সূক্ত 17

17.1

ব্রহ্মজায়া। ১-১৮ ময়োভূঃ। ব্রহ্মজায়া। অনুষ্টুপ্, ১-৬ ত্রিষ্টুপ্।

তেঽবদন্ প্রথমা ব্রহ্মকিল্বিষেঽকূপারঃ সলিলো মাতরিশ্বা ।
বীডুহরাস্তপ উগ্রং ময়োভূরাপো দেবীঃ প্রথমজা ঋতস্য ॥১॥

সোমো রাজা প্রথমো ব্রহ্মজায়াং পুনঃ প্রায়চ্ছদহৃণীয়মানঃ ।
অন্বর্তিতা বরুণো মিত্র আসীদগ্নির্হোতা হস্তগৃহ্যা নিনায় ॥২॥

হস্তেনৈব গ্রাহ্যঽআধিরস্যা ব্রহ্মজায়েতি চেদবোচৎ।
ন দূতায় প্রহেয়া তস্থ এষা তথা রাষ্ট্রং গুপিতং ক্ষত্রিয়স্য ॥৩॥

যামাহুস্তারকৈষা বিকেশীতি দুচ্ছুনাং গ্রামমবপদ্যমানাম্।
সা ব্রহ্মজায়া বি দুনোতি রাষ্ট্রং যত্র প্রাপাদি শশ উল্কুষীমান্ ॥৪॥

ব্রহ্মচারী চরতি বেবিষদ্ বিষঃ স দেবানাং ভবত্যেকমঙ্গম্।
তেন জায়া মন্ববিন্দদ্ বৃহস্পতিঃ সোমেন নীতাং জুহ্বং১ ন দেবাঃ ॥৫॥

দেবা বা এতস্যামবদন্ত পূর্বে সপ্তঋষয়স্তপসা যে নিষেদুঃ ।
ভীমা জায়া ব্রাহ্মণস্যাপনীতা দুর্ধাং দধাতি পরমেব্যোঽমন্ ॥৬॥

যে গর্ভা অবপদ্যন্তে জগদ্ যচ্চাপলুপ্যতে ।
বীরা যে তৃহ্যন্তে মিথো ব্রহ্মজায়া হিনস্তি তান্ ॥৭॥

উত যৎ পতয়ো দশ স্ত্রিয়াঃ পূর্বে অব্রাহ্মণাঃ ।
ব্রহ্মাচেদ্ধস্তমগ্রহীৎ স এব পতিরেকধা ॥৮॥

ব্রাহ্মণ এব পতির্ন রাজন্যো৩ ন বৈশ্যঃ ।
তৎ সূর্যঃ প্রব্রুবন্নেতি পঞ্চভ্যো মানবেভ্যঃ ॥৯॥

পুনর্বৈ দেবা অদদুঃ পুনর্মনুষ্যা অদদুঃ ।
রাজানঃ সত্যং গৃহ্ণানা ব্রহ্মজায়াং পুনর্দদুঃ ॥১০॥

পুনর্দায় ব্রহ্মজায়াং কৃত্বা দেবৈর্নিকিল্বিষম্।
ঊর্জং পৃথিব্যা ভক্ত্বোরুগায়মুপাসতে ॥১১॥

নাস্য জায়া শতবাহী কল্যাণী তল্পমা শয়ে ।
যস্মিন্ রাষ্ট্রে নিরুধ্যতে ব্রহ্মজায়াচিত্ত্যা ॥১২॥

ন বিকর্ণঃ পৃথুশিরাস্তস্মিন্ বেশ্মনি জায়তে ।
যস্মিন্ রাষ্ট্রে নিরুধ্যতে ব্রহ্মজায়াচিত্ত্যা ॥১৩॥

নাস্য ক্ষত্তা নিষ্কগ্রীবঃ সূনানামেত্যগ্রতঃ ।
যস্মিন্ রাষ্ট্রে নিরুধ্যতে ব্রহ্মজায়াচিত্ত্যা ॥১৪॥

নাস্য শ্বেতঃ কৃষ্ণকর্ণো ধুরি যুক্তো মহীয়তে ।
যস্মিন্ রাষ্ট্রে নিরুধ্যতে ব্রহ্মজায়াচিত্ত্যা ॥১৫॥

নাস্য ক্ষেত্রে পুষ্করিণী নাণ্ডীকং জায়তে বিসম্।
যস্মিন্ রাষ্ট্রে নিরুধ্যতে ব্রহ্মজায়াচিত্ত্যা ॥১৬॥

নাস্মৈ পৃশ্নিং বি দুহন্তি যেঽস্যা দোহমুপাসতে ।
যস্মিন্ রাষ্ট্রে নিরুধ্যতে ব্রহ্মজায়াচিত্ত্যা ॥১৭॥

নাস্য ধেনুঃ কল্যাণী নানড্বান্ত্সহতে ধুরম্।
বিজানির্যত্র ব্রহ্মণো রাত্রিং বসতি পাপয়া ॥১৮॥