সূক্ত 4

4.1

ঋষভঃ ১-২৪ ব্রহ্মা। ঋষভঃ। ত্রিষ্টুপ্, ৮ ভুরিক্, ৬, ১০, ২৪ জগতী, ১১-১৭, ১৯-২০, ২৩ অনুষ্টুপ্, ১৮ উপরিষ্টাদ্বৃহতী, ২১ আস্তারপঙ্ক্তিঃ।

সাহস্রস্ত্বেষ ঋষভঃ পয়স্বান্ বিশ্বা রূপাণি বক্ষণাসু বিভ্রৎ।
ভদ্রং দাত্রে যজমানায় শীক্ষন্ বার্হস্পত্য উস্রিয়স্তন্তুমাতান্ ॥১॥

4.2

অপাং যো অগ্নে প্রতিমা বভূব প্রভূঃ সর্বস্মৈ পৃথিবীব দেবী।
পিতা বত্সানাং পতিরঘ্ন্যানাং সাহস্রে পোষে অপি নঃ কৃণোতু ॥২॥

4.3

পুমানন্তর্বান্ত্স্থবিরঃ পয়স্বান্ বসোঃ কবন্ধমৃষভো বিভর্তি ।
তমিন্দ্রায় পথিভির্দেবয়ানৈর্হুতমগ্নির্বহতু জাতবেদাঃ ॥৩॥

4.4

পিতা বত্সানাং পতিরঘ্ন্যানামথো পিতা মহতাং গর্গরাণাম্।
বত্সো জরায়ু প্রতিধুক্ পীয়ূষ আমিক্ষা ঘৃতং তদ্ বস্য রেতঃ ॥৪॥

4.5

দেবানাং ভাগ উপনাহ এষো৩পাং রস ওষধীনাং ঘৃতস্য ।
সোমস্য ভক্ষমবৃণীত শক্রো বৃহন্নদ্রিরভবদ্ যচ্ছরীরম্ ॥৫॥

4.6

সোমেন পূর্ণং কলশং বিভর্ষি ত্বষ্টা রুপাণাং জনিতা পশূনাম্।
শিবাস্তে সন্তু প্রজন্বঽ ইহ যা ইমা ন্যস্মভ্যং স্বধিতে যচ্ছ যা অমূঃ ॥৬॥

4.7

আজ্যং বিভর্তি ঘৃতমস্য রেতঃ সাহস্রঃ পোষস্তমু যজ্ঞমাহুঃ ।
ইন্দ্রস্য রূপমৃষভো বসানঃ সো অস্মান্ দেবাঃ শিব ঐতু দত্তঃ ॥৭॥

4.8

ইন্দ্রস্যৌজো বরুণস্য বাহূ অশ্বিনোরংসৌ মরুতামিয়ং ককুৎ।
বৃহস্পতিং সংভৃতমেতমাহুর্যে ধীরাসঃ কবয়ো যে মনীষিণঃ ॥৮॥

4.9

দৈবীর্বিশঃ পয়স্বানা তনোষি ত্বামিন্দ্রং ত্বাং সরস্বন্তমাহুঃ ।
সহস্রং স একমুখা দদাতি যো ব্রাহ্মণ ঋষভমাজুহোতি ॥৯॥

4.10

বৃহস্পতিঃ সবিতা তে বয়ো দধৌ ত্বষ্টুর্বায়োঃ পর্যাত্মা ত আভৃতঃ ।
অন্তরিক্ষে মনসা ত্বা জুহোমি বর্হিষ্টে দ্যাবাপৃথিবী উভে স্তাম্ ॥১০॥

4.11

য ইন্দ্র ইব দেবেষু গোষ্বেতি বিবাবদৎ।
তস্য ঋষভস্যাঙ্গানি ব্রহ্মা সং স্তৌতু ভদ্রয়া ॥১১॥

4.12

পার্শ্বে আস্তামনুমত্যা ভগস্যাস্তামনূবৃজৌ ।
অষ্ঠীবন্তাবব্রবীন্মিত্রো মমৈতৌ কেবলাবিতি ॥১২॥

4.13

ভসদাসীদাদিত্যানাং শ্রোণী আস্তাং বৃহস্পতেঃ ।
পুচ্ছং বাতস্য দেবস্য তেন ধূনোত্যোষধীঃ ॥১৩॥

4.14

গুদা আসন্ত্সিনীবাল্যাঃ সূর্যায়াস্ত্বচমব্রুবন্।
উত্থাতুরব্রুবন্ পদ ঋষভং যদকল্পয়ন্ ॥১৪॥

4.15

ক্রোড আসীজ্জামিশংসস্য সোমস্য কলশো ধৃতঃ ।
দেবাঃ সংগত্য যৎ সর্ব ঋষভং ব্যকল্পয়ন্ ॥১৫॥

4.16

তে কুষ্ঠিকাঃ সরমায়ৈ কূর্মেভ্যো অদধুঃ শফান্।
ঊবধ্যমস্য কীটেভ্যঃ শ্ববর্তেভ্যো অধারয়ন্ ॥১৬॥

4.17

শৃঙ্গাভ্যাং রক্ষ ঋষত্যবর্তিং হন্তি চক্ষুষা ।
শৃণোতি ভদ্রং কর্ণাভ্যাং গবাং যঃ পতিরঘ্ন্যঃ ॥১৭॥

4.18

শতয়াজং স যজতে নৈনং দুন্বন্ত্যগ্নয়ঃ ।
জিন্বন্তি বিশ্বে তং দেবা যো ব্রাহ্মণ ঋষভমাজুহোতি ॥১৮॥

4.19

ব্রাহ্মণেভ্য ঋষভং দত্ত্বা বরীয়ঃ কৃণুতে মনঃ ।
পুষ্টিং সো অঘ্ন্যানাং স্বে গোষ্ঠেঽব পশ্যতে ॥১৯॥

4.20

গাবঃ সন্তু প্রজাঃ সন্ত্বথো অস্তু তনূবলম্।
তৎ সর্বমনু মন্যন্তাং দেবা ঋষভদায়িনে ॥২০॥

4.21

অয়ং পিপান ইন্দ্র ইদ্ রয়িং দধাতু চেতনীম্।
অয়ং ধেনুং সুদুঘাং নিত্যবত্সাং বশং দুহাং বিপশ্চিতং পরো দিবঃ ॥২১॥

4.22

পিশঙ্গরূপো নভসো বয়োধা ঐন্দ্রঃ শুষ্মো বিশ্বরূপো ন আগন্।
আয়ুরস্মভ্যং দধৎ প্রজাং চ রায়শ্চ পোষৈরভি নঃ সচতাম্ ॥২২॥

4.23

উপেহোপপর্চনাস্মিন্ গোষ্ঠ উপ পৃঞ্চ নঃ ।
উপ ঋষভস্য যদ্ রেত উপেন্দ্র তব বীর্যঽম্ ॥২৩॥

4.24

এতং বো যুবানং প্রতি দধ্মো অত্র তেন ক্রীডন্তীশ্চরত বশাঁ অনু ।
মা নো হাসিষ্ট জনুষা সুভাগা রায়শ্চ পোষৈরভি নঃ সচধ্বম্ ॥২৪॥