সূক্ত 9

9.1

আঞ্জনম্। ১-১০ ভৃগুঃ। ত্রৈকাকুদঞ্জনম্। অনুষ্টুপ্, ২ ককুম্মতী, ৩ পথ্যাপঙ্ক্তিঃ।

এহি জীবং ত্রায়মাণং পর্বতস্যাস্যক্ষ্যম্।
বিশ্বেভির্দেবৈর্দত্তং পরিধির্জীবনায় কম্ ॥১॥

9.2

পরিপাণং পুরুষাণাং পরিপাণং গবামসি ।
অশ্বানামর্বতাং পরিপাণায় তস্থিষে ॥২॥

9.3

উতাসি পরিপাণং যাতুজম্ভনমাঞ্জন ।
উতামৃতস্য ত্বং বেত্থাথো অসি জীবভোজনমথো হরিতভেষজম্ ॥৩॥

9.4

যস্যাঞ্জন প্রসর্পস্যঙ্গমঙ্গং পরুষ্পরুঃ ।
ততো যক্ষ্মং বি বাধস উগ্রো মধ্যমশীরিব ॥৪॥

9.5

নৈনং প্রাপ্নোতি শপথো ন কৃত্যা নাভিশোচনম্।
নৈনং বিষ্কন্ধমশ্নুতে যস্ত্বা বিভর্ত্যাঞ্জন ॥৫॥

9.6

অসন্মন্ত্রাদ্ দুষ্বপ্ন্যাদ্ দুষ্কৃতাচ্ছমলাদুত।
দুর্হার্দশ্চক্ষুষো ঘোরাৎ তস্মান্নঃ পাহ্যাঞ্জন ॥৬॥

9.7

ইদং বিদ্বানাঞ্জন সত্যং বক্ষ্যামি নানৃতম্।
সনেয়মশ্বং গামহমাত্মানং তব পূরুষ ॥৭॥

9.8

ত্রয়ো দাসা আঞ্জনস্য তক্মা বলাস আদহিঃ ।
বর্ষিষ্ঠঃ পর্বতানাং ত্রিককুন্নাম তে পিতা ॥৮॥

9.9

যদাঞ্জনং ত্রৈককুদং জাতং হিমবতস্পরি ।
যাতূংশ্চ সর্বাঞ্জম্ভয়ৎ সর্বাশ্চ যাতুধান্যঃ ॥৯॥

9.10

যদি বাসি ত্রৈককুদং যদি যামুনমুচ্যসে ।
উভে তে ভদ্রে নাম্নী তাভ্যাং নঃ পাহ্যাঞ্জন ॥১০॥