ্চরিষ্যামি বিশাং পতে
ইত্যেতত্প্রতিজানামি বিহরিষ্যাম্যহং যথা
2.9
যুধিষ্ঠির উবাচ
যমগ্নির্ব্রাহ্মণো ভূত্বা সমাগচ্ছন্নৃণাং বরম্
দিধক্ষুঃ খাণ্ডবং দাবং দাশার্হসহিতং পুরা
2.10
মহাবলং মহাবাহুমজিতং কুরুনন্দনম্
সোঽয়ং কিং কর্ম কৌন্তেয়ঃ করিষ্যতি ধনংজয়ঃ
2.11
যোঽয়মাসাদ্য তং দাবং তর্পয়ামাস পাবকম্
বিজিত্যৈকরথেনেন্দ্রং হত্বা পন্নগরাক্ষসান্
শ্রেষ্ঠঃ প্রতিয়ুধাং নাম সোঽর্জুনঃ কিং করিষ্যতি
2.12
সূর্যঃ প্রতপতাং শ্রেষ্ঠো দ্বিপদাং ব্রাহ্মণো বরঃ
আশীবিষশ্চ সর্পাণামগ্নিস্তেজস্বিনাং বরঃ
2.13
আয়ুধানাং বরো বজ্রঃ ককুদ্মী চ গবাং বরঃ
হ্রদানামুদধিঃ শ্রেষ্ঠঃ পর্জন্যো বর্ষতাং বরঃ
2.14
ধৃতরাষ্ট্রশ্চ নাগানাং হস্তিষ্বৈরাবতো বরঃ
পুত্রঃ প্রিয়াণামধিকো ভার্যা চ সুহৃদাং বরা
2.15
যথৈতানি বিশিষ্টানি জাত্যাং জাত্যাং বৃকোদর
এবং যুবা গুডাকেশঃ শ্রেষ্ঠঃ সর্বধনুষ্মতাম্
2.16
সোঽয়মিন্দ্রাদনবরো বাসুদেবাচ্চ ভারত
গাণ্ডীবধন্বা শ্বেতাশ্বো বীভত্সুঃ কিং করিষ্যতি
2.17
উষিত্বা পঞ্চ বর্ষাণি সহস্রাক্ষস্য বেশ্মনি
দিব্যান্যস্ত্রাণ্যবাপ্তানি দেবরূপেণ ভাস্বতা
2.18
যং মন্যে দ্বাদশং রুদ্রমাদিত্যানাং ত্রয়োদশম্
যস্য বাহূ সমৌ দীর্ঘৌ জ্যাঘাতকঠিনত্বচৌ
দক্ষিণে চৈব সব্যে চ গবামিব বহঃ কৃতঃ
2.19
হিমবানিব শৈলানাং সমুদ্রঃ সরিতামিব
ত্রিদশানাং যথা শক্রো বসূনামিব হব্যবাট্
2.20
মৃগাণামিব শার্দূলো গরুডঃ পততামিব
বরঃ সংনহ্যমানানামর্জুনঃ কিং করিষ্যতি
2.21
অর্জুন উবাচ
প্রতিজ্ঞাং ষণ্ঢকোঽস্মীতি করিষ্যামি মহীপতে
জ্যাঘাতৌ হি মহান্তৌ মে সংবর্তুং নৃপ দুষ্করৌ
2.22
কর্ণয়োঃ প্রতিমুচ্যাহং কুণ্ডলে জ্বলনোপমে
বেণীকৃতশিরা রাজন্নাম্না চৈব বৃহন্নডা
2.23
পঠন্নাখ্যায়িকাং নাম স্ত্রীভাবেন পুনঃ পুনঃ
রময়িষ্যে মহীপালমন্যাংশ্চান্তঃপুরে জনান্
2.24
গীতং নৃত্তং বিচিত্রং চ বাদিত্রং বিবিধং তথা
শিক্ষয়িষ্যাম্যহং রাজন্বিরাটভবনে স্ত্রিয়ঃ
2.25
প্রজানাং সমুদাচারং বহু কর্মকৃতং বদন্
ছাদয়িষ্যামি কৌন্তেয় মায়য়াত্মানমাত্মনা
2.26
যুধিষ্ঠিরস্য গেহেঽস্মি দ্রৌপদ্যাঃ পরিচারিকা
উষিতাস্মীতি বক্ষ্যামি পৃষ্টো রাজ্ঞা চ ভারত
2.27
এতেন বিধিনা ছন্নঃ কৃতকেন যথা নলঃ
বিহরিষ্যামি রাজেন্দ্র বিরাটভবনে সুখম্