Sukta 14

14.1

Krityapariharanam, 1-13 shukrah, vanaspatih, krityapariharanam, anushtup, 3, 5, 12 bhurik, 8 tripada virat, 10 nichridbrihati, 11 tripada samni trishtup, 13 svarat, ¬

सु॒प॒र्णस्त्वान्व॑विन्दत् सूक॒रस्त्वा॑खन्न॒सा।
दिप्सौ॑षधे॒ त्वं दिप्स॑न्त॒मव॑ कृत्या॒कृतं॑ जहि ॥१॥

Suparnastvanvavindat sukarastvakhannasa
Dipsaushadhe tvam dipsantamava krityakritam jahi

14.2

अव॑ जहि यातु॒धाना॒नव॑ कृत्या॒कृतं॑ जहि ।
अथो॒ योअ॒स्मान् दिप्स॑ति॒ तमु॒ त्वं ज॑ह्योषधे ॥२॥

Ava jahi yatudhananava krityakritam jahi
Atho yoasman dipsati tamu tvam jahyoshadhe

14.3

रिश्य॑स्येव परीशा॒सं प॑रि॒कृत्य॒ परि॑ त्व॒चः ।
कृ॒त्यां कृ॑त्या॒कृते॑ देवा नि॒ष्कमि॑व॒ प्रति॑ मुञ्चत ॥३॥

Rishyasyeva parishasam parikritya pari tvachah
Krityam krityakrite deva nishkamiva prati munchata

14.4

पुनः॑ कृ॒त्यां कृ॑त्या॒कृते॑ हस्त॒गृह्य॒ परा॑ णय ।
स॒म॒क्षम॑स्मा॒ आ धे॑हि॒ यथा॑ कृत्या॒कृतं॒ हन॑त् ॥४॥

Punah krityam krityakrite hastagrihya para naya
Samakshamasma a dhehi yatha krityakritam hanat

14.5

कृ॒त्याः स॑न्तु कृत्या॒कृते॑ श॒पथः॑ शपथीय॒ते।
सु॒खो रथ॑ इव वर्ततां कृ॒त्या कृ॑त्या॒कृतं॒ पुनः॑ ॥५॥

Krityah santu krityakrite shapathah shapathiyate
Sukho ratha iva vartatam kritya krityakritam punah

14.6

यदि॒ स्त्री यदि॑ वा॒ पुमा॑न् कृ॒त्यां च॒कार॑ पा॒प्मने॑ ।
तामु॒ तस्मै॑ नयाम॒स्यश्व॑मिवाश्वाभि॒धान्या॑ ॥६॥

Yadi stri yadi va puman krityam chakara papmane
Tamu tasmai nayamasyashvamivashvabhidhanya

14.7

यदि॒ वासि॑ दे॒वकृ॑ता॒ यदि॑ वा॒ पुरु॑षैः कृ॒ता।
तां त्वा॒ पुन॑र्णयाम॒सीन्द्रे॑ण स॒युजा॑ व॒यम् ॥७॥

Yadi vasi devakrita yadi va purushaih krita
Tam tva punarnayamasindrena sayuja vayam

14.8

अग्ने॑ पृतनाषा॒ट् पृत॑नाः सहस्व ।
पुनः॑ कृ॒त्यां कृ॑त्या॒कृते॑ प्रति॒हर॑णेन हरामसि ॥८॥

Agne pritanashat pritanah sahasva
Punah krityam krityakrite pratiharanena haramasi

14.9

कृत॑व्यधनि॒ विध्य॒ तं यश्च॒कार॒ तमिज्ज॑हि ।
न त्वामच॑क्रुषे व॒यं व॒धाय॒ सं शि॑शीमहि ॥९॥

Kritavyadhani vidhya tam yashchakara tamijjahi
Na tvamachakrushe vayam vadhaya sam shishimahi

14.10

पु॒त्र इ॑व पि॒तरं॑ गच्छ स्व॒ज इ॑वा॒भिष्ठि॑तो दश ।
ब॒न्धमि॑वावक्रा॒मी ग॑च्छ॒ कृत्ये॑ कृत्या॒कृतं॒ पुनः॑ ॥१०॥

Putra iva pitaram gachchha svaja ivabhishthito dasha
Bandhamivavakrami gachchha kritye krityakritam punah

14.11

उदे॒णीव॑ वार॒ण्यऽभि॒स्कन्दं॑ मृ॒गीव॑ ।
कृ॒त्या क॒र्तार॑मृच्छतु ॥११॥

Udeniva varanyabhiskandam mrigiva
Kritya kartaramrichchhatu

14.12

इष्वा॒ ऋजी॑यः पततु॒ द्यावा॑पृथिवी॒ तं प्रति॑ ।
सा तं मृ॒गमि॑व गृह्णतु कृ॒त्या कृ॑त्या॒कृतं॒ पुनः॑ ॥१२॥

Ishva rijiyah patatu dyavaprithivi tam prati
Sa tam mrigamiva grihnatu kritya krityakritam punah

14.13

अ॒ग्निरि॑वैतु प्रति॒कूल॑मनु॒कूल॑मिवोद॒कम्।
सु॒खो रथ॑ इव वर्ततां कृ॒त्या कृ॑त्या॒कृतं॒ पुनः॑ ॥१३॥

Agnirivaitu pratikulamanukulamivodakam
Sukho ratha iva vartatam kritya krityakritam punah