Utshovঅধ্যায় 28
28.1
ব্রাহ্মণ উবাচ
গন্ধান্ন জিঘ্রামি রসান্ন বেদ্মি; রূপং ন পশ্যামি ন চ স্পৃশামি
ন চাপি শব্দান্বিবিধাঞ্শৃণোমি; ন চাপি সংকল্পমুপৈমি কিংচিৎ
28.2
অর্থানিষ্টান্কাময়তে স্বভাবঃ; সর্বান্দ্বেষ্যান্প্রদ্বিষতে স্বভাবঃ
কামদ্বেষাবুদ্ভবতঃ স্বভাবা;ত্প্রাণাপানৌ জন্তুদেহান্নিবেশ্য
28.3
তেভ্যশ্চান্যাংস্তেষ্বনিত্যাংশ্চ ভাবা;ন্ভূতাত্মানং লক্ষয়েয়ং শরীরে
তস্মিংস্তিষ্ঠন্নাস্মি শক্যঃ কথংচি;ত্কামক্রোধাভ্যাং জরয়া মৃত্যুনা চ
28.4
অকাময়ানস্য চ সর্বকামা;নবিদ্বিষাণস্য চ সর্বদোষান্
ন মে স্বভাবেষু ভবন্তি লেপা;স্তোয়স্য বিন্দোরিব পুষ্করেষু
28.5
নিত্যস্য চৈতস্য ভবন্তি নিত্যা; নিরীক্ষমাণস্য বহূন্স্বভাবান্
ন সজ্জতে কর্মসু ভোগজালং; দিবীব সূর্যস্য ময়ূখজালম্
28.6
অত্রাপ্যুদাহরন্তীমমিতিহাসং পুরাতনম্
অধ্বর্যুয়তিসংবাদং তং নিবোধ যশস্বিনি
28.7
প্রোক্ষ্যমাণং পশুং দৃষ্ট্বা যজ্ঞকর্মণ্যথাব্রবীৎ
যতিরধ্বর্যুমাসীনো হিংসেয়মিতি কুত্সয়ন্
28.8
তমধ্বর্যুঃ প্রত্যুবাচ নায়ং ছাগো বিনশ্যতি
শ্রেয়সা যোক্ষ্যতে জন্তুর্যদি শ্রুতিরিয়ং তথা
28.9
যো হ্যস্য পার্থিবো ভাগঃ পৃথিবীং স গমিষ্যতি
যদস্য বারিজং কিংচিদপস্তত্প্রতিপদ্যতে
28.10
সূর্যং চক্ষুর্দিশঃ শ্রোত্রে প্রাণোঽস্য দিবমেব চ
আগমে বর্তমানস্য ন মে দোষোঽস্তি কশ্চন
28.11
যতিরুবাচ
প্রাণৈর্বিয়োগে ছাগস্য যদি শ্রেয়ঃ প্রপশ্যসি
ছাগার্থে বর্ততে যজ্ঞো ভবতঃ কিং প্রয়োজনম্
28.12
অনু ত্বা মন্যতাং মাতা পিতা ভ্রাতা সখাপি চ
মন্ত্রয়স্বৈনমুন্নীয় পরবন্তং বিশেষতঃ
28.13
য এবমনুমন্যেরংস্তান্ভবান্প্রষ্টুমর্হতি
তেষামনুমতং শ্রুত্বা শক্যা কর্তুং বিচারণা
28.14
প্রাণা অপ্যস্য ছাগস্য প্রাপিতাস্তে স্বয়োনিষু
শরীরং কেবলং শিষ্টং নিশ্চেষ্টমিতি মে মতিঃ
28.15
ইন্ধনস্য তু তুল্যেন শরীরেণ বিচেতসা
হিংসা নির্বেষ্টুকামানামিন্ধনং পশুসংজ্ঞিতম্
28.16
অহিংসা সর্বধর্মাণামিতি বৃদ্ধানুশাসনম্
যদহিংস্রং ভবেত্কর্ম তত্কার্যমিতি বিদ্মহে
28.17
অহিংসেতি প্রতিজ্ঞেয়ং যদি বক্ষ্যাম্যতঃ পরম্
শক্যং বহুবিধং বক্তুং ভবতঃ কার্যদূষণম্
28.18
অহিংসা সর্বভূতানাং নিত্যমস্মাসু রোচতে
প্রত্যক্ষতঃ সাধয়ামো ন পরোক্ষমুপাস্মহে
28.19
অধ্বর্যুরুবাচ
ভূমের্গন্ধগুণান্ভুঙ্ক্ষে পিবস্যাপোময়ান্রসান্
জ্যোতিষাং পশ্যসে রূপং স্পৃশস্যনিলজান্গুণান্
28.20
শৃণোষ্যাকাশজং শব্দং মনসা মন্যসে মতিম্
সর্বাণ্যেতানি ভূতানি প্রাণা ইতি চ মন্যসে
28.21
প্রাণাদানে চ নিত্যোঽসি হিংসায়াং বর্ততে ভবান্
নাস্তি চেষ্টা বিনা হিংসাং কিং বা ত্বং মন্যসে দ্বিজ
28.22
যতিরুবাচ
অক্ষরং চ ক্ষরং চৈব দ্বৈধীভাবোঽয়মাত্মনঃ
অক্ষরং তত্র সদ্ভাবঃ স্বভাবঃ ক্ষর উচ্যতে
28.23
প্রাণো জিহ্বা মনঃ সত্ত্বং স্বভাবো রজসা সহ
ভাবৈরেতৈর্বিমুক্তস্য নির্দ্বংদ্বস্য নিরাশিষঃ
28.24
সমস্য সর্বভূতেষু নির্মমস্য জিতাত্মনঃ
সমন্তাত্পরিমুক্তস্য ন ভয়ং বিদ্যতে ক্বচিৎ
28.25
অধ্বর্যুরুবাচ
সদ্ভিরেবেহ সংবাসঃ কার্যো মতিমতাং বর
ভবতো হি মতং শ্রুত্বা প্রতিভাতি মতির্মম
28.26
ভগবন্ভগবদ্বুদ্ধ্যা প্রতিবুদ্ধো ব্রবীম্যহম্
মতং মন্তুং ক্রতুং কর্তুং নাপরাধোঽস্তি মে দ্বিজ
28.27
ব্রাহ্মণ উবাচ
উপপত্ত্যা যতিস্তূষ্ণীং বর্তমানস্ততঃ পরম্
অধ্বর্যুরপি নির্মোহঃ প্রচচার মহামখে
28.28
এবমেতাদৃশং মোক্ষং সুসূক্ষ্মং ব্রাহ্মণা বিদুঃ
বিদিত্বা চানুতিষ্ঠন্তি ক্ষেত্রজ্ঞেনানুদর্শিনা