সূক্ত 5

5.1

পঞ্চৌদনো অজঃ। ১-৩৮ ভৃগুঃ। পঞ্চৌদনোঽজঃ, মন্ত্রোক্তাঃ। ত্রিষ্টুপ্, ৩ চতুষ্পদা পুরোতিশক্বরী জগতী, ৪, ১০ জগতী, ১৪, ১৭, ২৭-৩০ অনুষ্টুপ্ ( ৩০ ককুম্মতী), ১৬ ত্রিপদানুষ্টুপ্, ১৮, ৩৭ ত্রিপদা বিরাড্ গায়ত্রী, ২৩ পুর উষ্ণিক্, ২৪ পঞ্চপদানুষ্টুবুষ্ণিগ্গর্ভোপরিষ্টাদ্বিরাড্ জগতী, ২০-২২, ২৬ পঞ্চপদানুষ্টুবুষ্ণিগ্গর্ভোপরিষ্টাদ্বার্হতা ভুরিক্, ৩১ সপ্তপদাষ্টিঃ, ৩২-৩৫ দশপদা প্রকৃতিঃ, ৩৬ দশপদাঽঽকৃতিঃ, ৩৮ একাবসানা দ্বিপদা সাম্নী ত্রিষ্টুপ্।

আ নয়ৈতমা রভস্ব সুকৃতাং লোকমপি গচ্ছতু প্রজানন্।
তীর্ত্বা তমাংসি বহুধা মহান্ত্যজো নাকমা ক্রমতাং তৃতীয়ম্ ॥১॥

5.2

ইন্দ্রায় ভাগং পরি ত্বা নয়াম্যস্মিন্ যজ্ঞে যজমানায় সূরিম্।
যে নো দ্বিষন্ত্যনু তান্ রভস্বানাগসো যজমানস্য বীরাঃ ॥২॥

5.3

প্র পদোঽব নেনিগ্ধি দুশ্চরিতং যচ্চচার শুদ্ধৈঃ শফৈরা ক্রমতাং প্রজানন্।
তীর্ত্বা তমাংসি বহুধা বিপশ্যন্নজো নাকমা ক্রমতাং তৃতীয়ম্ ॥৩॥

5.4

অনুচ্ছ্য শ্যামেন ত্বচমেতাং বিশস্তর্যথাপর্ব১সিনা মাভি মংস্থাঃ ।
মাভি দ্রুহঃ পরুশঃ কল্পয়ৈনং তৃতীয়ে নাকে অধি বি শ্রয়ৈনম্ ॥৪॥

5.5

ঋচা কুম্ভীমধ্যগ্নৌ শ্রয়াম্যা সিঞ্চোদকমব ধেহ্যেনম্।
পর্যাধত্তাগ্নিনা শমিতারঃ শৃতো গচ্ছতু সুকৃতাং যত্র লোকঃ ॥৫॥

5.6

উৎ ক্রামাতঃ পরি চেদতপ্তস্তপ্তাচ্চরোরধি নাকং তৃতীয়ম্।
অগ্নেরগ্নিরধি সং বভূবিথ জ্যোতিষ্মন্তমভি লোকং জয়ৈতম্ ॥৬॥

5.7

অজো অগ্নিরজমু জ্যোতিরাহুরজং জীবতা ব্রহ্মণে দেয়মাহুঃ ।
অজস্তমাংস্যপ হন্তি দূরমস্মিংল্লোকে শ্রদ্দধানেন দত্তঃ ॥৭॥

5.8

পঞ্চৌদনঃ পঞ্চধা বি ক্রমতামাক্রংস্যমানস্ত্রীণি জ্যোতীংষি ।
ঈজানানাং সুকৃতাং প্রেহি মধ্যং তৃতীয়ে নাকে অধি বি শ্রয়স্ব ॥৮॥

5.9

অজা রোহ সুকৃতাং যত্র লোকঃ শরভো ন চত্তোঽতি দুর্গান্যেষঃ ।
পঞ্চৌদনো ব্রহ্মণে দীয়মানঃ স দাতারং তৃপ্ত্যা তর্পয়াতি ॥৯॥

5.10

অজস্ত্রিনাকে ত্রিদিবে ত্রিপৃষ্ঠে নাকস্য পৃষ্ঠে দদিবাংসং দধাতি ।
পঞ্চৌদনো ব্রহ্মণে দীয়মানো বিশ্বরূপা ধেনুঃ কামদুঘাস্যেকা ॥১০॥

5.11

এতদ্ বো জ্যোতিঃ পিতরস্তৃতীয়ং পঞ্চৌদনং ব্রহ্মণেঽজং দদাতি ।
অজস্তমাংস্যপ হন্তি দূরমস্মিংল্লোকে শ্রদ্দধানেন দত্তঃ ॥১১॥

5.12

ঈজানানাং সুকৃতাং লোকমীপ্সন্ পঞ্চৌদনং ব্রহ্মণেঽজং দদাতি ।
স ব্যাঽপ্তিমভি লোকং জয়ৈতং শিবো৩ঽস্মভ্যং প্রতিগৃহীতো অস্তু ॥১২॥

5.13

অজো হ্য১গ্নেরজনিষ্ট শোকাদ্ বিপ্রো বিপ্রস্য সহসো বিপশ্চিৎ।
ইষ্টং পূর্তমভিপূর্তং বষট্কৃতং তদ্ দেবা ঋতুশঃ কল্পয়ন্তু ॥১৩॥

5.14

অমোতং বাসো দদ্যাদ্ধিরণ্যমপি দক্ষিণাম্।
তথা লোকান্ত্সমাপ্নোতি যে দিব্যা যে চ পার্থিবাঃ ॥১৪॥

5.15

এতাস্ত্বাজোপ যন্তু ধারাঃ সোম্যা দেবীর্ঘৃতপৃষ্ঠা মধুশ্চুতঃ ।
স্তভান পৃথিবীমুত দ্যাং নাকস্য পৃষ্ঠেঽধি সপ্তরশ্মৌ ॥১৫॥

5.16

অজো৩স্যজ স্বর্গোঽসি ত্বয়া লোকমঙ্গিরসঃ প্রাজানন্।
তং লোকং পুণ্যং প্র জ্ঞেষম্ ॥১৬॥

5.17

যেনা সহস্রং বহসি যেনাগ্নে সর্ববেদসম্।
তেনেমং যজ্ঞং নো বহ স্বঽর্দেবেষু গন্তবে ॥১৭॥

5.18

অজঃ পক্বঃ স্বর্গে লোকে দধাতি পঞ্চৌদনো নিরৃতিং বাধমানঃ ।
তেন লোকান্ত্সূর্যবতো জয়েম ॥১৮॥

5.19

যং ব্রাহ্মণে নিদধে যং চ বিক্ষু যা বিপ্রুষ ওদনানামজস্য ।
সর্বং তদগ্নে সুকৃতস্য লোকে জানীতান্নঃ সংগমনে পথীনাম্ ॥১৯॥

5.20

অজো বা ইদমগ্নে ব্যঽক্রমত তস্যোর ইয়মভবদ্ দ্যৌঃ পৃষ্ঠম্।
অন্তরিক্ষং মধ্যং দিশঃ পার্শ্বে সমুদ্রৌ কুক্ষী ॥২০॥

5.21

সত্যং চর্তং চ চক্ষুষী বিশ্বং সত্যং শ্রদ্ধা প্রাণো বিরাট্ শিরঃ ।
এষ বা অপরিমিতো যজ্ঞো যদজঃ পঞ্চৌদনঃ ॥২১॥

5.22

অপরিমিতমেব যজ্ঞমাপ্নোত্যপরিমিতং লোকমব রুন্ধে ।
যো৩ঽজং পঞ্চৌদনং দক্ষিণাজ্যোতিষং দদাতি ॥২২॥

5.23

নাস্যাস্থীনি ভিন্দ্যান্ন মজ্জ্ঞো নির্ধয়েৎ।
সর্বমেনং সমাদায়েদমিদং প্র বেশয়েৎ ॥২৩॥

5.24

ইদমিদমেবাস্য রূপং ভবতি তেনৈনং সং গময়তি ।
ইষং মহ ঊর্জমস্মৈ দুহে যো৩ঽজং পঞ্চৌদনং দক্ষিণাজ্যোতিষং দদাতি ॥২৪॥

5.25

পঞ্চ রুক্মা পঞ্চ নবানি বস্ত্রা পঞ্চাস্মৈ ধেনবঃ কামদুঘা ভবন্তি ।
যো৩জং পঞ্চৌদনং দক্ষিণাজ্যোতিষং দদাতি ॥২৫॥

5.26

পঞ্চ রুক্মা জ্যোতিরস্মৈ ভবন্তি বর্ম বাসাংসি তন্বেঽ ভবন্তি ।
স্বর্গং লোকমশ্নুতে যো৩জং পঞ্চৌদনং দক্ষিণাজ্যোতিষং দদাতি ॥২৬॥

5.27

যা পূর্বং পতিং বিত্ত্বাথান্যং বিন্দতেঽপরম্।
পঞ্চৌদনং চ তাবজং দদাতো ন বি যোষতঃ ॥২৭॥

5.28

সমানলোকো ভবতি পুনর্ভুবাপরঃ পতিঃ ।
যো৩জং পঞ্চৌদনং দক্ষিণাজ্যোতিষং দদাতি ॥২৮॥

5.29

অনুপূর্ববত্সাং ধেনুমনড্বাহমুপবর্হণম্।
বাসো হিরণ্যং দত্ত্বা তে যন্তি দিবমুত্তমাম্ ॥২৯॥

5.30

আত্মানং পিতরং পুত্রং পৌত্রং পিতামহম্।
জায়াং জনিত্রীং মাতরং যে প্রিয়াস্তানুপ হ্বয়ে ॥৩০॥

5.31

যো বৈ নৈদাঘং নামর্তুং বেদ । এষ বৈ নৈদাঘো নামর্তুর্যদজঃ পঞ্চৌদনঃ ।
নিরেবাপ্রিয়স্য ভ্রাতৃব্যস্য শ্রিয়ং দহতি ভবত্যাত্মনা ।
যো৩জং পঞ্চৌদনং দক্ষিণাজ্যোতিষং দদাতি ॥৩১॥

5.32

যো বৈ কুর্বন্তং নামর্তুং বেদ । কুর্বতীংকুর্বতীমেবাপ্রিয়স্য ভ্রাতৃব্যস্য শ্রিয়মা দত্তে ।
এষ বৈ কুর্বন্নামর্তুর্যদজঃ পঞ্চৌদনঃ ।
নিরেবাপ্রিয়স্য ভ্রাতৃব্যস্য শ্রিয়ং দহতি ভবত্যাত্মনা।
যো৩জং পঞ্চৌদনং দক্ষিনাজ্যোতিষং দদাতি ॥৩২॥

5.33

যো বৈ সংয়ন্তং নামর্তুং বেদ । সংয়তীংসংয়তীমেবাপ্রিয়স্য ভ্রাতৃব্যস্য শ্রিয়মা দত্তে ।
এষ বৈ সংয়ন্নামর্তুর্যদজঃ পঞ্চৌদনঃ ।
নিরেবাপ্রিয়স্য ভ্রাতৃব্যস্য শ্রিয়ং দহতি ভবত্যাত্মনা।
যো৩জং পঞ্চৌদনং দক্ষিণাজ্যোতিষং দদাতি ॥৩৩॥

5.34

যো বৈ পিন্বন্তং নামর্তুং বেদ ।
পিন্বতীংপিন্বতীমেবাপ্রিয়স্য ভ্রাতৃব্যস্য শ্রিয়মা দত্তে ।
এষ বৈ পিন্বন্নামর্তুর্যদজঃ পঞ্চৌদনঃ ।
নিরেবাপ্রিয়স্য ভ্রাতৃব্যস্য শ্রিয়ং দহতি ভবত্যাত্মনা।
যো৩জং পঞ্চৌদনং দক্ষিণাজ্যোতিষং দদাতি ॥৩৪॥

5.35

যো বা উদ্যন্তং নামর্তুং বেদ ।
উদ্যতীমুদ্যতীমেবাপ্রিয়স্য ভ্রাতৃব্যস্য শ্রিয়মা দত্তে ।
এষ বা উদ্যন্ন্নামর্তুর্যদজঃ পঞ্চৌদনঃ ।
নিরেবাপ্রিয়স্য ভ্রাতৃব্যস্য শ্রিয়ং দহতি ভবত্যাত্মনা।
যো৩জং পঞ্চৌদনং দক্ষিণাজ্যোতিষং দদাতি ॥৩৫॥

5.36

যো বা অভিভুবং নামর্তুং বেদ ।
অভিভবন্তীমভিভবন্তীমেবাপ্রিয়স্য ভ্রাতৃব্যস্য শ্রিয়মা দত্তে ।
এষ বা অভিভূর্নামর্তুর্যদজঃ পঞ্চৌদনঃ ।
নিরেবাপ্রিয়স্য ভ্রাতৃব্যস্য শ্রিয়ং দহতি ভবত্যাত্মনা ।
যো৩জং পঞ্চৌদনং দক্ষিনাজ্যোতিষং দদাতি ॥৩৬॥

5.37

অজং চ পচত পঞ্চ চৌদনান্।
সর্বা দিশঃ সংমনসঃ সধ্রীচীঃ সান্তর্দেশাঃ প্রতি গৃহ্ণন্তু ত এতম্ ॥৩৭॥

5.38

তাস্তে রক্ষন্তু তব তুভ্যমেতং তাভ্য আজ্যং হবিরিদং জুহোমি ॥৩৮॥