অধ্যায় 29

29.1

ব্রাহ্মণ উবাচ
অত্রাপ্যুদাহরন্তীমমিতিহাসং পুরাতনম্
কার্তবীর্যস্য সংবাদং সমুদ্রস্য চ ভামিনি

কার্তবীর্যার্জুনো নাম রাজা বাহুসহস্রবান্
যেন সাগরপর্যন্তা ধনুষা নির্জিতা মহী

স কদাচিত্সমুদ্রান্তে বিচরন্বলদর্পিতঃ
অবাকিরচ্ছরশতৈঃ সমুদ্রমিতি নঃ শ্রুতম্

তং সমুদ্রো নমস্কৃত্য কৃতাঞ্জলিরুবাচ হ
মা মুঞ্চ বীর নারাচান্ব্রূহি কিং করবাণি তে

মদাশ্রয়াণি ভূতানি ত্বদ্বিসৃষ্টৈর্মহেষুভিঃ
বধ্যন্তে রাজশার্দূল তেভ্যো দেহ্যভয়ং বিভো

অর্জুন উবাচ
মত্সমো যদি সংগ্রামে শরাসনধরঃ ক্বচিৎ
বিদ্যতে তং মমাচক্ষ্ব যঃ সমাসীত মাং মৃধে

সমুদ্র উবাচ
মহর্ষির্জমদগ্নিস্তে যদি রাজন্পরিশ্রুতঃ
তস্য পুত্রস্তবাতিথ্যং যথাবত্কর্তুমর্হতি

ততঃ স রাজা প্রয়য়ৌ ক্রোধেন মহতা বৃতঃ
স তমাশ্রমমাগম্য রামমেবান্বপদ্যত

স রামপ্রতিকূলানি চকার সহ বন্ধুভিঃ
আয়াসং জনয়ামাস রামস্য চ মহাত্মনঃ

ততস্তেজঃ প্রজজ্বাল রামস্যামিততেজসঃ
প্রদহদ্রিপুসৈন্যানি তদা কমললোচনে

ততঃ পরশুমাদায় স তং বাহুসহস্রিণম্
চিচ্ছেদ সহসা রামো বাহুশাখমিব দ্রুমম্

তং হতং পতিতং দৃষ্ট্বা সমেতাঃ সর্ববান্ধবাঃ
অসীনাদায় শক্তীশ্চ ভার্গবং পর্যবারয়ন্

রামোঽপি ধনুরাদায় রথমারুহ্য সত্বরঃ
বিসৃজঞ্শরবর্ষাণি ব্যধমত্পার্থিবং বলম্

ততস্তু ক্ষত্রিয়াঃ কেচিজ্জমদগ্নিং নিহত্য চ
বিবিশুর্গিরিদুর্গাণি মৃগাঃ সিংহার্দিতা ইব

তেষাং স্ববিহিতং কর্ম তদ্ভয়ান্নানুতিষ্ঠতাম্
প্রজা বৃষলতাং প্রাপ্তা ব্রাহ্মণানামদর্শনাৎ

ত এতে দ্রমিডাঃ কাশাঃ পুণ্ড্রাশ্চ শবরৈঃ সহ
বৃষলত্বং পরিগতা ব্যুত্থানাত্ক্ষত্রধর্মতঃ

ততস্তু হতবীরাসু ক্ষত্রিয়াসু পুনঃ পুনঃ
দ্বিজৈরুত্পাদিতং ক্ষত্রং জামদগ্ন্যো ন্যকৃন্তত

একবিংশতিমেধান্তে রামং বাগশরীরিণী
দিব্যা প্রোবাচ মধুরা সর্বলোকপরিশ্রুতা

রাম রাম নিবর্তস্ব কং গুণং তাত পশ্যসি
ক্ষত্রবন্ধূনিমান্প্রাণৈর্বিপ্রয়োজ্য পুনঃ পুনঃ

তথৈব তং মহাত্মানমৃচীকপ্রমুখাস্তদা
পিতামহা মহাভাগ নিবর্তস্বেত্যথাব্রুবন্

পিতুর্বধমমৃষ্যংস্তু রামঃ প্রোবাচ তানৃষীন্
নার্হন্তীহ ভবন্তো মাং নিবারয়িতুমিত্যুত

পিতর ঊচুঃ
নার্হসে ক্ষত্রবন্ধূংস্ত্বং নিহন্তুং জয়তাং বর
ন হি যুক্তং ত্বয়া হন্তুং ব্রাহ্মণেন সতা নৃপান্