সূক্ত 5

5.1

রাষ্ট্রস্য রাজা রাজকৃতশ্চ / ১-৮ অথর্বা। সোমঃ। ১ পুরোঽনুষ্টুপ্ ত্রিষ্টুপ্, ২-৩, ৫-৭ অনুষ্টুপ্, ৪ ত্রিষ্টুপ্, ৮ বিরাডুরোবৃহতী।

আয়মগন্ পর্ণমণির্বলী বলেন প্রমৃণন্ত্সপত্নান্।
ওজো দেবানাং পয় ওষধীনাং বর্চসা মা জিন্বত্বপ্রয়াবন্ ॥১॥

5.2

ময়ি ক্ষত্রং পর্ণমণে ময়ি ধারয়তাদ্ রয়িম্।
অহং রাষ্ট্রস্যাভীবর্গে নিজো ভূয়াসমুত্তমঃ ॥২॥

5.3

যং নিদধুর্বনস্পতৌ গুহ্যং দেবাঃ প্রিয়ং মণিম্।
তমস্মভ্যং সহায়ুষা দেবা দদতু ভর্তবে ॥৩॥

5.4

সোমস্য পর্ণঃ সহ উগ্রমাগন্নিন্দ্রেণ দত্তো বরুণেন শিষ্টঃ ।
তং প্রিয়াসং বহু রোচমানো দীর্ঘায়ুত্বায় শতশারদায় ॥৪॥

5.5

আ মারুক্ষৎ পর্ণমণির্মহ্যা অরিষ্টতাতয়ে ।
যথাহমুত্তরোঽসান্যর্যম্ণ উত সংবিদঃ ॥৫॥

5.6

যে ধীবানো রথকারাঃ কর্মারা যে মনীষিণঃ ।
উপস্তীন্ পর্ণ মহ্যং ত্বং সর্বান্ কৃণ্বভিতো জনান্ ॥৬॥

5.7

যে রাজানো রাজকৃতঃ সূতা গ্রামণ্যঽশ্চ যে।
উপস্তীন্ পর্ণ মহ্যং ত্বং সর্বান্ কৃণ্বভিতো জনান্ ॥৭॥

5.8

পর্ণোঽসি তনূপানঃ সয়োনির্বীরো বীরেণ ময়া ।
সংবত্সরস্য তেজসা তেন বধ্নামি ত্বা মণে ॥৮॥