সূক্ত 16

16.1

সত্যানৃতসমীক্ষকঃ। ১-৯ ব্রহ্ম। বরুণঃ, সত্যানৃতান্বীক্ষণম্। ত্রিষ্টুপ্, ১ অনুষ্টুপ্, ৫ ভুরিক্, ৭ জগতি, ৮ ত্রিপান্মহাবৃহতী, বিরাণ্নাম ত্রিপাদ্গায়ত্রী।

বৃহন্নেষামধিষ্ঠাতা অন্তিকাদিব পশ্যতি ।
য স্তায়ন্মন্যতে চরন্ত্সর্বং দেবা ইদং বিদুঃ ॥১॥

যস্তিষ্ঠতি চরতি যশ্চ বঞ্চতি যো নিলায়ং চরতি যঃ প্রতঙ্কম্।
দ্বৌ সংনিষদ্য যন্মন্ত্রয়েতে রাজা তদ্ বেদ বরুণস্তৃতীয়ঃ ॥২॥

উতেয়ং ভূমির্বরুণস্য রাজ্ঞ উতাসৌ দ্যৌর্বৃহতী দূরেঅন্তা ।
উতো সমুদ্রৌ বরুণস্য কুক্ষী উতাস্মিন্নল্প উদকে নিলীনঃ ॥৩॥

উত যো দ্যামতিসর্পাৎ পরস্তান্ন স মুচ্যাতৈ বরুণস্য রাজ্ঞঃ ।
দিব স্পশঃ প্র চরন্তীদমস্য সহস্রাক্ষা অতি পশ্যন্তি ভূমিম্ ॥৪॥

সর্বং তদ্ রাজা বরুণো বি চষ্টে যদন্তরা রোদসী যৎ পরস্তাৎ।
সংখ্যাতা অস্য নিমিষো জনানামক্ষানিব শ্বঘ্নী নি মিনোতি তানি ॥৫॥

যে তে পাশা বরুণ সপ্তসপ্ত ত্রেধা তিষ্ঠন্তি বিষিতা রুশন্তঃ ।
ছিনন্তু সর্বে অনৃতং বদন্তং যঃ সত্যবাদ্যতি তং সৃজন্তু ॥৬॥

শতেন পাশৈরভি ধেহি বরুণৈনং মা তে মোচ্যনৃতবাঙ্ নৃচক্ষঃ ।
আস্তাং জাল্ম উদরং শ্রংসয়িত্বা কোশ ইবাবন্ধঃ পরিকৃত্যমানঃ ॥৭॥

যঃ সমাম্যো৩বরুণো যো ব্যাম্যো৩য়ঃ সংদেশ্যো৩বরুণো যো বিদেশ্যঃ ।
যো দৈবো বরুণো যশ্চ মানুষঃ ॥৮॥

তৈস্ত্বা সর্বৈরভি ষ্যামি পাশৈরসাবামুষ্যায়ণামুষ্যাঃ পুত্র ।
তানু তে সর্বাননুসংদিশামি ॥৯॥