Utshovঅধ্যায় 1
1.1
জনমেজয় উবাচ
এবং দ্যূতজিতাঃ পার্থাঃ কোপিতাশ্চ দুরাত্মভিঃ
ধার্তরাষ্ট্রৈঃ সহামাত্যৈর্নিকৃত্যা দ্বিজসত্তম
1.2
শ্রাবিতাঃ পরুষা বাচঃ সৃজদ্ভির্বৈরমুত্তমম্
কিমকুর্বন্ত কৌরব্যা মম পূর্বপিতামহাঃ
1.3
কথং চৈশ্বর্যবিভ্রষ্টাঃ সহসা দুঃখমেয়ুষঃ
বনে বিজহ্রিরে পার্থাঃ শক্রপ্রতিমতেজসঃ
1.4
কে চৈনানন্ববর্তন্ত প্রাপ্তান্ব্যসনমুত্তমম্
কিমাহারাঃ কিমাচারাঃ ক্ব চ বাসো মহাত্মনাম্
1.5
কথং দ্বাদশ বর্ষাণি বনে তেষাং মহাত্মনাম্
ব্যতীয়ুর্ব্রাহ্মণশ্রেষ্ঠ শূরাণামরিঘাতিনাম্
1.6
কথং চ রাজপুত্রী সা প্রবরা সর্বয়োষিতাম্
পতিব্রতা মহাভাগা সততং সত্যবাদিনী
বনবাসমদুঃখার্হা দারুণং প্রত্যপদ্যত
1.7
এতদাচক্ষ্ব মে সর্বং বিস্তরেণ তপোধন
শ্রোতুমিচ্ছামি চরিতং ভূরিদ্রবিণতেজসাম্
কথ্যমানং ত্বয়া বিপ্র পরং কৌতূহলং হি মে
1.8
বৈশংপায়ন উবাচ
এবং দ্যূতজিতাঃ পার্থাঃ কোপিতাশ্চ দুরাত্মভিঃ
ধার্তরাষ্ট্রৈঃ সহামাত্যৈর্নির্যয়ুর্গজসাহ্বয়াৎ
1.9
বর্ধমানপুরদ্বারেণাভিনিষ্ক্রম্য তে তদা
উদঙ্মুখাঃ শস্ত্রভৃতঃ প্রয়য়ুঃ সহ কৃষ্ণয়া
1.10
ইন্দ্রসেনাদয়শ্চৈনান্ভৃত্যাঃ পরিচতুর্দশ
রথৈরনুয়য়ুঃ শীঘ্রৈঃ স্ত্রিয় আদায় সর্বশঃ
1.11
ব্রজতস্তান্বিদিত্বা তু পৌরাঃ শোকাভিপীডিতাঃ
গর্হয়ন্তোঽসকৃদ্ভীষ্মবিদুরদ্রোণগৌতমান্
ঊচুর্বিগতসংত্রাসাঃ সমাগম্য পরস্পরম্
1.12
নেদমস্তি কুলং সর্বং ন বয়ং ন চ নো গৃহাঃ
যত্র দুর্যোধনঃ পাপঃ সৌবলেয়েন পালিতঃ
কর্ণদুঃশাসনাভ্যাং চ রাজ্যমেতচ্চিকীর্ষতি
1.13
নো চেত্কুলং ন চাচারো ন ধর্মোঽর্থঃ কুতঃ সুখম্
যত্র পাপসহায়োঽয়ং পাপো রাজ্যং বুভূষতে
1.14
দুর্যোধনো গুরুদ্বেষী ত্যক্তাচারসুহৃজ্জনঃ
অর্থলুব্ধোঽভিমানী চ নীচঃ প্রকৃতিনির্ঘৃণঃ
1.15
নেয়মস্তি মহী কৃত্স্না যত্র দুর্যোধনো নৃপঃ
সাধু গচ্ছামহে সর্বে যত্র গচ্ছন্তি পাণ্ডবাঃ
1.16
সানুক্রোশা মহাত্মানো বিজিতেন্দ্রিয়শত্রবঃ
হ্রীমন্তঃ কীর্তিমন্তশ্চ ধর্মাচারপরায়ণাঃ
1.17
এবমুক্ত্বানুজগ্মুস্তান্পাণ্ডবাংস্তে সমেত্য চ
ঊচুঃ প্রাঞ্জলয়ঃ সর্বে তান্কুন্তীমাদ্রিনন্দনান্
1.18
ক্ব গমিষ্যথ ভদ্রং বস্ত্যক্ত্বাস্মান্দুঃখভাগিনঃ
বয়মপ্যনুয়াস্যামো যত্র যূয়ং গমিষ্যথ
1.19
অধর্মেণ জিতাঞ্শ্রুত্বা যুষ্মাংস্ত্যক্তঘৃণৈঃ পরৈঃ
উদ্বিগ্নাঃ স্ম ভৃশং সর্বে নাস্মান্হাতুমিহার্হথ
1.20
ভক্তানুরক্তাঃ সুহৃদঃ সদা প্রিয়হিতে রতান্
কুরাজাধিষ্ঠিতে রাজ্যে ন বিনশ্যেম সর্বশঃ
1.21
শ্রূয়তাং চাভিধাস্যামো গুণদোষান্নরর্ষভাঃ
শুভাশুভাধিবাসেন সংসর্গং কুরুতে যথা
1.22
বস্ত্রমাপস্তিলান্ভূমিং গন্ধো বাসয়তে যথা
পুষ্পাণামধিবাসেন তথা সংসর্গজা গুণাঃ
1.23
মোহজালস্য যোনির্হি মূঢৈরেব সমাগমঃ
অহন্যহনি ধর্মস্য যোনিঃ সাধুসমাগমঃ
1.24
তস্মাত্প্রাজ্ঞৈশ্চ বৃদ্ধৈশ্চ সুস্বভাবৈস্তপস্বিভিঃ
সদ্ভিশ্চ সহ সংসর্গঃ কার্যঃ শমপরায়ণৈঃ
1.25
যেষাং ত্রীণ্যবদাতানি যোনির্বিদ্যা চ কর্ম চ
তান্সেবেত্তৈঃ সমাস্যা হি শাস্ত্রেভ্যোঽপি গরীয়সী
1.26
নিরারম্ভা হ্যপি বয়ং পুণ্যশীলেষু সাধুষু
পুণ্যমেবাপ্নুয়ামেহ পাপং পাপোপসেবনাৎ
1.27
অসতাং দর্শনাত্স্পর্শাত্সংজল্পনসহাসনাৎ
ধর্মাচারাঃ প্রহীয়ন্তে ন চ সিধ্যন্তি মানবাঃ
1.28
বুদ্ধিশ্চ হীয়তে পুংসাং নীচৈঃ সহ সমাগমাৎ
মধ্যমৈর্মধ্যতাং যাতি শ্রেষ্ঠতাং যাতি চোত্তমৈঃ
1.29
যে গুণাঃ কীর্তিতা লোকে ধর্মকামার্থসংভবাঃ
লোকাচারাত্মসংভূতা বেদোক্তাঃ শিষ্টসংমতাঃ
1.30
তে যুষ্মাসু সমস্তাশ্চ ব্যস্তাশ্চৈবেহ সদ্গুণাঃ
ইচ্ছামো গুণবন্মধ্যে বস্তুং শ্রেয়োঽভিকাঙ্ক্ষিণঃ
1.31
যুধিষ্ঠির উবাচ
ধন্যা বয়ং যদস্মাকং স্নেহকারুণ্যয়ন্ত্রিতাঃ
অসতোঽপি গুণানাহুর্ব্রাহ্মণপ্রমুখাঃ প্রজাঃ
1.32
তদহং ভ্রাতৃসহিতঃ সর্বান্বিজ্ঞাপয়ামি বঃ
নান্যথা তদ্ধি কর্তব্যমস্মত্স্নেহানুকম্পয়া
1.33
ভীষ্মঃ পিতামহো রাজা বিদুরো জননী চ মে
সুহৃজ্জনশ্চ প্রায়ো মে নগরে নাগসাহ্বয়ে
1.34
তে ত্বস্মদ্ধিতকামার্থং পালনীয়াঃ প্রয়ত্নতঃ
যুষ্মাভিঃ সহিতৈঃ সর্বৈঃ শোকসংতাপবিহ্বলাঃ
1.35
নিবর্ততাগতা দূরং সমাগমনশাপিতাঃ
স্বজনে ন্যাসভূতে মে কার্যা স্নেহান্বিতা মতিঃ
1.36
এতদ্ধি মম কার্যাণাং পরমং হৃদি সংস্থিতম্
সুকৃতানেন মে তুষ্টিঃ সত্কারশ্চ ভবিষ্যতি
1.37
বৈশংপায়ন উবাচ
তথানুমন্ত্রিতাস্তেন ধর্মরাজেন তাঃ প্রজাঃ
চক্রুরার্তস্বরং ঘোরং হা রাজন্নিতি দুঃখিতাঃ
1.38
গুণান্পার্থস্য সংস্মৃত্য দুঃখার্তাঃ পরমাতুরাঃ
অকামাঃ সংন্যবর্তন্ত সমাগম্যাথ পাণ্ডবান্
1.39
নিবৃত্তেষু তু পৌরেষু রথানাস্থায় পাণ্ডবাঃ
প্রজগ্মুর্জাহ্নবীতীরে প্রমাণাখ্যং মহাবটম্
1.40
তং তে দিবসশেষেণ বটং গত্বা তু পাণ্ডবাঃ
ঊষুস্তাং রজনীং বীরাঃ সংস্পৃশ্য সলিলং শুচি
উদকেনৈব তাং রাত্রিমূষুস্তে দুঃখকর্শিতাঃ
1.41
অনুজগ্মুশ্চ তত্রৈতান্স্নেহাত্কেচিদ্দ্বিজাতয়ঃ
সাগ্নয়োঽনগ্নয়শ্চৈব সশিষ্যগণবান্ধবাঃ
স তৈঃ পরিবৃতো রাজা শুশুভে ব্রহ্মবাদিভিঃ
1.42
তেষাং প্রাদুষ্কৃতাগ্নীনাং মুহূর্তে রম্যদারুণে
ব্রহ্মঘোষপুরস্কারঃ সংজল্পঃ সমজায়ত
1.43
রাজানং তু কুরুশ্রেষ্ঠং তে হংসমধুরস্বরাঃ
আশ্বাসয়ন্তো বিপ্রাগ্র্যাঃ ক্ষপাং সর্বাং ব্যনোদয়ন্