সূক্ত 14

14.1

কৃত্যাপরিহরণম্। ১-১৩ শুক্রঃ। বনস্পতিঃ, কৃত্যাপরিহরণম্। অনুষ্টুপ্, ৩,৫,১২ ভুরিক্, ৮ ত্রিপদা বিরাট্, ১০ নিচৃদ্বৃহতী, ১১ ত্রিপদা সাম্নী ত্রিষ্টুপ্, ১৩ স্বরাট্।¬

সুপর্ণস্ত্বান্ববিন্দৎ সূকরস্ত্বাখন্নসা।
দিপ্সৌষধে ত্বং দিপ্সন্তমব কৃত্যাকৃতং জহি ॥১॥

14.2

অব জহি যাতুধানানব কৃত্যাকৃতং জহি ।
অথো যোঅস্মান্ দিপ্সতি তমু ত্বং জহ্যোষধে ॥২॥

14.3

রিশ্যস্যেব পরীশাসং পরিকৃত্য পরি ত্বচঃ ।
কৃত্যাং কৃত্যাকৃতে দেবা নিষ্কমিব প্রতি মুঞ্চত ॥৩॥

14.4

পুনঃ কৃত্যাং কৃত্যাকৃতে হস্তগৃহ্য পরা ণয় ।
সমক্ষমস্মা আ ধেহি যথা কৃত্যাকৃতং হনৎ ॥৪॥

14.5

কৃত্যাঃ সন্তু কৃত্যাকৃতে শপথঃ শপথীয়তে।
সুখো রথ ইব বর্ততাং কৃত্যা কৃত্যাকৃতং পুনঃ ॥৫॥

14.6

যদি স্ত্রী যদি বা পুমান্ কৃত্যাং চকার পাপ্মনে ।
তামু তস্মৈ নয়ামস্যশ্বমিবাশ্বাভিধান্যা ॥৬॥

14.7

যদি বাসি দেবকৃতা যদি বা পুরুষৈঃ কৃতা।
তাং ত্বা পুনর্ণয়ামসীন্দ্রেণ সয়ুজা বয়ম্ ॥৭॥

14.8

অগ্নে পৃতনাষাট্ পৃতনাঃ সহস্ব ।
পুনঃ কৃত্যাং কৃত্যাকৃতে প্রতিহরণেন হরামসি ॥৮॥

14.9

কৃতব্যধনি বিধ্য তং যশ্চকার তমিজ্জহি ।
ন ত্বামচক্রুষে বয়ং বধায় সং শিশীমহি ॥৯॥

14.10

পুত্র ইব পিতরং গচ্ছ স্বজ ইবাভিষ্ঠিতো দশ ।
বন্ধমিবাবক্রামী গচ্ছ কৃত্যে কৃত্যাকৃতং পুনঃ ॥১০॥

14.11

উদেণীব বারণ্যঽভিস্কন্দং মৃগীব ।
কৃত্যা কর্তারমৃচ্ছতু ॥১১॥

14.12

ইষ্বা ঋজীয়ঃ পততু দ্যাবাপৃথিবী তং প্রতি ।
সা তং মৃগমিব গৃহ্ণতু কৃত্যা কৃত্যাকৃতং পুনঃ ॥১২॥

14.13

অগ্নিরিবৈতু প্রতিকূলমনুকূলমিবোদকম্।
সুখো রথ ইব বর্ততাং কৃত্যা কৃত্যাকৃতং পুনঃ ॥১৩॥