Sukta 17

17.1

Brahmajaya, 1-18 mayobhuh, brahmajaya, anushtup, 1-6 trishtup

तेऽवदन् प्रथ॒मा ब्र॑ह्मकिल्बि॒षेऽकू॑पारः सलि॒लो मा॑त॒रिश्वा॑ ।
वी॒डुह॑रा॒स्तप॑ उ॒ग्रं म॑यो॒भूरापो॑ दे॒वीः प्र॑थम॒जा ऋ॒तस्य॑ ॥१॥

Tevadan prathama brahmakilbishekuparah salilo matarishva
Viduharastapa ugram mayobhurapo devih prathamaja ritasya

17.2

सोमो॒ राजा॑ प्रथ॒मो ब्र॑ह्मजा॒यां पुनः॒ प्राय॑च्छ॒दहृ॑णीयमानः ।
अ॒न्व॒र्ति॒ता वरु॑णो मि॒त्र आ॑सीद॒ग्निर्होता॑ हस्त॒गृह्या नि॑नाय ॥२॥

Somo raja prathamo brahmajayam punah prayachchhadahriniyamanah
Anvartita varuno mitra asidagnirhota hastagrihya ninaya

17.3

हस्ते॑नै॒व ग्रा॒ह्यऽआ॒धिर॑स्या ब्रह्मजा॒येति॒ चेदवो॑चत्।
न दू॒ताय॑ प्र॒हेया॑ तस्थ ए॒षा तथा॑ रा॒ष्ट्रं गु॑पि॒तं क्ष॒त्रिय॑स्य ॥३॥

Hastenaiva grahyaadhirasya brahmajayeti chedavochat
Na dutaya praheya tastha esha tatha rashtram gupitam kshatriyasya

17.4

यामा॒हुस्तार॑कै॒षा वि॑के॒शीति॑ दु॒च्छुनां॒ ग्राम॑मव॒पद्य॑मानाम्।
सा ब्र॑ह्मजा॒या वि दु॑नोति रा॒ष्ट्रं यत्र॒ प्रापा॑दि श॒श उ॑ल्कु॒षीमा॑न् ॥४॥

Yamahustarakaisha vikeshiti duchchhunam gramamavapadyamanam
Sa brahmajaya vi dunoti rashtram yatra prapadi shasha ulkushiman

17.5

ब्र॒ह्म॒चा॒री च॑रति॒ वेवि॑ष॒द् विषः॒ स दे॒वानां॑ भव॒त्येक॒मङ्ग॑म्।
तेन॑ जा॒या मन्व॑विन्द॒द् बृह॒स्पतिः॒ सोमे॑न नी॒तां जु॒ह्वं१ न दे॑वाः ॥५॥

Brahmachari charati vevishad vishah sa devanam bhavatyekamangam
Tena jaya manvavindad brihaspatih somena nitam juhvan1 na devah

17.6

दे॒वा वा ए॒तस्या॑मवदन्त॒ पूर्वे॑ सप्तऋ॒षय॒स्तप॑सा॒ ये नि॑षे॒दुः ।
भी॒मा जा॒या ब्रा॑ह्म॒णस्याप॑नीता दु॒र्धां द॑धाति पर॒मेव्योऽमन् ॥६॥

Deva va etasyamavadanta purve saptarishayastapasa ye nisheduh
Bhima jaya brahmanasyapanita durdham dadhati paramevyoman

17.7

ये गर्भा॑ अव॒पद्य॑न्ते॒ जग॒द् यच्चा॑पलु॒प्यते॑ ।
वी॒रा ये तृ॒ह्यन्ते॑ मि॒थो ब्र॑ह्मजा॒या हि॑नस्ति॒ तान् ॥७॥

Ye garbha avapadyante jagad yachchapalupyate
Vira ye trihyante mitho brahmajaya hinasti tan

17.8

उत यत् पत॑यो॒ दश॑ स्त्रि॒याः पूर्वे॒ अब्रा॑ह्मणाः ।
ब्र॒ह्माचेद्धस्त॒मग्र॑ही॒त् स ए॒व पति॑रेक॒धा ॥८॥

Uta yat patayo dasha striyah purve abrahmanah
Brahmacheddhastamagrahit sa eva patirekadha

17.9

ब्रा॒ह्म॒ण ए॒व पति॒र्न रा॑ज॒न्यो॒३ न वैश्यः॑ ।
तत् सूर्यः॑ प्रब्रु॒वन्ने॑ति प॒ञ्चभ्यो॑ मान॒वेभ्यः॑ ॥९॥

Brahmana eva patirna rajanyo3 na vaishyah
Tat suryah prabruvanneti panchabhyo manavebhyah

17.10

पुन॒र्वै दे॒वा अ॑ददुः॒ पुन॑र्मनु॒ष्या अददुः ।
राजा॑नः स॒त्यं गृ॑ह्णा॒ना ब्र॑ह्मजा॒यां पुन॑र्ददुः ॥१०॥

Punarvai deva adaduh punarmanushya adaduh
Rajanah satyam grihnana brahmajayam punardaduh

17.11

पु॒न॒र्दाय॑ ब्रह्मजा॒यां कृ॒त्वा दे॒वैर्नि॑किल्बि॒षम्।
ऊर्जं॑ पृथि॒व्या भ॒क्त्वोरु॑गा॒यमुपा॑सते ॥११॥

Punardaya brahmajayam kritva devairnikilbisham
Urjam prithivya bhaktvorugayamupasate

17.12

नास्य॑ जा॒या श॑तवा॒ही क॑ल्या॒णी तल्प॒मा श॑ये ।
यस्मि॑न् रा॒ष्ट्रे नि॑रु॒ध्यते॑ ब्रह्मजा॒याचि॑त्त्या ॥१२॥

Nasya jaya shatavahi kalyani talpama shaye
Yasmin rashtre nirudhyate brahmajayachittya

17.13

न वि॑क॒र्णः पृ॒थुशि॑रा॒स्तस्मि॒न् वेश्म॑नि जायते ।
यस्मि॑न् रा॒ष्ट्रे नि॑रु॒ध्यते॑ ब्रह्मजा॒याचि॑त्त्या ॥१३॥

Na vikarnah prithushirastasmin veshmani jayate
Yasmin rashtre nirudhyate brahmajayachittya

17.14

नास्य॑ क्ष॒त्ता नि॒ष्कग्री॑वः सू॒नाना॑मेत्यग्र॒तः ।
यस्मि॑न् रा॒ष्ट्रे नि॑रु॒ध्यते॑ ब्रह्मजा॒याचि॑त्त्या ॥१४॥

Nasya kshatta nishkagrivah sunanametyagratah
Yasmin rashtre nirudhyate brahmajayachittya

17.15

नास्य॑ श्वे॒तः कृ॑ष्ण॒कर्णो॑ धु॒रि यु॒क्तो म॑हीयते ।
यस्मि॑न् रा॒ष्ट्रे नि॑रु॒ध्यते॑ ब्रह्मजा॒याचि॑त्त्या ॥१५॥

Nasya shvetah krishnakarno dhuri yukto mahiyate
Yasmin rashtre nirudhyate brahmajayachittya

17.16

नास्य॒ क्षेत्रे॑ पुष्क॒रिणी॒ नाण्डीकं॑ जायते॒ बिस॑म्।
यस्मि॑न् रा॒ष्ट्रे नि॑रु॒ध्यते॑ ब्रह्मजा॒याचि॑त्त्या ॥१६॥

Nasya kshetre pushkarini nandikam jayate bisam
Yasmin rashtre nirudhyate brahmajayachittya

17.17

नास्मै॒ पृश्निं॒ वि दु॑हन्ति॒ येऽस्या॒ दोह॑मु॒पास॑ते ।
यस्मि॑न् रा॒ष्ट्रे नि॑रु॒ध्यते॑ ब्रह्मजा॒याचि॑त्त्या ॥१७॥

Nasmai prishnim vi duhanti yesya dohamupasate
Yasmin rashtre nirudhyate brahmajayachittya

17.18

नास्य॑ धे॒नुः क॑ल्या॒णी नान॒ड्वान्त्स॑हते॒ धुर॑म्।
विजा॑नि॒र्यत्र॑ ब्रह्म॒णो रात्रिं॒ वस॑ति पा॒पया॑ ॥१८॥

Nasya dhenuh kalyani nanadvantsahate dhuram
Vijaniryatra brahmano ratrim vasati papaya