অধ্যায় 1

1.1

জনমেজয় উবাচ
কথং বিরাটনগরে মম পূর্বপিতামহাঃ
অজ্ঞাতবাসমুষিতা দুর্যোধনভয়ার্দিতাঃ

বৈশংপায়ন উবাচ
তথা তু স বরাঁল্লব্ধ্বা ধর্মাদ্ধর্মভৃতাং বরঃ
গত্বাশ্রমং ব্রাহ্মণেভ্য আচখ্যৌ সর্বমেব তৎ

কথয়িত্বা তু তত্সর্বং ব্রাহ্মণেভ্যো যুধিষ্ঠিরঃ
অরণীসহিতং তস্মৈ ব্রাহ্মণায় ন্যবেদয়ৎ

ততো যুধিষ্ঠিরো রাজা ধর্মপুত্রো মহামনাঃ
সংনিবর্ত্যানুজান্সর্বানিতি হোবাচ ভারত

দ্বাদশেমানি বর্ষাণি রাষ্ট্রাদ্বিপ্রোষিতা বয়ম্
ত্রয়োদশোঽয়ং সংপ্রাপ্তঃ কৃচ্ছ্রঃ পরমদুর্বসঃ

স সাধু কৌন্তেয় ইতো বাসমর্জুন রোচয়
যত্রেমা বসতীঃ সর্বা বসেমাবিদিতাঃ পরৈঃ

অর্জুন উবাচ
তস্যৈব বরদানেন ধর্মস্য মনুজাধিপ
অজ্ঞাতা বিচরিষ্যামো নরাণাং ভরতর্ষভ

কিং তু বাসায় রাষ্ট্রাণি কীর্তয়িষ্যামি কানিচিৎ
রমণীয়ানি গুপ্তানি তেষাং কিংচিত্স্ম রোচয়

সন্তি রম্যা জনপদা বহ্বন্নাঃ পরিতঃ কুরূন্
পাঞ্চালাশ্চেদিমত্স্যাশ্চ শূরসেনাঃ পটচ্চরাঃ
দশার্ণা নবরাষ্ট্রং চ মল্লাঃ শাল্বা যুগংধরাঃ

এতেষাং কতমো রাজন্নিবাসস্তব রোচতে
বত্স্যামো যত্র রাজেন্দ্র সংবত্সরমিমং বয়ম্

যুধিষ্ঠির উবাচ
এবমেতন্মহাবাহো যথা স ভগবান্প্রভুঃ
অব্রবীত্সর্বভূতেশস্তত্তথা ন তদন্যথা

অবশ্যং ত্বেব বাসার্থং রমণীয়ং শিবং সুখম্
সংমন্ত্র্য সহিতৈঃ সর্বৈর্দ্রষ্টব্যমকুতোভয়ম্

মত্স্যো বিরাটো বলবানভিরক্ষেত্স পাণ্ডবান্
ধর্মশীলো বদান্যশ্চ বৃদ্ধশ্চ সুমহাধনঃ

বিরাটনগরে তাত সংবত্সরমিমং বয়ম্
কুর্বন্তস্তস্য কর্মাণি বিহরিষ্যাম ভারত

যানি যানি চ কর্মাণি তস্য শক্ষ্যামহে বয়ম্
কর্তুং যো যত্স তত্কর্ম ব্রবীতু কুরুনন্দনাঃ

অর্জুন উবাচ
নরদেব কথং কর্ম রাষ্ট্রে তস্য করিষ্যসি
বিরাটনৃপতেঃ সাধো রংস্যসে কেন কর্মণা

মৃদুর্বদান্যো হ্রীমাংশ্চ ধার্মিকঃ সত্যবিক্রমঃ
রাজংস্ত্বমাপদা ক্লিষ্টঃ কিং করিষ্যসি পাণ্ডব

ন দুঃখমুচিতং কিংচিদ্রাজন্বেদ যথা জনঃ
স ইমামাপদং প্রাপ্য কথং ঘোরাং তরিষ্যসি

যুধিষ্ঠির উবাচ
শৃণুধ্বং যত্করিষ্যামি কর্ম বৈ কুরুনন্দনাঃ
বিরাটমনুসংপ্রাপ্য রাজানং পুরুষর্ষভম্

সভাস্তারো ভবিষ্যামি তস্য রাজ্ঞো মহাত্মনঃ
কঙ্কো নাম দ্বিজো ভূত্বা মতাক্ষঃ প্রিয়দেবিতা

বৈডূর্যান্কাঞ্চনান্দান্তান্ফলৈর্জ্যোতীরসৈঃ সহ
কৃষ্ণাক্ষাঁল্লোহিতাক্ষাংশ্চ নির্বর্ত্স্যামি মনোরমান্

আসং যুধিষ্ঠিরস্যাহং পুরা প্রাণসমঃ সখা
ইতি বক্ষ্যামি রাজানং যদি মামনুয়োক্ষ্যতে

ইত্যেতদ্বো ময়াখ্যাতং বিহরিষ্যাম্যহং যথা
বৃকোদর বিরাটে ত্বং রংস্যসে কেন কর্মণা