Utshovঅধ্যায় 2
2.1
বৈশংপায়ন উবাচ
প্রভাতায়াং তু শর্বর্যাং তেষামক্লিষ্টকর্মণাম্
বনং যিয়াসতাং বিপ্রাস্তস্থুর্ভিক্ষাভুজোঽগ্রতঃ
তানুবাচ ততো রাজা কুন্তীপুত্রো যুধিষ্ঠিরঃ
2.2
বয়ং হি হৃতসর্বস্বা হৃতরাজ্যা হৃতশ্রিয়ঃ
ফলমূলামিষাহারা বনং যাস্যাম দুঃখিতাঃ
2.3
বনং চ দোষবহুলং বহুব্যালসরীসৃপম্
পরিক্লেশশ্চ বো মন্যে ধ্রুবং তত্র ভবিষ্যতি
2.4
ব্রাহ্মণানাং পরিক্লেশো দৈবতান্যপি সাদয়েৎ
কিং পুনর্মামিতো বিপ্রা নিবর্তধ্বং যথেষ্টতঃ
2.5
ব্রাহ্মণা ঊচুঃ
গতির্যা ভবতাং রাজংস্তাং বয়ং গন্তুমুদ্যতাঃ
নার্হথাস্মান্পরিত্যক্তুং ভক্তান্সদ্ধর্মদর্শিনঃ
2.6
অনুকম্পাং হি ভক্তেষু দৈবতান্যপি কুর্বতে
বিশেষতো ব্রাহ্মণেষু সদাচারাবলম্বিষু
2.7
যুধিষ্ঠির উবাচ
মমাপি পরমা ভক্তির্ব্রাহ্মণেষু সদা দ্বিজাঃ
সহায়বিপরিভ্রংশস্ত্বয়ং সাদয়তীব মাম্
2.8
আহরেয়ুর্হি মে যেঽপি ফলমূলমৃগাংস্তথা
ত ইমে শোকজৈর্দুঃখৈর্ভ্রাতরো মে বিমোহিতাঃ
2.9
দ্রৌপদ্যা বিপ্রকর্ষেণ রাজ্যাপহরণেন চ
দুঃখান্বিতানিমান্ক্লেশৈর্নাহং যোক্তুমিহোত্সহে
2.10
ব্রাহ্মণা ঊচুঃ
অস্মত্পোষণজা চিন্তা মা ভূত্তে হৃদি পার্থিব
স্বয়মাহৃত্য বন্যানি অনুয়াস্যামহে বয়ম্
2.11
অনুধ্যানেন জপ্যেন বিধাস্যামঃ শিবং তব
কথাভিশ্চানুকূলাভিঃ সহ রংস্যামহে বনে
2.12
যুধিষ্ঠির উবাচ
এবমেতন্ন সংদেহো রমেয়ং ব্রাহ্মণৈঃ সহ
ন্যূনভাবাত্তু পশ্যামি প্রত্যাদেশমিবাত্মনঃ
2.13
কথং দ্রক্ষ্যামি বঃ সর্বান্স্বয়মাহৃতভোজনান্
মদ্ভক্ত্যা ক্লিশ্যতোঽনর্হান্ধিক্পাপান্ধৃতরাষ্ট্রজান্
2.14
বৈশংপায়ন উবাচ
ইত্যুক্ত্বা স নৃপঃ শোচন্নিষসাদ মহীতলে
তমধ্যাত্মরতির্বিদ্বাঞ্শৌনকো নাম বৈ দ্বিজঃ
যোগে সাংখ্যে চ কুশলো রাজানমিদমব্রবীৎ
2.15
শোকস্থানসহস্রাণি ভয়স্থানশতানি চ
দিবসে দিবসে মূঢমাবিশন্তি ন পণ্ডিতম্
2.16
ন হি জ্ঞানবিরুদ্ধেষু বহুদোষেষু কর্মসু
শ্রেয়োঘাতিষু সজ্জন্তে বুদ্ধিমন্তো ভবদ্বিধাঃ
2.17
অষ্টাঙ্গাং বুদ্ধিমাহুর্যাং সর্বাশ্রেয়োবিঘাতিনীম্
শ্রুতিস্মৃতিসমায়ুক্তাং সা রাজংস্ত্বয্যবস্থিতা
2.18
অর্থকৃচ্ছ্রেষু দুর্গেষু ব্যাপত্সু স্বজনস্য চ
শারীরমানসৈর্দুঃখৈর্ন সীদন্তি ভবদ্বিধাঃ
2.19
শ্রূয়তাং চাভিধাস্যামি জনকেন যথা পুরা
আত্মব্যবস্থানকরা গীতাঃ শ্লোকা মহাত্মনা
2.20
মনোদেহসমুত্থাভ্যাং দুঃখাভ্যামর্দিতং জগৎ
তয়োর্ব্যাসসমাসাভ্যাং শমোপায়মিমং শৃণু
2.21
ব্যাধেরনিষ্টসংস্পর্শাচ্ছ্রমাদিষ্টবিবর্জনাৎ
দুঃখং চতুর্ভিঃ শারীরং কারণৈঃ সংপ্রবর্ততে
2.22
তদাশুপ্রতিকারাচ্চ সততং চাবিচিন্তনাৎ
আধিব্যাধিপ্রশমনং ক্রিয়ায়োগদ্বয়েন তু
2.23
মতিমন্তো হ্যতো বৈদ্যাঃ শমং প্রাগেব কুর্বতে
মানসস্য প্রিয়াখ্যানৈঃ সংভোগোপনয়ৈর্নৃণাম্
2.24
মানসেন হি দুঃখেন শরীরমুপতপ্যতে
অয়ঃপিণ্ডেন তপ্তেন কুম্ভসংস্থমিবোদকম্
2.25
মানসং শময়েত্তস্মাজ্জ্ঞানেনাগ্নিমিবাম্বুনা
প্রশান্তে মানসে দুঃখে শারীরমুপশাম্যতি
2.26
মনসো দুঃখমূলং তু স্নেহ ইত্যুপলভ্যতে
স্নেহাত্তু সজ্জতে জন্তুর্দুঃখয়োগমুপৈতি চ
2.27
স্নেহমূলানি দুঃখানি স্নেহজানি ভয়ানি চ
শোকহর্ষৌ তথায়াসঃ সর্বং স্নেহাত্প্রবর্ততে
2.28
স্নেহাত্করণরাগশ্চ প্রজজ্ঞে বৈষয়স্তথা
অশ্রেয়স্কাবুভাবেতৌ পূর্বস্তত্র গুরুঃ স্মৃতঃ
2.29
কোটরাগ্নির্যথাশেষং সমূলং পাদপং দহেৎ
ধর্মার্থিনং তথাল্পোঽপি রাগদোষো বিনাশয়েৎ
2.30
বিপ্রয়োগে ন তু ত্যাগী দোষদর্শী সমাগমাৎ
বিরাগং ভজতে জন্তুর্নির্বৈরো নিষ্পরিগ্রহঃ
2.31
তস্মাত্স্নেহং স্বপক্ষেভ্যো মিত্রেভ্যো ধনসংচয়াৎ
স্বশরীরসমুত্থং তু জ্ঞানেন বিনিবর্তয়েৎ
2.32
জ্ঞানান্বিতেষু মুখ্যেষু শাস্ত্রজ্ঞেষু কৃতাত্মসু
ন তেষু সজ্জতে স্নেহঃ পদ্মপত্রেষ্বিবোদকম্
2.33
রাগাভিভূতঃ পুরুষঃ কামেন পরিকৃষ্যতে
ইচ্ছা সংজায়তে তস্য ততস্তৃষ্ণা প্রবর্ততে
2.34
তৃষ্ণা হি সর্বপাপিষ্ঠা নিত্যোদ্বেগকরী নৃণাম্
অধর্মবহুলা চৈব ঘোরা পাপানুবন্ধিনী
2.35
যা দুস্ত্যজা দুর্মতিভির্যা ন জীর্যতি জীর্যতঃ
যোঽসৌ প্রাণান্তিকো রোগস্তাং তৃষ্ণাং ত্যজতঃ সুখম্
2.36
অনাদ্যন্তা তু সা তৃষ্ণা অন্তর্দেহগতা নৃণাম্
বিনাশয়তি সংভূতা অয়োনিজ ইবানলঃ
2.37
যথৈধঃ স্বসমুত্থেন বহ্নিনা নাশমৃচ্ছতি
তথাকৃতাত্মা লোভেন সহজেন বিনশ্যতি
2.38
রাজতঃ সলিলাদগ্নেশ্চোরতঃ স্বজনাদপি
ভয়মর্থবতাং নিত্যং মৃত্যোঃ প্রাণভৃতামিব
2.39
যথা হ্যামিষমাকাশে পক্ষিভিঃ শ্বাপদৈর্ভুবি
ভক্ষ্যতে সলিলে মত্স্যৈস্তথা সর্বেণ বিত্তবান্
2.40
অর্থ এব হি কেষাংচিদনর্থো ভবিতা নৃণাম্
অর্থশ্রেয়সি চাসক্তো ন শ্রেয়ো বিন্দতে নরঃ
তস্মাদর্থাগমাঃ সর্বে মনোমোহবিবর্ধনাঃ
2.41
কার্পণ্যং দর্পমানৌ চ ভয়মুদ্বেগ এব চ
অর্থজানি বিদুঃ প্রাজ্ঞা দুঃখান্যেতানি দেহিনাম্
2.42
অর্থস্যোপার্জনে দুঃখং পালনে চ ক্ষয়ে তথা
নাশে দুঃখং ব্যয়ে দুঃখং ঘ্নন্তি চৈবার্থকারণাৎ
2.43
অর্থা দুঃখং পরিত্যক্তুং পালিতাশ্চাপি তেঽসুখাঃ
দুঃখেন চাধিগম্যন্তে তেষাং নাশং ন চিন্তয়েৎ
2.44
অসংতোষপরা মূঢাঃ সংতোষং যান্তি পণ্ডিতাঃ
অন্তো নাস্তি পিপাসায়াঃ সংতোষঃ পরমং সুখম্
2.45
তস্মাত্সংতোষমেবেহ ধনং পশ্যন্তি পণ্ডিতাঃ
অনিত্যং যৌবনং রূপং জীবিতং দ্রব্যসংচয়ঃ
ঐশ্বর্যং প্রিয়সংবাসো গৃধ্যেদেষু ন পণ্ডিতঃ
2.46
ত্যজেত সংচয়াংস্তস্মাত্তজ্জং ক্লেশং সহেত কঃ
ন হি সংচয়বান্কশ্চিদ্দৃশ্যতে নিরুপদ্রবঃ
2.47
অতশ্চ ধর্মিভিঃ পুম্ভিরনীহার্থঃ প্রশস্যতে
প্রক্ষালনাদ্ধি পঙ্কস্য দূরাদস্পর্শনং বরম্
2.48
যুধিষ্ঠিরৈবমর্থেষু ন স্পৃহাং কর্তুমর্হসি
ধর্মেণ যদি তে কার্যং বিমুক্তেচ্ছো ভবার্থতঃ
2.49
যুধিষ্ঠির উবাচ
নার্থোপভোগলিপ্সার্থমিয়মর্থেপ্সুতা মম
ভরণার্থং তু বিপ্রাণাং ব্রহ্মন্কাঙ্ক্ষে ন লোভতঃ
2.50
কথং হ্যস্মদ্বিধো ব্রহ্মন্বর্তমানো গৃহাশ্রমে
ভরণং পালনং চাপি ন কুর্যাদনুয়ায়িনাম্
2.51
সংবিভাগো হি ভূতানাং সর্বেষামেব শিষ্যতে
তথৈবাপচমানেভ্যঃ প্রদেয়ং গৃহমেধিনা
2.52
তৃণানি ভূমিরুদকং বাক্চতুর্থী চ সূনৃতা
সতামেতানি গেহেষু নোচ্ছিদ্যন্তে কদাচন
2.53
দেয়মার্তস্য শয়নং স্থিতশ্রান্তস্য চাসনম্
তৃষিতস্য চ পানীয়ং ক্ষুধিতস্য চ ভোজনম্
2.54
চক্ষুর্দদ্যান্মনো দদ্যাদ্বাচং দদ্যাচ্চ সূনৃতাম্
প্রত্যুদ্গম্যাভিগমনং কুর্যান্ন্যায়েন চার্চনম্
2.55
অঘিহোত্রমনড্বাংশ্চ জ্ঞাতয়োঽতিথিবান্ধবাঃ
পুত্রদারভৃতাশ্চৈব নির্দহেয়ুরপূজিতাঃ
2.56
নাত্মার্থং পাচয়েদন্নং ন বৃথা ঘাতয়েত্পশূন্
ন চ তত্স্বয়মশ্নীয়াদ্বিধিবদ্যন্ন নির্বপেৎ
2.57
শ্বভ্যশ্চ শ্বপচেভ্যশ্চ বয়োভ্যশ্চাবপেদ্ভুবি
বৈশ্বদেবং হি নামৈতত্সায়ংপ্রাতর্বিধীয়তে
2.58
বিঘসাশী ভবেত্তস্মান্নিত্যং চামৃতভোজনঃ
বিঘসং ভৃত্যশেষং তু যজ্ঞশেষং তথামৃতম্
2.59
এতাং যো বর্ততে বৃত্তিং বর্তমানো গৃহাশ্রমে
তস্য ধর্মং পরং প্রাহুঃ কথং বা বিপ্র মন্যসে
2.60
শৌনক উবাচ
অহো বত মহত্কষ্টং বিপরীতমিদং জগৎ
যেনাপত্রপতে সাধুরসাধুস্তেন তুষ্যতি
2.61
শিশ্নোদরকৃতেঽপ্রাজ্ঞঃ করোতি বিঘসং বহু
মোহরাগসমাক্রান্ত ইন্দ্রিয়ার্থবশানুগঃ
2.62
হ্রিয়তে বুধ্যমানোঽপি নরো হারিভিরিন্দ্রিয়ৈঃ
বিমূঢসংজ্ঞো দুষ্টাশ্বৈরুদ্ভ্রান্তৈরিব সারথিঃ
2.63
ষডিন্দ্রিয়াণি বিষয়ং সমাগচ্ছন্তি বৈ যদা
তদা প্রাদুর্ভবত্যেষাং পূর্বসংকল্পজং মনঃ
2.64
মনো যস্যেন্দ্রিয়গ্রামবিষয়ং প্রতি চোদিতম্
তস্যৌত্সুক্যং সংভবতি প্রবৃত্তিশ্চোপজায়তে
2.65
ততঃ সংকল্পবীর্যেণ কামেন বিষয়েষুভিঃ
বিদ্ধঃ পততি লোভাগ্নৌ জ্যোতির্লোভাত্পতংগবৎ
2.66
ততো বিহারৈরাহারৈর্মোহিতশ্চ বিশাং পতে
মহামোহমুখে মগ্নো নাত্মানমববুধ্যতে
2.67
এবং পততি সংসারে তাসু তাস্বিহ যোনিষু
অবিদ্যাকর্মতৃষ্ণাভির্ভ্রাম্যমাণোঽথ চক্রবৎ
2.68
ব্রহ্মাদিষু তৃণান্তেষু হূতেষু পরিবর্ততে
জলে ভুবি তথাকাশে জায়মানঃ পুনঃ পুনঃ
2.69
অবুধানাং গতিস্ত্বেষা বুধানামপি মে শৃণু
যে ধর্মে শ্রেয়সি রতা বিমোক্ষরতয়ো জনাঃ
2.70
যদিদং বেদবচনং কুরু কর্ম ত্যজেতি চ
তস্মাদ্ধর্মানিমান্সর্বান্নাভিমানাত্সমাচরেৎ
2.71
ইজ্যাধ্যয়নদানানি তপঃ সত্যং ক্ষমা দমঃ
অলোভ ইতি মার্গোঽয়ং ধর্মস্যাষ্টবিধঃ স্মৃতঃ
2.72
তত্র পূর্বশ্চতুর্বর্গঃ পিতৃয়ানপথে স্থিতঃ
কর্তব্যমিতি যত্কার্যং নাভিমানাত্সমাচরেৎ
2.73
উত্তরো দেবয়ানস্তু সদ্ভিরাচরিতঃ সদা
অষ্টাঙ্গেনৈব মার্গেণ বিশুদ্ধাত্মা সমাচরেৎ
2.74
সম্যক্সংকল্পসংবন্ধাত্সম্যক্চেন্দ্রিয়নিগ্রহাৎ
সম্যগ্ব্রতবিশেষাচ্চ সম্যক্চ গুরুসেবনাৎ
2.75
সম্যগাহারয়োগাচ্চ সম্যক্চাধ্যয়নাগমাৎ
সম্যক্কর্মোপসংন্যাসাত্সম্যক্চিত্তনিরোধনাৎ
এবং কর্মাণি কুর্বন্তি সংসারবিজিগীষবঃ
2.76
রাগদ্বেষবিনির্মুক্তা ঐশ্বর্যং দেবতা গতাঃ
রুদ্রাঃ সাধ্যাস্তথাদিত্যা বসবোঽথাশ্বিনাবপি
যোগৈশ্বর্যেণ সংয়ুক্তা ধারয়ন্তি প্রজা ইমাঃ
2.77
তথা ত্বমপি কৌন্তেয় শমমাস্থায় পুষ্কলম্
তপসা সিদ্ধিমন্বিচ্ছ যোগসিদ্ধিং চ ভারত
2.78
পিতৃমাতৃময়ী সিদ্ধিঃ প্রাপ্তা কর্মময়ী চ তে
তপসা সিদ্ধিমন্বিচ্ছ দ্বিজানাং ভরণায় বৈ
2.79
সিদ্ধা হি যদ্যদিচ্ছন্তি কুর্বতে তদনুগ্রহাৎ
তস্মাত্তপঃ সমাস্থায় কুরুষ্বাত্মমনোরথম্