অধ্যায় 24

24.1

ব্রাহ্মণ উবাচ
অত্রাপ্যুদাহরন্তীমমিতিহাসং পুরাতনম্
নারদস্য চ সংবাদমৃষের্দেবমতস্য চ

দেবমত উবাচ
জন্তোঃ সংজায়মানস্য কিং নু পূর্বং প্রবর্ততে
প্রাণোঽপানঃ সমানো বা ব্যানো বোদান এব চ

নারদ উবাচ
যেনায়ং সৃজ্যতে জন্তুস্ততোঽন্যঃ পূর্বমেতি তম্
প্রাণদ্বংদ্বং চ বিজ্ঞেয়ং তির্যগং চোর্ধ্বগং চ যৎ

দেবমত উবাচ
কেনায়ং সৃজ্যতে জন্তুঃ কশ্চান্যঃ পূর্বমেতি তম্
প্রাণদ্বংদ্বং চ মে ব্রূহি তির্যগূর্ধ্বং চ নিশ্চয়াৎ

নারদ উবাচ
সংকল্পাজ্জায়তে হর্ষঃ শব্দাদপি চ জায়তে
রসাত্সংজায়তে চাপি রূপাদপি চ জায়তে

স্পর্শাত্সংজায়তে চাপি গন্ধাদপি চ জায়তে
এতদ্রূপমুদানস্য হর্ষো মিথুনসংভবঃ

কামাত্সংজায়তে শুক্রং কামাত্সংজায়তে রসঃ
সমানব্যানজনিতে সামান্যে শুক্রশোণিতে

শুক্রাচ্ছোণিতসংসৃষ্টাত্পূর্বং প্রাণঃ প্রবর্ততে
প্রাণেন বিকৃতে শুক্রে ততোঽপানঃ প্রবর্ততে

প্রাণাপানাবিদং দ্বংদ্বমবাক্চোর্ধ্বং চ গচ্ছতঃ
ব্যানঃ সমানশ্চৈবোভৌ তির্যগ্দ্বংদ্বত্বমুচ্যতে

অগ্নির্বৈ দেবতাঃ সর্বা ইতি বেদস্য শাসনম্
সংজায়তে ব্রাহ্মণেষু জ্ঞানং বুদ্ধিসমন্বিতম্

তস্য ধূমস্তমোরূপং রজো ভস্ম সুরেতসঃ
সত্ত্বং সংজায়তে তস্য যত্র প্রক্ষিপ্যতে হবিঃ

আঘারৌ সমানো ব্যানশ্চ ইতি যজ্ঞবিদো বিদুঃ
প্রাণাপানাবাজ্যভাগৌ তয়োর্মধ্যে হুতাশনঃ
এতদ্রূপমুদানস্য পরমং ব্রাহ্মণা বিদুঃ

নির্দ্বংদ্বমিতি যত্ত্বেতত্তন্মে নিগদতঃ শৃণু

অহোরাত্রমিদং দ্বংদ্বং তয়োর্মধ্যে হুতাশনঃ
এতদ্রূপমুদানস্য পরমং ব্রাহ্মণা বিদুঃ

উভে চৈবায়নে দ্বংদ্বং তয়োর্মধ্যে হুতাশনঃ
এতদ্রূপমুদানস্য পরমং ব্রাহ্মণা বিদুঃ

উভে সত্যানৃতে দ্বংদ্বং তয়োর্মধ্যে হুতাশনঃ
এতদ্রূপমুদানস্য পরমং ব্রাহ্মণা বিদুঃ

উভে শুভাশুভে দ্বংদ্বং তয়োর্মধ্যে হুতাশনঃ
এতদ্রূপমুদানস্য পরমং ব্রাহ্মণা বিদুঃ

সচ্চাসচ্চৈব তদ্দ্বংদ্বং তয়োর্মধ্যে হুতাশনঃ
এতদ্রূপমুদানস্য পরমং ব্রাহ্মণা বিদুঃ

প্রথমং সমানো ব্যানো ব্যস্যতে কর্ম তেন তৎ
তৃতীয়ং তু সমানেন পুনরেব ব্যবস্যতে

শান্ত্যর্থং বামদেবং চ শান্তির্ব্রহ্ম সনাতনম্
এতদ্রূপমুদানস্য পরমং ব্রাহ্মণা বিদুঃ